ފައިސަލް ޓުއަރިޒަމް މިނިސްޓަރު ކަމުން ކުއްލި ގޮތަކަށް ވަކި ކުރެއްވީ ޒާތީ މައްސަލައަކުން
ފަލަސުރުހީ ޕްރޮގްރާމްގައި އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު އުޅުއްވަނީ މުޅި ގައުމު އަޅުވެތި ކުރުމުގެ މަސައްކަތުގައި ކަމަށް ރައްޔިތުންގެ މަޖިލީހުގެ ކުރީގެ މެންބަރު އަދި އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މާރިޔާ ވިދާޅުވީ ރާއްޖެއިން މިހާރު ފެނިގެންދަނީ އަޅުވެތި ކުރުމުގެ މަސައްކަތް ކުރާ މަންޒަރު ކަމަށެވެ. ރައީސް މުއިއްޒު މަސައްކަތް ކުރައްވަނީ އެންމެ ގާތުގައި ތިއްބަވާ ބޭފުޅުން އަޅުވެތި ކުރުމުގެ މަސައްކަތް ކަމަށާއި، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވެސް އަޅުވެތި ކުރެއްވުމުގެ މަސައްކަތްތަކެއް ކުރައްވާ ކަމަށް މާރިޔާ ވިދާޅުވިއެވެ.
އަބްދުއްރަހީމްގެ ދަރިކަލުން އިބްރާހިމް ފައިސަލް ޓުއަރިޒަމް މިނިސްޓަރު ކަމުން ކުއްލި ގޮތަކަށް ވަކި ކުރެއްވީ ޒާތީ މައްސަލައަކުންކަން ފާހަގަކުރައްވައި މާރިޔާ ވިދާޅުވީ ޑީއެންއާރުން އާއްމު ރައްޔިތުން މައުލޫމާތު ވަގަށް ނެންގެވި ހޯމް މިނިސްޓަރު އަލީ އިހުސާން މަގާމުން ދުރު ނުކުރައްވާ ކަމަށެވެ. އެހެންކަމުން މިއީ ރައްޔިތުންނަށް ހެޔޮ އެދިގެން ގައުމުގެ ކުރި މަގަމަށް ސަރުކާރުން ނަގާ ފިޔަވަޅުތަކެއް ނޫން ކަމަށް އޭނާ ވިދާޅުވިއެވެ.
މާރިޔާ ވިދާޅުވީ ސަރުކާރުން މަސައްކަތް ކުރަމުންދަނީ ބޮޑަށް ޕީއެންސީއަށް މެންބަރުން އިތުރު ކުރުމުގެ ބަދަލުގައި އެހެން ސިޔާސީ ޕާޓީތަކަށް ދައުލަތުން ދޫކުރާ ފައިސާ މަދުކޮށް، އިދިކޮޅު ސިޔާސީ ހަރަކާތްތައް ހުއްޓުވާލުމަށް ކަމަށެވެ. އެކަން ހާސިލް ކުރުމަށް ކުރެވެން ހުރި ހުރިހާ މަސައްކަތެއް ސަރުކާރުން ކުރާނެ ކަމަށާއި، އެއީ އަޅުވެތި ކުރުމަށް ސަރުކާރުން ކުރާކަމެއް ކަމަށް މާރިޔާ ވިދާޅުވިއެވެ.
މިސަރުކާރުގެ ކޮރަޕްޝަނަށް އިޝާރާތް ކުރައްވައި މާރިޔާ ވިދާޅުވީ މިސަރުކާރުން ގިނަ މީޑިއާތައް ގަނެފައިވާ ކަމަށާއި، ވަރަށް ބޮޑަށް ކޮންޓްރޯލް ކޮށްފައިވާ ކަމަށެވެ. އަދި މިސަރުކާރުގެ ސިޔާސީ މަގާމުތަކުގައި ތިއްބަވާ ބޭފުޅުން ތިއްބަވަނީ އަބަދުވެސް ސޯޝަލް މީޑިއާގައި ސަރުކާރު ޕްރޮމޯޓްކޮށް ހަގީގަތް ރައްޔިތުންނަށް އޮޅުވާލުމުގެ މަސައްކަތުގައި ކަމަށް މާރިޔާ ވިދާޅުވިއެވެ.
