"ރައީސް ސޯލިހް އާއި ރައީސް ނަޝީދު މިތިބީ އެކުގާ މަސައްކަތް ކުރާށެ ވިދާޅުވީމަ އެ މަސައްކަތް އެގޮތަށް ހިނގާނެ": ކުރީގެ ޑިފެންސް މިނިސްޓަރު މާރިޔާ
ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވީ ކުރީގެ ރައީސް ސޯލިހް އާއި ރައީސް ނަޝީދު މަދަރުސީ ދައުރުން ފެށިގެން އެކުގައި ސިޔާސީ މަސައްކަތުގައި އުޅުއްވި ބޭފުޅުންނަށްވާތީ އެ ދެބޭފުޅުން އެކުގައި މަސައްކަތް ކުރައްވާނެ ކަމަށް ވިދާޅުވުމުން އުފާކުރަން ޖެހޭ ކަމަށެވެ. މާރިޔާ ފާހަގަކުރެއްވި ގޮތުގައި ގައުމު މިހާރު އޮތް ދަތި އުނދަގޫ ހާލަތުން އަރައިގަތުމަށް ކުރީގެ ރައީސުން ގުޅިވަޑައިގެން މަސައްކަތް ކުރެއްވުމަކީ މުހިއްމު ކަމެކެވެ.
ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ
ކުރީގެ ރައީސް އިބްރާހިމް މުހައްމަދު ސޯލިހް އާއި ރައީސް ނަޝީދު އަކީ މަދަރުސީ ދައުރުން ފެށިގެން ވެސް އެކުގައި އިސްލާހީ މަސައްކަތް ކުރެއްވި ދެބޭފުޅުން ކަމަށާއި 2023 ގައި ވަކިވި ނަމަވެސް މިހާރު އެ ދެ ބޭފުޅުން އެކުގައި މަސައްކަތް ކުރައްވާނެ ކަމަށް ވިދާޅުވީމާ އެ މަސައްކަތް އެގޮތަށް ހިނގާނެ ކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.
ރާއްޖެ ޓިވީ "ފަލަ ސުރުހީ" ޕްރޮގްރާމު ގައި ވާހަކަ ދައްކަވަމުން މާރިޔާ ވިދާޅުވީ ރައީސް ސޯލިހް އާއި ރައީސް ނަޝީދު އަކީ ފެށުނީއްސުރެ ވެސް އެކުގައި ސިޔާސީ މަސައްކަތުގައި އުޅުއްވި ދެބޭފުޅުން ކަމަށާއި އަދި މަދަރުސީ ދައުރުން ފެށިގެން ވެސް އެކުގައި އުޅެއްވި ބޭފުޅުންނަށްވާއިރު އެ ދެ ބޭފުޅުން ތިބީ އެކުގައި މަސައްކަތް ކުރައްވަންކަމަށް ވިދާޅުވީމަ މެންބަރުން އުފާ ކުރަންޖެހޭ ކަމަށެވެ. އަދި މިދުވަސް ވެގެން ދަނީ ވަރަށް އުންމީދީ ދުވަހެއްގެ ގޮތުގައި ކަމަށް މާރިޔާ ވިދާޅުވި އެވެ.
އެއީ މިދެންނެވީ އެމްޑީޕީ މީހުންނަކީ ހަމަ ނުކުމެ މިކަހަލަ ގައުމަށް ދިމާވާ ބޮޑެތި ގޮންޖެހުމުގަ އެކީގަ މަސައްކަތް ކުރާ ބައެއް. ހަމަ ލީޑަރޝިޕުން ފެށިގެން ހަމަ ހުރިހާ ހިސާބަކަށް، ދެން ހަމަ އެގޮތުން އަޅުގަނޑު ޝުކުރު ދަންނަވަން އަޅުގަނޑުމެންގެ ވަރަށް ފަހުން އިސްތިއުފާ ދެއްވި ޗެއަރޕާސަން ފައްޔާޒް އިސްމާއިލް ވެސް އެބޭފުޅަ ވެސް ސިޔާސީ ބޭފުޅެއް ވީމަ މި އެމްޑީޕީ މީހުން ހާސިލް ކުރަން ބޭނުންވާ މަންޒިލަށް ދެވޭނީ ރައީސް ނަޝިދު ވެސް ރައީސް ސޯލިހް ވެސް ހުރިހާ އެންމެން ޕާޓި ފެށުނީއްސުރެ އެމްޑީޕީ ފިކުރުގަ ތިބި އެންމެން އެކީ ނުކުމެގެން މަސައްކަތް ކޮށްގެން ކަން ދެކެވަޑައިގެން މިކަން ކުރެއްވީމަކުރީގެ ޑިފެންސް މިނިސްޓަރު މާރިޔާ އަހުމަދު ދީދީ
މީގެ އިތުރުން މާރިޔާ ވިދާޅުވީ އުންމީދަކީ ގައުމު މިހާރު މިއޮތް ހާލަތުން އަރައިގަތުމަށްޓަކައި ކުރީގެ ރައީސުން ވެސް ގުޅި ވަޑައިގެން މި މަސައްކަތް ކުރެއްވުން ކަމަށެވެ. މި ގައުމު މިއޮތް ދަތި އުނދަގޫ ހާލަތު ގެ ވާހަކަ ފާހަގަކުރައްވާ މާރިޔާ ވިދާޅުވި ގައުމު ސަލާމަތް ކުރަން ބުރަ މަސައްކަތެއް ކުރަން ޖެހޭ ކަމަށެވެ.
އެމްޑީޕީގެ މައި އޮފީހުގައި ބުދަ ދުވަހު ނޫސްވެރިންގެ ބައްދަލުވުމުގައި ދުވަސްތަކަކަށް ފަހު ދޭބޭފުޅުން އެކުގައި ބޭއްވި ނޫސްވެރިންގެ ބައްދަލުވުމެއްގައި ރައީސް ނަޝީދު އާ ރައީސް ސޯލިހް ވަނީ އެ ދެބޭފުޅުންނަކީ ވެސް ޒަމާންތަކަކަށް ގާތް ދެބޭފުޅުން ކަން ފާހަގަ ކުރައްވާފަ އެވެ.
ރައީސް ނަޝީދު ވިދާޅުވީ ރައީސް ސޯލިހް އަކީ އެއްވެސް އިރެއްގައި އެމަނިކުފާނާ ދުރު ބޭފުޅެއް ނޫން ކަމަށާއި ދެ ބަސްވުންތަކެއްގައި މާގިނަ ދުވަހު ދެ ބޭފުޅުންނަކަށް ނުތިއްބެވޭނެ ކަމަށެވެ. އަދި ދެބޭފުޅުންގެ ދެމެދުގައި ދެމިގެންދާ މައްސަލަ އެއް އޮންނާނެ ކަމަށް ދެކެވަޑައިނުގަންނަވާ ކަމަށް ރައީސް ނަޝީދު ވިދާޅުވި ވާހަކަފުޅަށް ބާރު ދެއްވަމުން ރައީސް ސޯލިހް ވަނީ "ނޯންނާނެ" ކަމަށް ވިދާޅުވެފަ އެވެ.
