އިތުރު ދެ އަހަރަށް، އަލް ނަޞްރުގެ އެއްބަސްވުން ރޮނާލްޑޯ އައު ކޮށްފި

ސައުދީ ޕްރޯ ލީގުގެ އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ، އެ ކުލަބުގެ އެއްބަސްވުން އައު ކޮށްފި އެވެ.

އުމުރުން 40 އަހަރުގެ ރޮނާލްޑޯ އަލް ނަޞްރަށް ބަދަލުވީ 2023 ވަނަ އަހަރު އެވެ. މެންޗެސްޓަރ ޔުނައިޓެޑު ދޫކޮށް، އޭނާ އަލް ނަޞްރަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ ޖޫން މަހުގެ ނިޔަލަށެވެ.

ނަމަވެސް، ރޮނާލްޑޯ ވަނީ އަލް ނަޞްރާ އެކު އައު އެއްބަސްވުމެއްގައި ސޮއި ކޮށްފަ އެވެ. އެގޮތުން އަލް ނަޞްރާ އެކު ރޮނާލްޑޯ ވަނީ އިތުރު ދެ އަހަރު ދުވަހުގެ އެއްބަސްވުމެއްގައި ސޮއި ކޮށްފަ އެވެ. އެހެންކަމުން، 2027 ވަނަ އަހަރާ ހަމަ އަށް ރޮނާލްޑޯ އެ ކުލަބުގައި ހުންނާނެ އެވެ.

އަލް ނަޞްރުގެ އެއްބަސްވުމުގެ މުއްދަތު ހަމަވުމުން، ރޮނާލްޑޯ އެ ކުލަަބު ދޫކޮށްލާނެ ކަމުގެ އަޑުތަކެއް ވެސް ފެތުރުނެވެ. ނަމަވެސް އަލް ނަޞްރުން ވަނީ އޭނާގެ އެއްބަސްވުން އައު ކުރަން ބޭނުންވާކަން އިއުލާން ކޮށްފަ އެވެ. އަދި އައު އެއްބަސްވުމުގެ ދަށުން ރޮނާލްޑޯ އަށް ބޮޑު އާމްދަނީ އެއް ވެސް ލިބޭނެ ކަމަށް ރިޕޯޓުތައްް ބުނެ އެވެ.

އަލް ނަޞްރަށް ބަދަލުވި ފަހުން ރޮނާލްޑޯ އަންނަނީ އެ ކުލަބުގައި ވެސް މޮޅު ކުޅުމެއް ދައްކަމުންނެވެ. ރޮނާލްޑޯ ވަނީ މިހާތަނަށް އަލް ނަޞްރާ އެކު ތިން ސީޒަން ހޭދަކޮށްފަ އެވެ. އޭނާ ވަނީ މި ތިން ސީޒަންގެ ތެރޭގައި އަލް ނަޞްރަށް ކުޅެދިން 111 މެޗުގައި 99 ލަނޑު ޖަހައިފަ އެވެ. އަލް ނަޞްރާ އެކު ރޮނާލްޑޯ ވަނީ 2023 ވަނަ އަހަރުގެ އަރަބް ކުލަބު ޗެމްޕިއަންސް ކަޕް ކާމިޔާބު ކޮށްފަ އެވެ.

މި ނިމުނު ސީޒަންގެ ސައުދީ ލީގުގެ އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ ވެސް ރޮނާލްޑޯ އެވެ. އޭނާ ވަނީ ސައުދީ ލީގުގައި އަލް ނަޞްރަށް ކުޅެދިން 30 މެޗުގައި 25 ލަނޑު ޖަހައިފަ އެވެ. މީގެ އިތުރުން އޭގެ ކުރީ ސީޒަންގެ ސައުދީ ލީގުގެ އެންމެ ގިނަ ލަނޑު ޖެހި ކުޅުންތެރިޔަކަށް ވެސް ހޮވުނީ ރޮނާލްޑޯ އެވެ.