ހައުސިން މިނިސްޓްރީ އިމާރާތު ގައި ރޯވިތާ އަހަރެއް: ޗައިނާއިން 2.8 މިލިއަން ޑޮލަރުގެ އެހީ ފޯރުކޮށްދެނީ

ހައުސިން މިނިސްޓްރީ ހިންގަމުން ދިޔަ އިމާރާތު ގައި ހިނގި އަލިފާނުގެ ހާދިސާ ގައި ލިބުނު ގެއްލުމުން އަރައިގަތުމަށް ޗައިނާއިން 2.8 މިލިއަން ޑޮލަރުގެ އެހީ އެއް ފޯރުކޮށްދީފި އެވެ.

ހައުސިން މިނިސްޓްރީ ގައި ރޯވެފައި ވަނީ މިދިޔަ އަހަރުގެ ޑިސެމްބަރު މަހުގެ 12 ވަނަ ދުވަހު އެވެ. އެ ހާދިސާ ގައި ހައުސިން މިނިސްޓްރީގެ އިތުރުން އެތަނާއި ޖެހިގެން ހުރި ގްރީން ބިލްޑިން ވެސް ވަނީ ބޭނުން ނުކުރެވޭ ވަރަށް އަނދާފަ އެވެ. އޭގެ ފަހުން ދަރުބާރު ގެއަށް އެ ވުޒާރާތަކުގެ މަސައްކަތް ބަަދަލުކުރި ނަމަވެސް މުވައްޒަފުންނަށް އެކަށީގެންވާ މާހައުލެއް ހޯދާދިނުމަށް މިހާތަނަށް ސަރުކާރަށް ވަނީ ނުކުޅެދިފަ އެވެ.

އެ އެހީ ރާއްޖެ އަށް ހަވާލުކޮށްދެވީ ޗައިނާ ސަރުކާރުން ރާއްޖެއަށް ކަނޑައަޅާފައި ހުންނަވާ ސަފީރު ކޮންގް ޝިންހުއާ އެވެ. އެކަން ސަރުކާރަށް ނުކުރެވި ވަނިކޮށް، ބުރާސްފަތި ދުވަހު ހެނދުނު 2.8 މިލިއަން ޑޮލަރުގެ މާލީ އެހީތެރިކަން ފޯރުކޮށްދީފައި ވަނީ އެކަމަށްޓަކާ ބޭއްވި ޚާއްސަ ރަސްމިއްޔާތެއްގަ އެވެ. އެ އެހީ އާއި ރާއްޖޭގެ ފަރާތުން ހަވާލުވެވަދައިގަންނަވާފައި ވަނީ ފިނޭންސް މިނިސްޓަރ ވަޒީރު މޫސާ ޒަމީރު އެވެ.

ފިނޭންސް މިނިސްޓަރ ވަނީ މި އެހީ އާއި އެކު ސަރުކާރުގެ މުހިންމު މަސައްކަތްތައް އަލުން ފެށޭނެ ކަމަށާއި، މި ކުއްލި އެހީގެ ޕެކޭޖް ގެ ސަބަބުން އޮފީސް ސާމާނާއި ފަރުނީޗަރު ލިބުމަށް މަގުފަހިވާ ކަމަށް ބަޔާންކުރައްވާފަ އެވެ. ހަމައެހެންމެ ޗައިނާއިން އެފަދަ އެހީ އެއް ވުމަކީ ޢަމަލީ އެހީތެރިކަމަކަށް ވުރެ ބޮޑަށް ދެ ގައުމުގެ ގުޅުން އެނގޭ ކަމެއް ކަމަށް ވަޒީރު ވިދާޅުވި އެވެ.

އަލިފާން ރޯވި ދެ އިމާރާތުގައި ހިންގަމުންދިޔައީ ހައުސިން މިނިސްޓްރީއާއި އިންފްރާސްޓްރަކްޗާ މިނިސްޓްރީ އަދި އެންވަޔަރަމެންޓް މިނިސްޓްރީގެ އިތުރުން އެންވަޔަރަމެންޓް ޕްރޮޓެކްޝަން އޭޖެންސީ (އީޕީއޭ) އާއި މާލޭ ސިޓީ ކައުންސިލްގެ އޮފީހެކެވެ. ހާދިސާ އާއި ގުޅިގެން މިނިސްޓްރީގެ މަސައްކަތްތައް ވަގުތީގޮތުން ވަނީ ދަރުބާރުގެއަށް ބަދަލުކޮށްފަ އެވެ.

މި އަލިފާނުގެ ހާދިސާއާ ގުޅިގެން އެތައް ބަޔަކު އެކަން ހިނގި ގޮތާއި މެދު ސުވާލު އުފައްދަ އެވެ. މިކަމުގެ ފަހަތުގައި ފޮރުވިފައިވާ އެހެން މަޤްސަދެއް ވާ ކަމަށް ވެސް ބައެއް ސިޔާސީ ފަރާތްތަކާއި އާއްމުން ދަނީ ސުވާލު އުފައްދަމުންނެވެ.