އިޒްރޭލުން ސޮމާލީލޭންޑް ބަލައިގަތުން ޗައިނާ އިން ދެކޮޅު ހަދައިފި

ޗައިނާއިން ސޯމާލިއާގެ ސަރަޙައްދުތައް ބައިކޮށްލަން ކުރާ ކޮންމެ މަސައްކަތަކާ ދެކޮޅުކަމަށް، އެ ޤައުމުގެ ފޮރިން މިނިސްޓްރީން ހޯމަ ދުވަހު ބުނެފައިވެއެވެ. އިރުމަތީ އެފްރިކާގައި އޮންނަ ސޯމާލިއާ ގެ މިނިވަންކަމާއި، އެއްބައިވަންތަކަމާއި، ސަރަޙައްދީ ރައްކާތެރިކަމަށް ޗައިނާގެ ފުރިހަމަ ތާއީދު އޮތްކަން ވެސް އެ ބަޔާނުގައި ވަނީ ހާމަކޮށްފައެވެ.

"އެއްވެސް ޤައުމަކުން އެ ޤައުމެއްގެ އަމިއްލަ އެދުމަށްޓަކައި، އެހެން ޤައުމުތަކުގެ އެތެރޭގައި ވަކިވެގަންނަން މަސައްކަތްކުރާ ފަރާތްތަކަށް ހިތްވަރުދީ ނުވަތަ އެހީތެރިވެގެން ނުވާނެއެވެ." ޗައިނާގެ ބަޔާނުގައިވެ އެވެ.

މިކަން ހާމަކުރަމުން، މިނިސްޓްރީގެ ތަރުޖަމާނު ލިން ޖިއާން ނޫސްވެރިންނާ ބައްދަލުކުރައްވައި ވިދާޅުވީ، ސޮމާލީލޭންޑްގެ ކަމާބެހޭ ފަރާތްތަކުން، ބޭރުގެ ބާރުތަކާ ގުޅިގެން ވަކިވެގަތުމަށް ކުރާ މަސައްކަތްތައް ހުއްޓާލުމަށް ވެސް ޗައިނާ އިން ގޮވައިލާ ކަމަށެވެ.

ސޮމާލީލޭންޑަކީ މިނިވަން އަދި ސިޔާދަތީ ދައުލަތެއްގެ ގޮތުގައި ރަސްމީކޮށް ބަލައިގަތް ފުރަތަމަ ޤައުމަކަށް އިޒްރޭލު ވަނީ ވެފައިވެއެވެ. މި ގުޅުމުގެ ތެރެއިން، ދަނޑުވެރިކަމާއި، ޞިއްޙަތާއި، ޓެކްނޮލޮޖީއާއި، އިޤްތިޞާދީ ދާއިރާތަކުން ސޮމާލީލޭންޑާއެކު  އެއްބާރުލުން ދޭނެ ކަމަށް އިޒްރޭލުން ވަނީ ހާމަކޮށްފައެވެ.