ޗައިނާއަށް ކުރެއްވި ދަތުރަށްފަހު މުއިއްޒު ރާއްޖެ ވަޑައިގެންފި

ޗައިނާގެ ރައީސް ޝީ ޖިންޕިންގެ ދައުވަތަކަށް އެ ގައުމަށް ކުރެއްވި ރަސްމީ ދަތުރަށްފަހު ރައީސް މުހައްމަދު މުއިއްޒު އެނބުރި މިއަދު ރާއްޖެ ވަޑައިގެންފި އެވެ.

މި ދަތުރުފުޅު ގައި ރައީސުލްޖުމްހޫރިއްޔާ ވަނީ، ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓްގައި ބައިވެރިވެވަޑައިގެން، އެހެންް ގައުމުތަކުގެ ހެޑް އޮފް ސްޓޭޓުންނާއި މަންދޫބުންނާއެކު އެސްސީއޯ ޕްލަަސްގެ މަތީ ފެންވަރުގެ ބައްދަލްވުންތަކުގައި ބައިވެރިވެވަޑައިގެންފަ އެވެ.

މީގެ އިތުރުން މި ދަތުރުފުޅުގެ ތެރެއިން ރައީސް މުއިއްޒު ވަނީ ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓްގައި ބައިވެރިވެވަޑައިގެންނެވުމުގެ އިތުރުން ޗައިނާގެ ރައީސް ޝީ ޖިންޕިންއާ ވެސް ބައްދަލުކުރައްވާފަ އެވެ.

މިސަމިޓުގެ ހަވާސާގައި ކުރިއަށް ގެންދިޔަ ބައިލެޓެރަލް ބައްދަލުވުންތަކުގައި ރައީސުލްޖުމްހޫރިއްޔާ ވަނީ އެހެން ގައުމުތަކުގެ ވެރިންނާއި ބައްދަލުކުރައްވައި، ހާރިޖީ ގުޅުންތައް އިތުރަށް ހަރުދަނާ ކުރެއްވުމާއި، ގުޅިގެން މަސައްކަތް ކުރެއްވޭނެ ކަންކަމުގެ މައްޗަށް އަލިއަޅުއްވާލައްވައި މަޝްވަރާ ކުރައްވާފަ އެވެ.

އޭގެއިތުރުން ދަތުރުގެ ތެރެއިން ރާއްޖެ އާއި ޗައިނާއާ ދެމެދު އެކި ދާއިރާތަކުން އެއްބާރުލުން ދިނުމާ ގުޅޭ 11 އެމްއޯޔޫތަކެއްގައި ސޮއިކުރި އެވެ.

މުއިއްޒު ވަނީ ދެވަނަ ބޮޑު ހަނގުރާމައިގައި ޗައިނާއަށް ލިބުނު ކާމިޔާބީއަށް 80 އަހަރު ފުރުން ފާހަގަކުރަން ބޭއްވި ހާއްސަ ޕެރޭޑުގައި ވެސް ބައިވެރިވެވަޑައިގެންފަ އެވެ.

މުއިއްޒު ވެރިކަމަށް ވަޑައިގަތުމަށްފަހު އެންމެ ފުރަތަމަ މަސައްކަތް ކުރެއްވީ ޗައިނާ ގާތް ކުރުމަށްފަހު އިންޑިއާއާ ފެއަށް ދިޔުމަށެވެ. އެގޮތުން ޖެނުއަރީ، 2024، ގައި ޗައިނާއަށް ކުރެއްވި ދަތުރުފުޅަށް ފަހު އެނބުރި މާލެ ވަޑައިގެން، އިންޑިއާއާ ދުރަށްޖެހުމުގެ މަގު ޗާޓެއް ވެސް ރައީސް މުއިއްޒު އިއުލާނު ކުރެއްވި އެވެ.

މިއާއި އެކު ރާއްޖެ އާއި އިންޑިއާއާ ދެމެދު އޮތް ގުޅުން ގޯސްވި ނަމަވެސް އެ ދަނޑިވަޅުގައި ޗައިނާއާއެކު އޮތް ގުޅުން ވަރުގަދައެއް ނުވި އެވެ. އަދި ޗައިނާއިން ހޯދަން މަސައްކަތް ކުރި އެހީތަކެއް ވެސް އެއިރު ހަމަނުޖެހުނެވެ.

ރާއްޖޭގެ މާލީ ހާލަތު ދަށްވުމާއެކު މުއިއްޒު ދެން ބެއްލެވީ އިންޑިއާއަށް ވަޑައިގެން އިންޑިއާއާއެކު އޮތް ގުޅުން ބަދަހި ކުރުމަށެވެ. އަދި އެ ދަތުރުފުޅުގައި އިންޑިއާއި އެކު ގުޅުން ބަދަހި ކުރުމުގެ އެގްރިމެންޓެއްގައި މުއިއްޒު ސޮއި ވެސް ކުރެއްވި އެވެ.

މިއީ، ރައީސް މުޢިއްޒު މަގާމާއި ހަވާލުވެވަޑައިގެންނެވިފަހުން، ޗައިނާއަށް ކުރެއްވި ދެވަނަ ރަސްމީ ދަތުރުފުޅެވެ.