ގާނޫނު އަސާސީ އިސްލާހު ކުރީ ގާނޫނުގެ ވެރިކަން ގެނައުމަށް
އާދިއްތަ ދުވަހުގެ ރޭ ކުރިއަށް ގެންދިޔަ އެމްޑީޕީ ގައުމީ މަޖިލީހުގެ ކުއްލި ޖަލްސާގައި ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަން ކުރަމުންދަނީ އެއްވެސް ވަރަކަށް ގާނޫނަށް ބެލުމެއް ނެތި ކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.
އާދިއްތަ ދުވަހުގެ ރޭ ކުރިއަށް ގެންދިޔަ އެމްޑީޕީ ގައުމީ މަޖިލީހުގެ ކުއްލި ޖަލްސާގައި މާރިޔާ ވިދާޅުވީ ރައީސް މުއިއްޒު ވެރިކަމަށް ގެނައުމަށް މަސައްކަތް ކުރި ރައްޔިތުން މިއަދު އެކަމާ ހިތާމަ ކުރާ ކަމަށާއި، ރިޔާސީ އިންތިޚާބުގެ ކޭންޕޭން ދުވަސްވަރު އެމްޑީޕީން ދެއްކީ ތެދު ވާހަކަކަން މިއަދު ރައްޔިތުން ގަބޫލުކުރާ ކަމަށެވެ.
މާރިޔާ ވިދާޅުވީ ގާނޫނު އަސާސީ އިސްލާހު ކުރީ ގާނޫނުގެ ވެރިކަން ގެނައުމަށް ކަމަށާއި، ނަމަވެސް ރައީސް މުއިއްޒު ވެރިކަން ކުރަމުންދަނީ ގާނޫނު އަސާސީއަށް ބެލުމެއް ނެތި ކަމަށެވެ.
މީގެ އިތުރުން މާރިޔާ ވިދާޅުވީ ބީއެމްއެލްގެ ކާޑު ލިމިޓަށް އާދިއްތަ ދުވަހުގެ ހެނދުނު ގެނައި ބަދަލުތައް އާދިއްތަ ދުވަހުގެ ހަވީރު އުވާލުމުން ބޭންކިން ނިޒާމަށް ރައީސްއަށް ބާރުފޯރުވޭނެތޯ އެއީ އުފައްދަންޖެހޭ ސުވާލެއް ކަމަށެވެ. ބޭންކިން ނިޒާމަށް ރައީސް ނުފޫޒު ފޯރުވާ ހިސާބަށް ކަންކަން ދިއުމުން މާލީ ނިޒާމަށް ރައްޔިތުންގެ އިތުބާރު ގެއްލޭ ކަމަށާއި، ރާއްޖޭގެ ބޭންކްތަކުގެ އެކައުންޓުގައި ފައިސާ ބެހެއްޓުމަށް ފަސްޖެހޭ ކަމަށެވެ.
މާރިޔާ ވިދާޅުވީ ރައްޔިތުންގެ ވެރިކަމަކީ ރައްޔިތުންނަށް ބަސްބުނެވޭ ގޮތަށް ރައްޔިތުން އިންތިޚާބުކުރާ މީހުންގެ ބަސް އޮންނަ ގޮތަށް ވެރިކަންކުރުން ކަމަށާއި، ނަމަވެސް މިހާރު ފެންނަނީ ރައްޔިތުންގެ ބާރު ކަނޑުވާލުމަށް މިސަރުކާރުން އެކި ގޮތްގޮތަށް މަސައްކަތް ކުރާ މަންޒަރު ކަމަށެވެ. އެގޮތުން ކައުންސިލްތަކުގެ ބާރު ކަނޑުވާލުމަށް އެޓޯލް މިނިސްޓްރީ އުފެއްދެވިކަން މާރިޔާ ފާހަގަކުރެއްވިއެވެ.
މާރިޔާ ވިދާޅުވީ ގާނޫނަށް ބެލުމެއް ނެތި ހިންގާ މިސަރުކާރުގެ ތެރޭގައި ވެސް އެތައް ބައިވަރު ސަރުކާރެއް އެބައޮތް ކަމަށެވެ.
