އީރާނަށް ޖާސޫސް ކޮށްދިން ކަމުގެ ތުހުމަތުގައި އިޒްރޭލު ރައްޔިތަކު އެ ގައުމުގެ އޮފިޝަލުން ހައްޔަރުކޮށްފި

އީރާނަށް ޖާސޫސް ކޮށްދިން ކަމުގެ ތުހުމަތުގައި އިޒްރޭލު ރައްޔިތަކު އެ ގައުމުގެ އޮފިޝަލުން ހައްޔަރުކޮށްފި ކަމަށް ބުނެފި އެވެ.

އިޒްރޭލުގެ ކަމާބެހޭ ފަރާތްތަކުން ބުރާސްފަތި ދުވަހު އިއުލާންކޮށްފައި ވަނީ، އިރާނުގެ އިންޓެލިޖެންސް އެޖެންޓުންގެ އިރުޝާދުގެ ދަށުން ސަލާމަތީ ކުށްތަކެއް ކޮށްފައިވާ ކަމަށް ތުހުމަތުކުރެވޭ އިޒްރޭލުގެ ރައްޔިތަކު ހައްޔަރުކުރި ކަމަށެވެ. މި ކަން މިހެން ހިނގާފައިވާ އިރު، އިޒްރޭލަށް ޖާސޫސް ކޮށްދިން ކަމުގެ ކުށް ސާބިތުވެފައިވާ އީރާނުގެ ރައްޔިތަކު ތެހެރާނުން މީގެ ކުޑަ ދުވަސްކޮޅެއް ކުރިން ވަނީ މަރާލާފަ އެވެ.

2023 ވަނަ އަހަރުގެ އޮކްޓޯބަރު މަހު ޣައްޒާ ހަނގުރާމަ ފެށުނު ފަހުން، އިޒްރޭލުގެ ދުޝްމަން ފަރާތަކަށް ޖާސޫސްކުރިކަމުގެ ކުށުގައި އެ ގައުމުގެ އަމިއްލަ ރައްޔިތުންގެ މައްޗަށް އެތައް ދައުވާ އެއް އިޒްރޭލުން ވަނީ އުފުލާފަ އެވެ.

އެންމެ ފަހުން ހައްޔަރު ކުރި މީހަކީ އުމުރުން 40 ގެ އަހަރުތަކުގައި ވާ މީހެއް ކަމަށާއި އޭނާ މި މަހު ހައްޔަރުކޮށްފައި ވަނީ އިޒްރޭލުގެ ފުލުހުންނާއި، ގައުމީ އިންޓެލިޖެންސް އެޖެންސީ ކަމުގައިވާ ޝިން ބެޓް ގުޅިގެން ހިންގި އޮޕަރޭޝަނެއްގައި ކަމަށް ވަނީ ބުނެފަ އެވެ.

ފުލުހުންނާއި ޝިން ބެޓް ގުޅިގެން ނެރުނު ބަޔާނެއްގައި ވާގޮތުން، "މި ތުހުމަތުކުރެވޭ މީހާ ވަނީ ކުރީގެ ބޮޑުވަޒީރު ނަފްތާލީ ބެނެޓް ދިރިއުޅޭ ގޭގެ ސަރަހައްދުގައި ފޮޓޯ ނަގާފައިވާކަން ދެނެގަނެވިފައެވެ."

އަދި އެ ބަޔާނުގައި އިތުރަށް ބަޔާންކޮށްފައި ވަނީ، "އީރާނުގެ އެޖެންޓުންނާ އޭނާ ހިންގި މުއާމަލާތްތަކުގެ ތެރެއިން، މި މަސައްކަތް ކުރުމަށްޓަކައި ޑޭޝް ކެމެރާ އެއް ގަންނަން އޭނާއަށް އަންގާފައިވެއެވެ."

ބަޔާނުގައިވާ ގޮތުން، މި މީހާ ވަނީ އޭނާ ދިރިއުޅޭ ރަށުންނާއި އެހެނިހެން ތަންތަނުން ނަގާފައިވާ ފޮޓޯތައް އެކި މިންވަރުގެ ފައިސާގެ ބަދަލުގައި އެހެން ފަރާތްތަކަށް ހަވާލުކޮށްފައެވެ.

މިދިޔަ މޭ މަހު އިޒްރޭލުން ވަނީ ޖާސޫސްކުރި ކަމުގެ ތުހުމަތުގައި 18 އަހަރުގެ އިޒްރޭލުގެ ރައްޔިތަކު ހައްޔަރުކުރިކަން އިއުލާންކޮށްފައެވެ.

ދިގު މުއްދަތަކަށް ހަތުރުވެރިންގެ ގޮތުގައި ދެމިތިބި އީރާނާއި އިޒްރޭލުން ވަނީ  ދެ ގައުމުން ވެސް އެއް ގައުމުން އަނެއް ގައުމަށް ޖާސޫސްކުރާ ކަމުގެ ތުހުމަތު ތަކުރާރުކޮށް ކޮށްފައެވެ.

ފާއިތުވި ހަފްތާގައި އިރާނުން ބުނީ، އިޒްރޭލަށް ޖާސޫސްކުރިކަމުގެ ކުށް ސާބިތުވެފައިވާ އީރާނުގެ ރައްޔިތަކު މަރާލާފައިވާ ކަމަށެވެ.