އިސްރާއީލުގެ ނިއުކްލިއަރ ޕްރޮގްރާމް އާ ބެހޭ އެތައް ސިއްރެއް އީރާނުން ފަޅާ އަރުވާލައިފި

އިސްރާއީލުގެ ނިއުކްލިއަރ ހަރަކާތްތަކާ ގުޅުންހުރި ކަމަށް ބުނާ ސިއްރު ލިޔުންތަކާއި ވީޑިއޯ ތައް އިރާނުގެ ސަރުކާރުގެ ޓީވީން ބުދަ ދުވަހު ދައްކައިފިއެވެ.

އިޒްރޭލަކީ ތެހެރާނުގެ ބޮޑު ދުޝްމަނެކެވެ.

އީރާނުން ހޯދި ސިއްރު ލިޔުންތަކާއި ވީޑިއޯ ތަކާ ބެހޭ ގޮތުން އިސްރާއީލުން އަދި އެއްވެސް އެއްޗެއް ބުނެފައެއް ނުވެއެވެ.

އެ ޑޮކިއުމެންޓްރީގައި، އިސްރާއީލުގެ ސައިންސްވެރިން ކަމަށް ބުނާ މީޙުން ޕާސްޕޯޓްގެ ކޮޕީތަކާއި، އަސްކަރީ ސަރަހައްދުތައް ހުރި ތަންތަނުގެ މައުލޫމާތުތައް ދައްކާފައިވެއެވެ.

އަދި އިސްރާއީލުގެ ދެކުނުގައިވާ ޑިމޯނާ ރިއެކްޓަރގެ ތެރޭގައި ނަގާފައިވާ ކަމަށް ބުނާ ވީޑިއޯއެއް ވެސް އެ ޑޮކިއުމެންޓްރީ ގައި ދައްކާފައިވެއެވެ. މި ރިއެކްޓަރަކީ، ރަސްމީކޮށް އިޢުލާންކޮށްފައި ނުވިޔަސް، މެދުއިރުމަތީގައި ނިއުކްލިއަރ ހަތިޔާރު ހުރި ހަމައެކަނި ތަން ކަމަށް ގިނަ ބަޔަކު ގަބޫލުކުރާ ތަނެވެ.

ޑޮކިއުމެންޓްރީ ގައި، އީރާނުގެ ޖާސޫސާ ބެހޭ ވަޒީރު އިސްމާއިލް ޚަޠީބު ވިދާޅުވީ، އިރާނަށް ޖޫން މަހު ލިބުނު މައުލޫމާތު ބޭނުން ކޮށްގެން، އެ މަހު އިސްރާއީލުގެ ތެރޭގައި ހުރި ހައްސާސް ސަރަހައްދުތަކަށް ހަމަލާދީފައިވާ ކަމަށެވެ.

އިރާނުގެ އޮފިޝަލުން މީގެ ކުރިން ބުނެފައި ވަނީ، ހަނގުރާމަ ފެށުމުގެ ކުރިން، ނިއުކްލިއަރ އަދި އަސްކަރީ ސަރަހައްދުތަކުގެ ތަފްޞީލްތައް ވެސް ހިމެނޭ ގޮތަށް، އިސްރާއީލުގެ އެތައް ހާސް ސިއްރު ލިޔެކިޔުންތަކެއް ހޯދާފައިވާ ކަމަށެވެ.

އަދި މިތަކެތި ހޯދީ އިސްރާއީލު މީހުންނަށް މަދު ފައިސާކޮޅެއް ދީގެން ކަމަށް ވެސް އީރާނުން ބުނެފައިވެއެވެ.

މި ޑޮކިއުމެންޓްރީގައި، އިންޓަރނޭޝަނަލް އެޓޮމިކް އެނަރޖީ އެޖެންސީ (އައި.އޭ.އީ.އޭ) ގެ ވެރިޔާ ރަފައެލް ގްރޮސީގެ ފޮޓޯތަކެއް ވެސް ހިމެނެއެވެ.

ޑޮކިއުމެންޓްރީގައި ބުނެފައިވަނީ މި ފޮޓޯތައް ހޯދާފައި ވަނީ އިސްރާއީލުން ކަމަށެވެ.

ޖޫން މަހު އިސްރާއީލުން އިރާނަށް ދިން ކުއްލި ހަމަލާއާއެކު 12 ދުވަހުގެ ހަނގުރާމައެއް ފެށުނު ފަހުން، އިރާނުގެ ސިޔާސީ ވެރިން ވަނީ އައި.އޭ.އީ.އޭ. އާއި އެ އެޖެންސީގެ ޑިރެކްޓަރަށް ފާޅުގައި އަމާޒުކޮށް، އެ ދެ ފަރާތުން ބައެއް ކަންކަމުގައި އިސްރާއީލްއާ ބައިވެރިވެފައިވާ ކަމަށް ތުހުމަތު ކޮށްފައެވެ.

އިސްރާއީލުން އަދި، ފަހުން އެމެރިކާ އިން، އިރާނުގެ ނިއުކްލިއަރ މަރުކަޒުތަކަށް ދިން ހަމަލާތައް ކުށްވެރިނުކުރުމުން، ތެހެރާނުން ވަނީ އެ އެޖެންސީ އަށް ފާޑުކިޔާފައެވެ.

މި ޑޮކިއުމެންޓްރީ ދެއްކީ، އިސްލާމިކް ރިޕަބްލިކްގެ ނިއުކްލިއަރ ހަރަކާތްތަކާ މެދު އިރާނާއި ހުޅަނގުގެ ގައުމުތަކާ ދެމެދު އަނެއްކާ ވެސް ހޫނު ބަހުސެެއް ހިނގަމުންދާ ދަނޑިވަޅެއްގައެވެ.

އެމެރިކާ އާއި އިސްރާއީލް އާއި ހުޅަނގުގެ ގައުމުތަކުން ތުހުމަތު ކުރަނީ އިރާނުން ނިއުކްލިއަރ ހަތިޔާރު ހޯދަން މަސައްކަތްކުރާ ކަމަށެވެ. ނަމަވެސް ތެހެރާނުން ވަނީ މި ދަޢުވާތައް ވަރަށް ބޮޑަށް ދޮގުކޮށް، އެ ގައުމުގެ އެޓޮމިކް ޕްރޮގްރާމަކީ ހަމައެކަނި މަދަނީ ބޭނުންތަކަށް ހިންގާ ޕްރޮގްރާމެއް ކަމަށް ބުނެފައެވެ.

އިސްރާއީލުން އީރާނުގެ ނިއުކްލިއަރ ޕްރޮގްރާމަކީ އެ ގައުމު ދެމިއޮތުމަށް އޮތް ބިރެއްގެ ގޮތުގައި ދެކެއެވެ.

އިރާނާއި އިސްރާއީލްއާ ދެމެދު ޖާސޫސު ކުރުމުގެ ބޮޑު ހަނގުރާމައެއް ހިނގަމުން އަންނަތާ އެތައް އަހަރެއްވެއްޖެއެވެ. އަދި ދެ ގައުމުން ވެސް ޖާސޫސް ކުރި ކަމުގެ ތުހުމަތުގައި އެތައް ބަޔަކު ހައްޔަރު ކޮށް ބޮޑެތި އަދަބުތައްވެސް އަންނަނީ ދެމުންނެވެ.