ގާނޫނުއަސާސީއަށް ގެނައި އިސްލާހު ބާތިލްކުރުމަށް މަޖިލީހަށާއި، ރައީސް މުއިއްޒަށް އަންގާ އަމުރުކޮށް ޕެޓިޝަނެއް ހުށަހަޅައިފި
އަންގާރަ ދުވަހު ބޭއްވި މޯލްޑިވިއަން ޑިމޮކްރެޓިކް ޕާޓީގެ ޤައުމީ މަޖިލީހުގެ ޖަލްސާގައި އެ ޕެޓިޝަން ހުށަހެޅުއްވީ ގަލޮޅު އުތުރު ދާއިރާގެ މެމްބަރު މާރިޔާ އަހުމަދު ދީދީ
ގާނޫނުއަސާސީއަށް ގެނައި އިސްލާހު ބާތިލްކުރުމަށް މަޖިލީހަށާއި، ރައީސް މުއިއްޒަށް އަންގާ އަމުރުކޮށް މާރިޔާ ޕެޓިޝަނެއް ހުށަހަޅުއްވަނީ
ޤާނޫނުއަސާސީ އަށް ގެނެސްފައިވާ ބަދަލު ބާތިލް ކުރުމަށާއި، ރައްޔިތުންގެ ބާރުވެރިކަން ހިނގައިދާނެ ހަމަ އެއްވެސް ކަމެއް ނުކުރުމަށް މަޖިލީހަށާއި، ރައީސް މުއިއްޒަށް އަންގާ އަމުރުކޮށް ޕެޓިޝަނެއް ހުށަހަޅައިފިއެވެ.
އަންގާރަ ދުވަހު ބޭއްވި މޯލްޑިވިއަން ޑިމޮކްރެޓިކް ޕާޓީގެ ޤައުމީ މަޖިލީހުގެ ޖަލްސާގައި އެ ޕެޓިޝަން ހުށަހެޅުއްވީ ގަލޮޅު އުތުރު ދާއިރާގެ މެމްބަރު މާރިޔާ އަހުމަދު ދީދީއެވެ. އެ ޕެޓިޝަނަކީ ގާނޫނުއަސާސީގެ 4 ވަނަ މާއްދާގެ ބާރު ކެނޑޭގޮތަށް ގާނޫނުއަސާސީއަށް ގެނައި ބަދަލު ބާތިލުކުރުމަށް އަންގައި ގާނޫނުއަސާސީގެ 4 ވަނަ މާއްދާގެ ދަށުން ރައްޔިތުން ކުރާ އަމުރުގެ ނަމުގައި ހުށަހެޅި ޕެޓިޝަނެކެވެ.
މާރިޔާ ވިދާޅުވި އެ ޕެޓިޝަން ހުށަހަޅަން ނިންމެވީ އެފަދަ ޕެޓިޝަނެއް އެމްޑީޕީން ހުށަހަޅަން ޖެހޭ ކަމަށް ގިނަ ބަޔަކު ބުނަމުންދާތީއެވެ. އެ ޕެޓިޝަން ހުށަހެޅީ ވަރަށް ގިނަ ބައެއްގެ އެދުމުގެ މަތިން ކަމަށާއި އުންމީދަކީ ވީހާވެސް ގިނަ ބަޔަކު އެ ޕެޓިޝަންގައި ބައިވެރިވުން ކަމަށް އޭނާ ވިދާޅުވިއެވެ. ރައްޔިތުންގެ ބާރު ކަނޑުވާލަން މަސައްކަތް ކުރާ ދަނޑިވަޅުގައި އެކަމާއި ދެކޮޅަށް އެމްޑީޕީން އަބަދުވެސް މަސައްކަތްކުރަމުންދާނެ ކަމަށް މާރިޔާ ވަނީ ވިދާޅުވެފައެވެ.
މާރިޔާ ހުށަހެޅުއްވި ޕެޓިޝަނުގައި ފާހަގަކޮށްފައި ވަނީ ދިވެހި ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިންކަމާއި އަދި އެ ބާރުތައް ދެމި އޮންނާނީވެސް ރައްޔިތުންގެ ކިބައިގައިކަމަށް ގާނޫނުއަސާސީގެ 4 ވަނަ މާއްދާގައި ބަޔާންކޮށްފައިވާ ކަމަށެވެ. އެހެންކަމަށް ވީ ހިނދު ދައުލަތުގެ 3 ބާރުގެ ތެރެއިން، ގާނޫނު ހަދާ ބާރަށް މަންދޫބުން އިންތިހާބުކޮށް، ދައުލަތް ހިންގުމުގެ އިޖުރާއަތުގައި ބައިވެރިވުމަކީ ގާނޫނުއަސާސީގެ 26 ވަނަ މާއްދާއާއި، 70 ވަނަ މާއްދާގެ ދަށުން ރައްޔިތުންނަށް ލިބިގެންވާ ބާރެއްކަމަށްވެސް އެ ޕެޓިޝަންގައި ވަނީ ބަޔާންކޮށްފައެވެ.
ހަމައެހެންމެ ދިވެހިރާއްޖޭގެ ވެރިކަން ހިންގުމަށް ރައްޔިތުން އެއްބަސްވެފައި އޮތީ ރިޔާސީ ނިޒާމަކަށް ކަމަށްވެފައި، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީ އެކުލަވާލާފައި އޮތީ ރައްޔިތުންގެ ނިންމުމާ އެއްގޮތަށް ރިޔާސީ ނިޒާމަކުން ވެރިކަން ހިންގުމަށްކަމަށް ވީހިނދު؛ ރައްޔިތުންގެ ހިޔާލެއް ނުހޯދާ ޤާނޫނުއަސާސީ އަށް އެ އިސްލާހު ގެނައިކަން އެ ގަރާރުގައި ވަނީ ފާހަގަކުރައްވާފައެވެ.
މީގެ އިތުރުން ގާނޫނުއަސާސީއަށް މި ގެނައި ބަދަލަކީ އެ ބަދަލުގެ ސަބަބުން ވެރިކަމުގެ ނިޒާމު މަސްހުނި ނިޒާމަކަށް ބަދަލުވެ، ރައްޔިތުން ނިންމި ނިންމުން ރޫޅިގެންދާފަދަ ބަދަލެއް ކަަމަށް މާރިޔާ ވަނީ އެ ޕެޓިޝަންގައި ފާހަގަކުރައްވާފައެވެ. ހަމައެހެންމެ ރައްޔިތުންގެ މަޖިލީހަށް ރައްޔިތުން އިންތިހާބުކުރާ މެންބަރުން، އެ މެންބަރުންގެ މަސައްކަތުގެ އަސާސް ބިނާކުރަން ޖެހެނީ މުޅި ގައުމުގެ މަސްލަތަށްކަމަށް ގާނޫނުއަސާސީގެ 75 ވަނަ މާއްދާގައި ބުނެފައި އޮތްހިނދު، އެ މެންބަރު ނިސްބަތްވާ ސިޔާސީ ޕާޓީން ބޭނުންވާ ގޮތަށް އަމަލުކުރުން މަޖުބޫރުކުރުވުމަކީ އެ މާއްދާއާ ހިލާފުކަމަކަށް ވެސް އެ ޕެޓިޝަންގައި ވަނީ ފާހަގަކުރައްވާފައެވެ.
އިތުރަށް އެ ޕެޓިޝަންގައި ބުނެފައި ވަނީ ރައްޔިތުންގެ މަޖިލީހުގެ މެންބަރަކު އެ މަޖިލީހުގައި ދެއްކި ވާހަކައެއްގެ ސަބަބުން ނުވަތަ ވޯޓުދިން ގޮތެއްގެ ސަބަބުން އެ މެންބަރެއްގެ މައްޗަށް އެއްވެސް ތަހުގީގެއް ހިންގައިގެން ނުވާނޭކަމަށް ގާނޫނުއަސާސީގެ 90 ވަނަ މާއްދާގައި ބުނެފައިވާ ކަމަށެވެ. އެހެންކަމަށް ވުމާއި އެކު މެންބަރުން ވޯޓުދޭ ގޮތެއްގެ ސަބަބުން ނުވަތަ ދައްކާ ވާހަކައެއްގެ ސަބަބުން އެ މެންބަރެއްގެ މެންބަރުކަން ގެއްލޭ ގޮތަށް ގާނޫނުއަސާސީ ބަދަލުކުރުމަކީ ދިވެހިރާއްޖޭގެ ގާނޫނުއަސާސީގެ އަސާސީ އޮނިގަނޑާވެސް ހިލާފު ކަމެއް ކަމަށް ވެސް އެ ޕެޓިޝަންގައި ވަނީ ވިދާޅުވެފައެވެ.
އެ ޕެޓިޝަންގައި އިތުރަށް ބުނެފައި ވަނީ ރައްޔިތުންގެ ރުހުމެއްނެތި ގާނޫނުއަސާސީއަށް މި ގެނައި ބަދަލު ބާތިލުކުރަން ޖެހޭ ކަމަށެވެ. އެހެންކަމުން ރައްޔިތުންގެ ބާރުވެރިކަން ނިގުޅިގެން ހިނގައިދާނޭފަދަ ހަމަ އެއްވެސް ކަމެއް ނުކުރުމަށް، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 4 ވަނަ މާއްދާއިން އައުދާނަކަމާއި ބާރުވެރިކަން ލިބި ތިބި ރައްޔިތުންގެ ހައިސިއްޔަތުން ރައްޔިތުންގެ މަންދޫބުންނަށާއި ދިވެހިރާއްޖޭގެ ވެރިކަން ހިންގުމަށް ދިވެހިރައްޔިތުން މަތިކޮށްފައިވާ ރައްޔިތުންގެ ހާދިމު، ރައީސުލްޖުމްހޫރިއްޔާ ޑރ.މުހައްމަދު މުއިއްޒުއަށް އަންގައި އަމުރުކުރާ ކަމަށް އެ ޕެޓިޝަންގައި ވަނީ ބުނެފައެވެ.
