އޮކްޓޫބަރ 3 ވަނަ ދުވަހު މަގުމައްޗަށް ނުކުންނަނީ ރައީސް މުއިއްޒު ގައުމު ލޫޓުވަމުން ގެންދާތީ ރައްޔިތުން އެދިގެން، އެ ރައްޔިތުންގެ އަޑު އިއްވުމަށް: މާރިޔާ
އޮކްޓޫބަރު މަހުގެ ތިން ވަނަ ދުވަހު އެމްޑީޕީން މަގުމައްޗަށް ނުކުންނަނީ ރައީސް މުއިއްޒު މުޅި ގައުމު ލޫޓުވަމުން ގެންދާ ރައްޔިތުންގެ އަޑު އިއްވުމަށް
ކުރީގެ ޑިފެންސް މިނިސްޓަރ މާރިޔާ: ވިދާޅުވީ އޮކްޓޫބަރު މަހުގެ ތިންވަނަ ދުވަހު ނުކުންނަނީ ރައްޔިތުންގެ ބޭނުންވެގެން އެ ރައްޔިތުންގެ އަޑު މި ސަރުކާރަށް އިއްވުމަށް ކަމަށް
އޮކްޓޫބަރު މަހުގެ ތިން ވަނަ ދުވަހު "ލޫޓުވައިފި ލޫޓުވައިފި" ނަމުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މަގުމައްޗަށް ނުކުންނަނީ ރައީސް ޑރ މުހައްމަދު މުއިއްޒު މުޅި ގައުމު ލޫޓުވަމުން ގެންދާތީ ރައްޔިތުން ބޭނުންވެގެން، އެ ރައްޔިތުންގެ އަޑު އިއްވުމަށް ކަމަށް ކުރީގެ ޑިފެންސް މިނިސްޓަރު އަދި އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ ވިދާޅުވެއްޖެ އެވެ.
މާރިޔާ މިފަދައިން ވިދާޅުވީ އަންނަ މަހުގެ ތިން ވަނަ ދުވަހު އެމްޑީޕީން އިސްނަގައިގެން ބޭއްވުމަށް ތައްޔާރުވަމުން ދާ "ލޫޓުވައިފި ލޫޓުވައިފި" ބޮޑު ހަރަކާތަށް ތައްޔާރުވުމުގެ ގޮތުން އަންގާރަ ދުވަހުގެ ހަވީރު ކުރިޔަށް ގެންދިޔަ ހަރަކާތުގައި ވާހަކަދައްކަވަމުންނެވެ.
މާރިޔާ ވިދާޅުވީ އަންނަ މަހުގެ ތިންވަނަ ދުވަހުގެ ރޭ މި ނުކުންނަނީ ރައީސް މުއިއްޒު މުޅި ގައުމު ލޫޓުވަމުން ގެންދާތީ ރައްޔިތުންގެ އޮތް ކަންބޮޑުވުމުގެ އަޑު އިއްވުމަށްޓަކައި ރައްޔިތުންގެ އެދުމުގެ މަތިން ކަމަށެވެ.
އޭނާ ވިދާޅުވީ ރައީސް މުއިއްޒަށް އެމަނިކުފާނު ބޭނުންވާ ގޮތަށް ކަންކަން ކުރައްވަން ފުރުސަތު ދެވިއްޖެ ކަމަށާއި އެހެން ނަމަވެސް ވެރިކަމަށް ވަޑައިގެންތާ ދެ އަހަރު ވީއިރުގައި ރައްޔިތުންނަށް ކޮށްދެވުނު އެއްވެސް ކަމެއް ނެތް ކަމަށެވެ. އަދި ރައީސް މުއިއްޒު ހަމައެކަނި ކުރެއްވި ކަމަކީ މުޅި ގައުމު ލުޓުވުން ކަމަށް މާރިޔާ ވިދާޅުވި އެވެ.
ރައީސް މުއިއްޒަށް އެމަނިކުފާނު ބޭނުންވާ ކަންކަން ކުރެއްވުމަށް ފުރުސަތު ދީފިން. އެހެން ނަމަވެސް ދެ އަހަރު ވެގެން ދިޔައިރުގައި ގައުމު ލޫޓުވުން ނޫން އެއްވެސް ކަމެއް ނުކުރެއްވުނު. ރައްޔިތުންގެ މަޖިލިސް ލުޓުވާލައިފި. ކޯޓުތައް އަތަސް މަހާލައިފި. މިނިވަން މުއައްސަސާތަށް އަތުލައިގެންފި، ޖަހައިގެންފި، އެ ހުރިހާތަނެއް ވައު ކޮށްލައިފި. ދެން އެ ނުކުމެވަދައިގަތީ މީޑިއާގެ އަނގަ ބަންދުކުރަން. އެއްގޮތަކަސް ވެސް އެ ބޭފުޅާޔާ ނުރުހޭ މީހެއްގެ އަޑު އިއްވިޔަ ނުދިނުމަށްޓަކައިކުރީގެ ޑިފެންސް މިނިސްޓަރު އަދި އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ
ރާއްޖޭގެ ރައްޔިތުން ބޭނުންވަނީ ހުރިހާ ޕާޓީތަކެއް އެކުލެވޭ ވާދަވެރި މަލްޓިޕާޓީ ޑިމޮކްރަސީއެއް ކަމަށް ފާހަގަކުރައްވަމުން މާރިޔާ ވިދާޅުވީ، ދުވަސްވީ މީހުންގެ އެލަވަންސްތަކާއި، ޕެންޝަންތަކާއި، އާސަންދައާއި ހިލޭ ތަޢުލީމު ފަދا ރައްޔިތުންނަށް ފައިދާހުރި ގިނަ ކަންތައްތަކެއް ލިބިފައިވަނީ މަލްޓިޕާޓީ ޑިމޮކްރަސީގެ ތެރެއިން ކަމަށެވެ.
އެހެންނަމަވެސް މިހާރުގެ ރައީސް މުއިއްޒު ރަށްރަށަށް ކުރައްވާ ދަތުރުފުޅުތަކުގައި އޭޓީއެމް މެޝިންތައް ހުޅުއްވުމަށް އިސްކަންދެއްވާއިރު، ގިނަ ރަށްރަށުގެ ކައުންސިލްތަކާ ބައްދަލުނުކުރައްވާ ކަމަށާއި، ނިންމުންތައް ނިންމަވަނީ ޕީއެންސީގެ މެންބަރުންގެ ލަފާގެ މަތިން ކަމަށް މާރިޔާ ފާހަގަކުރެއްވި އެވެ.
