ރާއްޖޭގެ މަލްޓިޕާޓީ ޑިމޮކްރަސީ ހަރުދަނާ ކުރަން ޗައިނާ އިން ތަޖުރިބާ އާއި ފިލާވަޅު ހޯދަނީ
އިލެކްޝަންސް ކޮމިޝަންގެ ރައީސް މުހައްމަދު ޒާހިދު ޗައިނާގެ ސަފީރު ކޮންގް ޝިއަންހުއާ ބައްދަލުކުރައްވައި، ރާއްޖޭގެ ގިނަ ޕާޓީ އެކުލެވޭ ޑިމޮކްރަޓިކް ނިޒާމު ހަރުދަނާކުރުމަށާއި އިޤްތިޞާދީ އަދި އިޖުތިމާޢީ ތަރައްޤީ ކުރިއަރުވައި ރައްޔިތުންގެ ދިރިއުޅުމުގެ ފެންވަރު މަތިކުރުމަށް ޗައިނާގެ ތަޖުރިބާއިން ދަސްކުރަން ބޭނުންވާ ކަމަށް ވިދާޅުވި.
ޗައިނާ ސަފީރު ކޮންގ ޝިއަންހުއާ އިލެކްޝަންސް ކޮމިޝަންގެ ރައީސް މުހައްމަދު ޒާހިދުއާ ބައްދަލު ކުރައްވަނީ.
ގިނަ ޕާޓީ އެކުލެވޭ ޑިމޮކްރަޓިކް ނިޒާމު ރާއްޖޭގައި ހަރުދަނާ ކުރުމަށް ޗައިނާގެ ތަޖުރިބާ އިން ދަސްކުރަން ބޭނުންވާ ކަމަށް އިލެންޝަންސް ކޮމިޝަން ގެ ގެ ރައީސް މުހައްމަދު ޒާހިދު ވިދާޅުވެއްޖެ އެވެ.
ޒާހިދު މިހެން ވިދާޅުވީ ޑިސެމްބަރު 23 ވަނަ ދުވަހު، ދިވެހިރާއްޖެ އަށް ކަނޑައަޅުއްވާފައިވާ ޗައިނާގެ ސަފީރު ކޮންގް ޝިއަންހުއާ ބައްދަލު ކުރައްވާ ދެއްކެވި ވާހަކައިގަ އެވެ.
މި ބައްދަލުވުމާ ބެހޭ ގޮތުން ޗައިނާ ގެ ފޮރިން މިނިސްޓްރީން ނެރުނު ކުރު ބަޔާނެއް ގައި ބުނެފައިވަނީ، ދައުލަތް ހިންގުމުގެ އެންމެ ރަނގަޅު ނިޒާމު އޮތީ ޗައިނާ ގައި ކަމަށް ޒާހިދު ވިދާޅުވި ކަމަށެވެ. ރާއްޖޭގެ ގިނަ ޕާޓީ އެކުލެވޭ ޑިމޮކްރެސީ ގެ ނިޒާމު ހަރުދަނާކުރުމަށާއި، އިޤްތިޞާދީ އަދި އިޖުތިމާޢީ ތަރައްޤީ ކުރިއަރުވައި، ރައްޔިތުންގެ ދިރިއުޅުމުގެ ފެންވަރު މަތިކުރުމަށް ޗައިނާ ގެ ތަޖުރިބާ ވަރަށް ބޮޑަށް އިލެކްޝަންސް ކޮމިޝަނުން ބޭނުންވެފައިވާ ކަމަށް ޒާހިދު ވިދާޅުވި ކަމަށް ބުނެފައިވެ އެވެ.
މި ބައްދަލު ކުރެއްވުމުގައި ޗައިނާގެ ސަފީރު ކޮންގް ޝިއަންހުއާ ވިދާޅުވީ، ދެ ޤައުމުގެ ވެރިންގެ ސްޓްރެޓީޖިކް މަޝްވަރާތަކުގެ ނަތީޖާ އެއްގެ ގޮތުން، ޗައިނާ-ދިވެހިރާއްޖޭގެ ގުޅުން މިހާރު ވަނީ އެންމެ ރަނގަޅު ހިސާބަށް ގޮސްފައިވާ ކަމަށެވެ. ޗައިނާ އިން ދިވެހިރާއްޖެ ތަރައްޤީ އަށް ކުރާ މަސައްކަތަށް އެހީތެރިކަން ދިނުން ކުރިއަށް ގެންދާނެ ކަމަށާއި، ދިވެހި ރައްޔިތުންނަށް އިތުރު ފައިދާތައް ހޯދައިދިނުމަށްޓަކައި، ދައުލަތް ހިންގުމުގެ ތަޖުރިބާ ބަދަލުކުރުމުގެ މަސައްކަތުގައި ބައިވެރިވާނެ ކަމަށް ވެސް އޭނާ ވިދާޅުވިއެވެ.
