މިއަދުގެ ހާލަތަކީ އަސާސީ ބޭސް ހޯދަން ބޭނުންވާ މީހާ ވެސް މެންބަރު ކައިރިއަށް ގޮސް ސަލާން ޖަހަން ޖެހުން: މާރިޔާ
ރާއްޖެޓީވީ ގެ ފަލަސުރުޚީ ޕްރޮގްރާމް ގައި ވާހަކަދައްކަވަމުން މާރިޔާ ވިދާޅުވީ މި ސަރުކާރަށް އެއްވެސް ކަމެއް ހައްލުވާ މަންޒަރު ނުފެންނަ ކަމަށް. އެގޮތުން އާސަންދަ ނުލިބޭ ވާހަކައާއި ބޭސް ނުލިބޭ ވާހަކަތަކުން މުޅި ސޯޝަލް މީޑިއާ ފުރިފައިވާ ކަމަށް ވެސް މާރިޔާ ވިދާޅުވި.
ކުރީގެ ޑިފެންސް މިނިސްޓަރ މާރިޔާ އަޙްމަދު ދީދީ
މިއަދު ގައުމުގެ ހާލަތު ގޯސްވެފައިވާ މިންވަރަކީ އެންމެ އަސާސީ ބޭސް ހޯދަން ވެސް ރައްޔިތުންގެ މަޖިލިސް މެންބަރުން ކައިރިއަށް ދާން ޖެހުން ކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.
ރާއްޖެޓީވީ ގެ ފަލަސުރުޚީ ޕްރޮގްރާމް ގައި ވާހަކަ ދައްކަވަމުން މާރިޔާ ވިދާޅުވީ މި ސަރުކާރަށް އެއްވެސް ކަމެއް ހައްލުވާ މަންޒަރު ނުފެންނަ ކަމަށެވެ. އެގޮތުން އާސަންދަ ނުލިބޭ ވާހަކައާއި ބޭސް ނުލިބޭ ވާހަކަތަކުން މުޅި ސޯޝަލް މީޑިއާ ފުރިފައިވާ ކަމަށް ވެސް މާރިޔާ ވިދާޅުވި އެވެ.
މިއަދު އެންމެ އަސާސީ ބޭސް ހޯދަން ވެސް އެކި މީހުންގެ ގާތަށް ދާން ޖެހިފައިވާ ވާހަކަ ވެސް މީހުން ދައްކަނީ މަދުން ނޫން ކަމަށް ވެސް މާރިޔާ ވިދާޅުވި އެވެ.
އެއްވެސް ކަމެއް ހައްލު ކުރެވޭ ތަނެއް ނުފެނޭ. އާސަންދަ ވެސް ނުލިބޭ ވާހަކަ މީހުން ދައްކަނީ. ގައިމު ވެސް ބޭސްތައް ވެސް ނުލިބޭ. ހަމަ ގިނައީ ގަންނަން ޖެހޭ ބޭހޭ ގިނައީ މީހުން ބުނަނީ. އެހެންވީމަ މިގޮތަށް ދިގު މުއްދަތަކަށް ބޭސް ކުރާ މީހުން، ބޮޑެތި ބަލިތަކަށް ބޭސް ކުރާ މީހުން އާދޭސް ކުރަން ޖެހޭ ވާހަކަ ހަމަ ނުދައްކައެއް މީހުން ނުތިބޭ. ވަރަށް ގިނަ ފަހަރަށް ހަމަ ކޮިިންމެ މީހަކު ވެސް ހަމަ މެންބަރު ކައިރިއަށް ގޮސް، އެހެން މީހެއް ކާރިއަށް ގޮސް ގެން. ފޭސްބުކް އެއްޗެހި ބަލާލިއަސް އެކި ފަންޑުތައް ހަދައިގެން މީނައަށް އެހީ ވާށޭ އޭނަ އަށް އެހީ ވާށޭ ކިޔައިގެން މުޅިން އެ އޮންނަނީ. އާސަންދަ ލިބޭނަމަ އަޅުގަނޑަށް ޔަގީން އަބަދު އަބަދު އެހެން ކިޔަމުން ނުދާނެ ކަން،ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ
އާންމު ރައްޔިތުންނަށް ބޭސް ލިބުން ދަތިވެ، އެތައް ބައެއްގެ ފުރާނައަށް ނުރައްކާވާ ހިސާބަށް ގޮސްފައިވާ ކަމަށް ބުނެ ރައްޔިތުންގެ މަޖިލީހަށް އެކި ފަހަރު މަތިން ކުއްލި މައްސަލައިގެ އިތުރުން ގަރާރު ވެސް ހުށަހަޅާފައި ވެ އެވެ.
ބޭސް ލިބުމުގެ ދަތިކަން ބޮޑުވެފައިވާ ކަމުގެ ޝަކުވާ ރައްޔިތުން ކެނޑިނޭޅި ކުރަމުން ދާއިރު މީގެ ކުރިން އާސަންދަ އިން ލިބެމުން ދިއަ ބޭސްތައް ދިނުން އާސަންދަ އިން ހުއްޓާލި ފަހުން ފާމަސީތަކުން އަމިއްލަ އަށް ގަންނަން ލިބުނު ނަމަވެސް، މިހާރު ބޮޑު އަގުގައި ވެސް އެ ބޭސްތައް ގަންނަން ނުލިބޭ ކަން ރައްޔިތުން ފާހަގަ ކުރަމުންދެ އެވެ.
ބޭސް ނެގުމަށް އެތައް ފާމަސީއަށް ގޮސްގެން ވެސް ބޭސް ހަމަނުވާ ކަމުގެ ޝަކުވާ އާއި މުހިންމު އެތައް ބޭހެއް އެއްގޮތަކަށް ވެސް ނުލިބޭކަމުގެ ޝަކުވާ ވެސް ރައްޔިތުން ދަނީ ކުރަމުންނެވެ.
ބޭސް ލިބުން ދަތިވުމުގެ ސަބަބުން ބޮޑެތި ބަލިތަކަށް ފަރުވާކުރާ މީހުންނާއި، ދާއިމީ ބަލިތަކާއި، ނަފްސާނީ ބަލިތަކުގެ އިތުރުން އުމުރުން ދުވަސްވީ މީހުންނަށާއި މާބަނޑު މީހުންނަށް ދޭ ޚާއްސަ ބޭސްތައް ހުސްވެފައިވާތާ އެތައް ދުވަހެއް ވެއްޖެ ކަމަށް ވެސް ރައްޔިތުން ދަނީ ބުނަމުންނެވެ.
މިކަމާ ގުޅިގެން ހެލްތު މިނިސްޓަރު އަބްދުﷲ ނާޒިމް ވިދާޅުވީ އާސަންދަ އިން ލިބޭ އެއްވެސް ބޭހެއް ހުއްޓާލާފައި ނުވާނެ ކަމަށާ ޑޮކްޓަރުން ބައެއް ފަހަރު ލިޔުއްވާ ވަކި ކަހަލަ ބްރޭންޑެއްގެ ބޭސް ނުލިބުމުގެ ހާލަތްތައް ދިމާވާ ކަމަށެވެ.
އެކަން ދިމާވަނީ ވަކި ބްރޭންޑެއްގެ ބޭހެއް ހޯދަން އުޅޭތީ ކަމަށާ އެކަން ވެސް މަދު ކުރަން މަސައްކަތް ކުރަމުން ދާ ކަމަށް ނާޒިމް ވިދާޅުވި އެވެ.
