އިސްރާއީލު ސަރުކާރުގެ "ޖަންގަލީ ޤާނޫނު" އާ މުސްލިމު ގައުމުތަކުން ގުޅިގެން ކުރިމަތިލުމަށް އިރާނުގެ ޚާރިޖީ ވަޒީރު ގޮވާލައްވައިފިއެވެ.

އަރަޤްޗީ ވިދާޅުވީ އީރާނުން ހުރިހާ މުސްލިމް ޤައުމުތަކަށް ގޮވާލަނީ އެމެރިކާ އާއި ބައެއް ހުޅަނގުގެ ސަރުކާރުތަކުގެ އެހީތެރިކަމާއެކު އިސްރާއީލު ސަރުކާރުން ތަންފީޒު ކުރަމުންދާ ޖަންގަލީ ޤާނޫނާ ދެކޮޅަށް ހުރިހާ ދާއިރާތަކެއްގައި އެއްބާރުލުން އިތުރުކުރުމަށެވެ.

އަރަބި ޓްވެންޓީވަން ނިއުސް ވެބްސައިޓަށް ދެއްވި އިންޓަވިއުއެއްގައި، އޭނާ މުސްލިމް އަދި ހުޅަނގު އޭޝިއާގެ ޤައުމުތަކަށް ގޮވާލެއްވީ ހަނގުރާމައާއި މަރާއި އަނިޔާ ހުއްޓުވުމަށާއި، ފަލަސްޠީނުގައި އަދި މުޅި ސަރަޙައްދުގައި އިސްރާއީލުގެ ރޭވުންތަކާ ދެކޮޅަށް ވަގުތުން ފިޔަވަޅު އެޅުމަށެވެ.

އިރާނުގެ މިނިސްޓަރު ފާހަގަކުރެއްވީ މިހާތަނަށް ފަލަސްތީނާ ގުޅޭގޮތުން ބޭއްވުނު ގިނަ އަރަބި، އިސްލާމީ އަދި ބައިނަލްއަޤްވާމީ ބައްދަލުވުންތަކުން ނަތީޖާ ނުނެރެވޭކަމެވެ. އޭނާ ވިދާޅުވީ ފަލަސްތީނު ރައްޔިތުންނަށް ހަމައެކަނި ބަސްތަކެއް ބޭނުމެއް ނޫންކަމަށާއި، އޭގެ ބަދަލުގައި ފަލަސްތީނުގެ ރައްޔިތުންނަށް ބޭނުންވާނީ ކާނާ އާއި ބޭހާއި، އެމީހުންނަށް ކުރިމަތިވަމުންދާ އަނިޔާތައް ނިމުމަކަށް ގެނައުން ކަމަށެވެ.

އަރަޤްޗީ ވިދާޅުވީ ގަތަރުގައި ތިބި ފަލަސްތީނުގެ ހަމާސްގެ ސިޔާސީ ލީޑަރޝިޕަށް އިސްރާއީލުން ދާދި ފަހުން ދިން އަނިޔާވެރި ހަމަލާތަކަކީ އިރާނުގެ ސައިންޓިސްޓުންނާއި ސިޔާސީ ވެރިންނާ ދެކޮޅަށް އެ ސަރުކާރުން ދިން އެފަދަ ހަމަލާތަކާއި ޓެރަރިސްޓް ޢަމަލުތައް ހަނދާންކޮށްދޭ ކަމެއް ކަމަށެވެ.

މި ހަމަލާތަކަކީ ވޭތުވެދިޔަ ދެ އަހަރު ތެރޭގައި އިރާން، ލުބުނާން، ފަލަސްތީން، ސީރިއާ އަދި ފަލަސްތީނު އަދި ލުބުނާނުގެ ހިޒްބުﷲ ގެ ލީޑަރުންނާ ދެކޮޅަށް އިސްރާއީލުން ހިންގި ޖަރީމާތަކާ އެއްގޮތް ކަމެއް ކަމަށް އޭނާ ވިދާޅުވިއެވެ.

އިރާނުގެ ފޮރިން މިނިސްޓަރު ވިދާޅުވީ މިފަދަ ޢަމަލުތަކުން ދައްކުވައިދެނީ އިސްރާއީލު ސަރުކާރުން އެއްވެސް ރަތް ރޮނގަކަށް އިޙްތިރާމް ނުކުރާކަމެވެ.

ޖޫން 13 ގައި އިސްރާއީލުން އިރާނާ ދެކޮޅަށް އަމިއްލަ އަށް ހަނގުރާމައެއް ފަށާ، ގިނަ އަދަދެއްގެ އިސް މިލިޓަރީ ކޮމާންޑަރުންނާއި، ނިއުކްލިއަރ ސައިންޓިސްޓުންނާއި، އާންމު ރައްޔިތުން މަރާލިއެވެ.

ސެޕްޓެމްބަރ 9 ގައި އިސްރާއީލުން ދޯހާގައި ހުރި ހަމާސްގެ މައި މަރުކަޒަށް ވައިގެ ހަމަލާތަކެއް ދީ، ހަމާސްގެ ބައެއް މެންބަރުންނާއި ގަތަރުގެ ސެކިއުރިޓީ އޮފިސަރެއްގެ ފުރާނަ ދުއްވާލިއެވެ.

ގަތަރަކީ ހަމާސް އާއި އިސްރާއީލާ ދެމެދު މެދުވެރިއެއްގެ ގޮތުގައި މަސައްކަތްކުރާ މުހިންމު ސަރަޙައްދީ ޤައުމެކެވެ. މި މުހިންމު ދައުރު ގަތަރުން އަދާ ކުރަމުން ގެންދަނިކޮށް އިސްރާއީލުން އަނެއްކާ ވެސް އިސްރާއީލުގެ ބޮޑުވަޒީރު، ބެންޖަމިން ނަތަންޔާހޫ، ސެޕްޓެމްބަރ 10 ގައި ބިރުދެއްކީ ގަތަރުން ހަމާސްގެ މެމްބަރުން "ބޭރުނުކުރާނަމަ" އަނެއްކާވެސް ހަމަލާދޭން ފަސްނުޖެހޭނެ ކަމަށެވެ.

ސީރިއާ ގެ ސަރަހައްދުތަކަށް ހަމަލާދީ އޮކިއުޕައިޑް ގޯލަން ހައިޓްސްގައި ސީރިއާ ބައިބައިކޮށް ސީރިއާގެ ބިންތައް ހިސޯރުކޮށް އިސްރާއީލުން ގެންގުޅޭ އެ ގައުމު ފުޅާ ކުރުމުގެ ސިޔާސަތުގެ ނުރައްކާތެރިކަމުގެ އިންޒާރު އަރަޤްޗީ ދެއްވިއެވެ.