ސިއްހީ ނިޒާމު ފެއިލްވެފައިވާ މިންވަރު 2 މިނެޓުން: ގޮހޮރު ފޫދުއްވާލީ ވެސް އިހުމާލުން، ޖަހަން ޖެހޭ އިންޖެކްޝަންގެ ޑޯޒް ވެސް އެސްޓިއޯއިން ގެނެސްދެނީ ނުބައިކޮށް
ބަލިހާލަތުގެ ސަބަބުން ދިފާއީ ނިޒާމު ބަލިކަށިވެ، ކޮންމެހެން ވެސް ޖަހަން ޖެހޭ އިންޖެކްޝަންތަކާ ބޭނުންވާ ބޭސް ހުރި ނަމަވެސް އެ ހޯދަން އާދޭސް ކުރަން ޖެހޭ ކަމަށް އެކުއްޖާ ކިޔައިދީފައި. ކޮންމެ ދެމަހުން ދެމަހުން ޖަހަން ޖެހޭ މި ބޭސްތައް އެސްޓީއޯ ފާމަސީ އަށް ގެނަސްދެވެނީ ތިން މަސް ފަހުން ކަމަށް ވެސް އޭނާ ކިޔައިދިން. ނަމަވެސް މިއީ ކޮންމެހެން ވެސް ދިރިހުރުމަށް ބޭނުންވާ މުހިއްމު ބޭސް ތަކެއް ކަން އެ ޒުވާނާ ހިއްސާ ކުރި.
ހުޅުމާލޭ ފުރަތަމަ ފިޔަވަހީގައި ދިރިއުޅޭ ރައްޔިތެއް ވަނީ ހޯމަ ދުވަހުގެ ރައީސް މުއިއްޒު ބައްދަލުވުމުގައި ސިއްޚީ ނިޒާމު ފެއިލްވެފައިވާ މިންވަރު ކިޔައިދީފައި.
ރާއްޖޭގެ ސިއްހީ ނިޒާމު މިހާރު އޮތް ހާލަތާއި އެސްޓީއޯ ފާމަސީ ފެއިލް ވެފައިވާ މިންވަރު އާންމު ރައްޔިތަކު ހިއްސާ ކޮށްދީފި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިހާރު ކުރިއަށް ގެންދަވާ ސިލްސިލާ ބައްދަލުވުންތަކުގެ ތެރެއިން ހުޅުމާލޭ ފުރަތަމަ ފިޔަވަހީ ގައި ދިރިއުޅޭ ރައްޔިތުންނާ ބައްދަލު ކުރެއްވީ އާދިއްތަ ދުވަހުގެ ރޭ ގަ އެވެ.
އެ ބައްދަލުވުމުގައި ވާހަކަދެއްކި ޒުވާނަކު ވަނީ އެންމެ ދެ މިނެޓުން ރާއްޖޭގެ ސިއްހީ ނިޒާމު މިހާރު ފެއިލް ވެފައިވާ މިންވަރު ހިއްސާ ކޮށްފަ އެވެ.
2017 ވަނަ އަހަރުން ފެށިގެން ގޮހޮރުގެ ބޮޑު ބައްޔެއް ކަމަށް ވާ ކްރޯންސް ބަލި ހުންނަ އެ ކުއްޖާ ވަނީ ވަރަށް ތަފްސީލު ކޮށް އޭނާ ގެ ބަލި ހާލަތު ހިއްސާ ކޮށްފަ އެވެ.
އެގޮތުން 2022 ވަނަ އަހަރު އައިޖީއެމްއެޗް އިން ހެދި ކޮލޮނޮސްކޯޕީ އެއްގެ ސަބަބުން ގޮހޮރު ފޫގޮސް، އެތައް ފަހަރެއްގެ މަތިން ގޮހޮރުގެ ބައެއް ހަށިގަނޑުން ބޭރަށް ލައިގެން އުޅެން ޖެހުނު ހާލު އޭނާ ކިޔައިދިނީ ނުހަނު އަސަރާ އެކުގަ އެވެ.
ބަލިހާލަތުގެ ސަބަބުން ދިފާއީ ނިޒާމު ބަލިކަށިވެ، ކޮންމެހެން ވެސް ޖަހަން ޖެހޭ އިންޖެކްޝަންތަކާ ބޭނުންވާ ބޭސް ހުރި ނަމަވެސް އެ ހޯދަން އާދޭސް ކުރަން ޖެހޭ ކަމަށް އޭނާ ބުންޏެވެ. ކޮންމެ ދެމަހުން ދެމަހުން ޖަހަން ޖެހޭ މި ބޭސްތައް އެސްޓީއޯ ފާމަސީ އަށް ގެނަސްދެވެނީ ތިން މަސް ފަހުން ކަމަށް ވެސް އޭނާ ކިޔައިދިނެވެ. ނަމަވެސް މިއީ ކޮންމެހެން ވެސް ދިރިހުރުމަށް ބޭނުންވާ މުހިއްމު ބޭސް ތަކެއް ކަން އެ ޒުވާނާ ހިއްސާ ކުރި އެވެ.
އާދޭސް ކޮށްގެން، ނޯޓުކޮށްގެން ގެންނަ ބޭސް އެސްޓީއޯ އިން ގެންނައިރު ވެސް ނުބައި ޑޯޒް ގެންނަ ކަމަށް ވެސް އޭނާ ވަނީ ކިޔައިދީފަ އެވެ.
އަޅުގަނޑުގެ ބަލީގެ ގޮތުން އަޅުގަނޑުގެ ދިފާއީ ނިޒާމު ދައްކޮށް ހުންނަނީ. ދައްކޮށް ހުންނާތީވެ އިންޖެކްޝަންތަކެއް ޖަހައިގެން އަޅުގަނޑު އުޅެން ޖެހެނީ. ދެމަހުން ދެމަހުން ބޭސްތައް ވެސް ގެންނަން ޖެހެނީ ބޭރުން. އެސްޓީއޯ ފާމަސީން ކޮންމެ ފަހަރަކު އަޅުގަނޑު. މީ ބޭސް ގެންނަން ވެސް އެހާ އުނދަގޫ. ދެމަހުން ދެމަހުން ގެންނަންޖެހޭ ބޭހެއް. ދެމަހުން ދެމަހުން ޖަހާ ބޭހެއް. ތިންމަހުން މި ބޭފުޅުންނަށް ގެނެވެނީ. މިއަށްވުރެ ފަސޭހަ ގޮތެއް ހައްދަވާ ދެއްވާށޭ.ހުޅުމާލޭ ފުރަތަމަ ފިޔަވަހީގައި ދިރިއުޅޭ ރައްޔިތެއް
އެންމެ ފަހުން ސިއްހީ ހާލަތު ދަށްވެ، ފުރާނައަށް ނުރައްކާވާ ހިސާބަށް ދިއަ ކަމަށާ އިމަރޖެންސީ ގައި އޮޕަރޭޝަން ވެސް ކުރަން ޖެހުނު ކަމަށާ ގޮހޮރުގެ އެއްބައި ބުރިކޮށްލަން ޖެހުނު ކަމަށް ޒުވާނާ ކިޔައިދިނެވެ. ނަމަވެސް އަދިވެސް، އިންޖެކްޝަންތަކާއި ބޭސް ލިބުމުގައި ހުރި އުނދަދޫތަކަށް އެއްވެސް ހައްލެއް ނުލިބޭކަން އޭނާ ހިއްސާ ކުރީ މާޔޫސްކަމާ އެކުގަ އެވެ.
މި ހުރިހާ ކަމެއް ދިމާއިރު ރާއްޖޭގެ ސިއްހީ ނިޒާމު ފެއިލްވެފައިވާ މިންވަރަކީ ރާއްޖެއިން ހެދި އެއްވެސް ސްކޭނަކުން ގޮހޮރުގެ އެއްބައި ވިރިފައި އޮތް ކަން ނުދެއްކުން ނުވަތަ އެ ބެލި ބަޔަކަށް ނޭނގުން ކަމަށް އޭނާ ބުންޏެވެ. އެތައް ފަހަރެއްގެ މަތިން ސްކޭން ހެދި އިރުވެސް މިފަދަ ބޮޑު ކަމެއް ދެނެނުގަނެވުމަކީ ކަންބޮޑުވާ އަދި މި ނިޒާމު ރާއްޖޭގައި އޮތް ހިސާބު ހާމަކޮށްދޭ ކަމެއް ކަން އެ ޒުވާނާ ފާހަގަ ކުރި އެވެ.
އެ ކުއްޖާ އާދޭހާ އެކު އެދުނީ ރާއްޖޭގެ ސިއްހީ ނިޒާމު ހަރުދަނާ ކޮށްދިނުމަށެވެ. ފެއިލް ވެފައިވާ މި ނިޒާމުގެ ސަބަބުން އިތުރުބަޔަކަށް އަނިޔާތަކެއް ނުދީ ނިޒާމަށް ހެޔޮ ބަދަލެއް ގެނެސްދިނުމަށެވެ.
