ލޯކަލް ކައުންސިލް އިންތިހާބު މާރޗު 28 ގައި، 80 މިލިއަން ރުފިޔާ ޚަރަދުވާނެ
ލޯކަލް ކައުންސިލް އިންތިހާބު 2025 މާރިޗު 28 ގައި ބޭއްވުމަށް ހަމަޖެހި، އިންތިހާބަށް 70 އާއި 80 މިލިއަން ރުފިޔާއާ ދެމެދުގެ އަދަދެއް ޚަރަދުވާނެކަމަށް ލަފާކުރެވޭ
އިލެސަންސް ކޮމިޝަންގެ އޮފީސް
ލޯކަލް ކައުންސިލް އިންތިހާބު އަންނަ އަހަރުގެ މާރޗު މަހު ބާއްވަން އިލެކްޝަންސް ކޮމިޝަނުން ނިންމައިފިއެވެ. އަދި މި އިންތިހާބަށް މަދުވެގެން 70 ނޫނީ 80 މިލިއަން ރުފިޔާ ހޭދަވާނެ ކަމަށް އެ ކޮމިޝަނުން ބުނެފި އެވެ.
ދައުލަތުގެ މީޑިޔާގައި ވާހަކަ ދައްކަވަމުން އިލެކްޝަންސް ކޮމިޝަންގެ ރައީސް މުޙައްމަދު ޒާހިދު ވިދާޅުވީ، 2026 ވަނަ އަހަރުގެ ލޯކަލް ކައުންސިލް އަދި ޑަބްލިއުޑީސީ އިންތިހާބު ބޭއްވުމަށް ހަމަޖެހިފައިވަނީ 28 މާރޗު 2025 ގައި ކަމަށެވެ.
ޒާހިދު ވިދާޅުވި ގޮތުގައި މި އިންތިހާބުގައި ވާދަކުރުމުގެ ފުރުސަތު އަންނަ އަހަރުގެ ޖެނުއަރީ މަހުގެ 17 ވަނަ ދުވަހު ހުޅުވާލެވޭނެއެވެ. އަދި މި އިންތިހާބަށް މަދުވެގެން 70 އާއި 80 މިލިއަން ރުފިޔާއާ ދެމެދުގެ އަދަދެއް ހަރަދުވާނެ ކަމަށްވެސް ވިދާޅުވިއެވެ.
މިހާރު ޓެންޓިވްލީ ޕްލޭންކޮށްފައި އޮތްގޮތުން ރާވާފައި އޮތްގޮތަށް ބަލާއިރުގައި އިންތިހާބު ބާއްވާނެ ތާރީހެއް ކަމަށް މިހާރު ތާވަލުކޮށްފައި ވަނީ 2026 ވަނަ އަހަރުގެ މާޗު މަހުގެ 28 ވަނަ ދުވަސް. އެއީ ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ އިންތިހާބު ބާއްވަން މިވަގުތު އަޅުގަނޑުމެން ޕްލޭން ކޮށްފައި އޮތް ރާވާފައި އޮތް ދުވަހަކީ އެދުވަސް، އަދި އަޅުގަނޑުމެން ކެންޑިޑެންސީ އަށް ހުޅުވާލަން ރާވާފައި އޮތީ 17 ޖެނުއަރީގައި. އަޅުގަނޑު ހަނދާންވަނީ 17 ޖެނުއަރީގައޭ އަޅުގަނޑުމެން ކެންޑިޑެންސީ އަށް ހުޅުވާލާނީ.އިލެކްޝަންސް ކޮމިޝަންގެ ރައީސް މުޙައްމަދު ޒާހިދު
އިންތިހާބުގެ އިދާރީ މަސައްކަތްތަކަށް 270 އަށްވުރެ ގިނަ މުވައްޒަފުން ބޭނުންވާނެ ކަމަށް ފާހަގަކުރައްވަމުން ޒާހިދު ވިދާޅުވީ، އިންތިހާބުގެ ޓާސްކްފޯހަށް ބޭނުންވާ މުވައްޒަފުން ހޯދުމުގެ މަސައްކަތް މިހާރުވެސް ދަނީ ކުރިއަށެވެ.
މި އިންތިހާބުގައި އެންމެ ފާހަގަކޮށްލެވޭ އެއް ބަދަލަކީ ކެންޑިޑެސީ ފޯމު ހުށަހެޅުމުގެ މަރުހަލާ ޑިޖިޓަލްކުރުމެވެ. މިގޮތުން ކުރިން ބޭނުން ކުރަމުން އައި ކަރުދާސް ފޯމުގެ ބަދަލުގައި، އިލެކްޝަންސް ކޮމިޝަންގެ އޮންލައިން ޕޯޓަލް މެދުވެރިކޮށް ފޯމު ހުށަހެޅުމުގެ އިންތިޒާމު ހަމަޖެހިގެންދާނެއެވެ. މި ބަދަލަކީ އިދާރީ މަސައްކަތްތައް ފަސޭހަކޮށް، ހަރަދު ކުޑަކުރުމަށް އެޅޭ މުހިންމު ފިޔަވަޅެއް ކަމުގައި ކޮމިޝަނުން ފާހަގަކުރެއެވެ.
އިންތިހާބާ ގުޅިގެން ރައްޔިތުން ހޭލުންތެރިކުރުމުގެ ގޮތުން ފުޅާ ދާއިރާއެއްގައި މަސައްކަތްތަކެއް ކުރިއަށް ގެންދިއުމަށް ވަނީ ރޭވިފައެވެ. އެގޮތުން ރާއްޖޭގެ އާބާދީ ބޮޑެތި ސަރަހައްދުތަކަށް އަމާޒުކޮށް، 12 އަތޮޅެއްގެ 36 ރަށަކަށް ކޮމިޝަންގެ ޓީމުތައް ފޮނުވައިގެން ހޭލުންތެރިކުރުމުގެ ސެޝަންތަކެއް ނޮވެމްބަރު އަދި ޑިސެމްބަރު މަހުގެ ތެރޭގައި ބޭއްވުމަށް ވަނީ ހަމަޖެހިފައެވެ.
އިލެކްޝަންސް ކޮމިޝަނުން ފާހަގަކުރި ގޮތުގައި މުސްތަގުބަލުގައި އިންތިހާބުތަކުގެ ހަރަދު ކުޑަކުރުމަށް އިތުރު ފިޔަވަޅުތަކެއް އެޅުމަށް ވަނީ ރޭވިފައެވެ. އަދި މި އިންތިހާބަކީ ހާމަކަން ބޮޑު، އިތުބާރުހުރި އިންތިހާބަކަށް ހެދުމަށް އެންމެހާ މަސައްކަތްތަކެއް ކުރެވޭނެ ކަމުގެ ޔަގީންކަން ކޮމިޝަނުން ދެއެވެ.
