މުއިއްޒު ސަރުކާރުން ޗައިނާ އާއެކު ސޮއި ކޮށްފައިވާ 11 އެއްބަސްވުމުގެ ތަފްސީލު ދޭން ފޮރިން މިނިސްޓްރީން ދެކޮޅުހަދައިފި!

މިދިޔަ ސެޕްޓެމްބަރު މަހުގެ ދެވަނަ ދުވަހު ޗައިނާ ސަރުކާރާއެކު ރާއްޖެއިން 11 ސޮއި ކުރި 11 ފަހުމުނާމާގެ ތަފްސީލު ދިނުމަށް ސަރުކާރުން ދެކޮޅުހަދައިފިއެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި މަޖިލީހުގެ މާވަށު ދާއިރާގެ މެންބަރު، އަހުމަދު ޝާކިރު ވަނީ ރައީސް ޑރ. މުހައްމަދު މުއިއްޒު މިދިޔަ ސެޕްޓެމްބަރު މަހު ޗައިނާއަށް ކުރެއްވި ދަތުރުގެ ތެރެއިން އެ ގައުމުގެ ސަރުކާރާއެކު ސޮއިކުރި ފަހުމުނާމާތަކުގެ ކޮޕީ ލިޔުމުން ހޯދުމަށް ފޮރިން މިނިސްޓަރު އަރިހުން އެދިފައެވެ.

އެ ސުވާލުގެ ޖަވާބުގައި ފޮރިން މިނިސްޓަރު ޑރ. އަބްދުﷲ ޚަލީލް ފޮނުއްވި ސިޓީގައި ވިދާޅުވީ އެ މައުލޫމާތު ފަހުން ހާމަކުރާނެ ކަމަށެވެ. މިނިސްޓަރުގެ ސިޓީގައި ބުނީ އެ ފަހުމުނާމާތަކާ ގުޅިގެން ދެ ގައުމުގެ ދެމެދުގައި އިތުރަށް މަޝްވަރާ ކުރެވި އެއްބަސްވުމަކަށް ވާސިލުވުމުގެ މަސައްކަތް މިވަގުތު ކުރަމުންދާ ކަމަށެވެ. އަދި މި މަސައްކަތްތައް ނިމުނުހާ އަވަހަކަށް މިކަމާބެހޭ މައުލޫމާތު ކަމާބެހޭ ފަރާތްތަކާ ހިއްސާ ކުރާނެ ވާހަކަ އެ ސިޓީގައި ވެއެވެ.

ރައީސްގެ އެ ދަތުރުފުޅަކީ ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓުގައި އޮބްޒާވަރެއްގެ ގޮތުގައި ބައިވެރިވެވަޑައިގަތުމަށް އެ ގައުމަށް ކުރެއްވި ދަތުރުފުޅެކެވެ. ޗައިނާގެ ވެރިރަށް ބެއިޖިންގްގެ ވަންގްފުޖިންގް ހިލްޓަން ހޮޓެލްގައި ބޭއްވުނު ރަސްމިއްޔާތެއްގައި ސޮއިކުރެވުނު މި ފަހުމުނާމާ ތަކުގެ ސަބަބުން ދިވެހިރާއްޖެއާއި ޗައިނާއާ ދެމެދު އޮތް ގުޅުން އިތުރަށް ހަރުދަނާވެގެންދާނެކަމަށް ރައީސް އޮފީހުން މައުލޫމާތު ދީފައިވެއެވެ.

މި ފަހުމުނާމާތަކުގެ ތެރޭގައި އިގްތިސާދީ ތަރައްގީއާއި، އުމްރާނީ ތަރައްގީގެ އިތުރުން އިޔާދަކުރަނިވި ހަކަތައިގެ ދާއިރާއިން ދެ ގައުމުގެ މެދުގައި އެއްބާރުލުން އިތުރުކުރުމުގެ ފަހުމުނާމާތައް ހިމެނޭކަމަށް ރައީސް އޮފީހުން ހާމަކޮށްފައި ވެއެވެ.

ރައީސް އޮފީހުން އިތުރަށް ފާހަގަ ކޮށްފައިވަނީ މި ފަހުމުނާމާތަކަކީ ކުރިއަށް އޮތް ތަނުގައި ދެ ގައުމުގެ މެދުގައި އޮތް ޒަމާންވީ ގުޅުން އިތުރަށް ވަރުގަދަކޮށް، ދެމެހެއްޓެނިވި ތަރައްގީއަށް މަގުފަހިކޮށްދޭނެ މުހިންމު ފިޔަވަޅުތަކެއް ކަމުގައެވެ.

އެ މަނިކުފާނުގެ ސަރުކާރެއްގައި ފޮރުވާނެ އެއްވެސް އެއްޗެއް ނޯންނާނެ ކަމަށް ރައީސް މުއިއްޒު ވިދާޅުވެފައި ވީނަމަވެސް، އަދި ކުރީ ސަރުކާރުން އިންޑިއާ އާ އެކު ހަދާފައިވާ އެއްބަސްވުންތައް ހާމަ ނުކޮށްގެން އިންތިހާ އަށް ފާޑުކީ ފަރާތްތައް މި ސަރުކާރުގައި ތިބި ނަމަވެސް، މި ސަރުކާރުން ޗައިނާ އާ އެކު ވެފައިވާ އެއްބަސްވުންތަކުގައި ހިމެނޭ ވަކިވަކި ތަފްސީލުތައް މިހާތަނަށް ސަރުކާރުން ހާމަކޮށްފައެއް ނުވެއެވެ.

ރައީސް މުއިއްޒު ވެރިކަމަށް ވަޑައިގެން އެންމެ ފުރަތަމަ ރަސްމީދަތުރުވެސް ކުރައްވާފައިވަނީ ޗައިނާ އަށެވެ. އެ ދަތުރުގައިވެސް ވަނީ 20 ފަހުމުނާމާއެއްގައި ޗައިނާ އެކު ސޮއިކޮށްފައެެވެ. ނަމަވެސް އޭގެ ސަބަބުން އެކަށީގެންވާ ފައިދާއެއް ރާއްޖެއަށް ކޮށްފައިވާ ކަމެއް އަދި ފާހަގަ ކުރެވޭކަށް ނެތެވެ.