ބޭރުގެ ދުޝްމަނުން އީރާނުގެ އެންމެ މަތީ ވެރިޔާ ޢަލީ ޚާމަނައީ އަވަހާރަ ކޮށްލަން މަސައްކަތް ކުރާ ކަމަށް އީރާނުގެ އިންޓެލިޖެންސް މިނިސްޓަރ ވިދާޅުވެއްޖެ

އެމެރިކާ އާއި އިސްރާއީލު ހިމެނޭހެން ބޭރުގެ ދުޝްމަނުން، އީރާނުގެ އެންމެ މަތީ ވެރިޔާ ޢަލީ ޚާމަނައީ އަވަހާރަ ކޮށްލަން މަސައްކަތް ކުރާ ކަމަށް އީރާނުގެ އިންޓެލިޖެންސް މިނިސްޓްރީން ބުނެފި އެވެ.

މިއީ އީރާނުގެ ހަމަޖެހުން ނަގާލުމަށް ކުރަމުންދާ މަސައްކަތެއް ކަމަށް ވެސް މިނިސްޓްރީން ބުންޏެވެ.

އީރާނުގެ އައި.އެސް.އެން.އޭ ނޫސް އެޖެންސީން ހޮނިހިރު ދުވަހު ރިޕޯޓުކޮށްފައިވާ ގޮތުގައި، އިންޓެލިޖެންސް މިނިސްޓަރު އިސްމާޢީލް ޚަތީބް ވިދާޅުވީ "ދުޝްމަނުން މަސައްކަތް ކުރަނީ އެންމެ މަތީ ވެރިޔާ އަވަހާރަކޮށްލުމަށް،" ކަމަށެވެ.

މިނިސްޓަރު އިޝާރާތް ކުރެއްވީ ކޮން ހާދިސާ އަކަށް ކަން ސާފު ނުވި ނަމަވެސް، އީރާނުގެ އޮފިޝަލުން ގިނަ ފަހަރަށް ބޭރުގެ ރޭވުންތަކުގެ ވާހަކަ މީގެ ކުރިން ވެސް ހާމަ ކުރާކަން ފާހަގަ ކުރެވެއެވެ. ޖޫން މަހު އިސްރާއީލާއި އީރާނާ ދެމެދު ހިނގި 12 ދުވަހުގެ ހަނގުރާމައިގެ ކުރިން ޚާމަނައީގެ ފުރާނަފުޅަށް ހުރި ނުރައްކާތަކާ ގުޅޭގޮތުން ވެސް އީރާނުގެ އިސް އޮފިޝަލުން ވަނީ ވާހަކަ ދައްކާފަ އެވެ.

"މިކަން މިގޮތަށް ކުރާ މީހުންނަކީ، އެނގިގެން ނުވަތަ ނޭނގި ނަމަވެސް، ދުޝްމަނުންގެ އެޖެންޓުން،" ޚަތީބް ވިދާޅުވިއެވެ. އޭނާ ވަނީ ސީދާ އިސްރާއީލާއި އެމެރިކާ އަށް އިޝާރާތް ކުރައްވާފައެވެ.

މި އަހަރުގެ ކުރީކޮޅު ހިނގި ހަނގުރާމައިގެ ތެރޭގައި އިސްރާއީލުން ވަނީ އީރާނުގެ އަސްކަރިއްޔާގެ އިސް އޮފިޝަލުންނާއި، ނިއުކްލިއާ ސައިންސްވެރިންނާއި، ނިއުކްލިއާ ސައިޓުތަކުގެ އިތުރުން މީހުން ދިރިއުޅޭ ސަރަޙައްދުތަކަށްވެސް އަމާޒުކޮށް ހަމަލާ ދީފަ އެވެ. އަދި އޭގެ ފަހުން އެމެރިކާ އިން ވަނީ މުހިންމު ނިއުކްލިއާ ފެސިލިޓީތަކަށް ހަމަލާދީފައެވެ.

އީރާނާއި އިސްރާއީލާ ދެމެދު ހަމަނުޖެހުން އިތުރަށް ބޮޑުވެދާނެ ކަމުގެ ކަންބޮޑުވުމާ ހެދި އެންމެ މަތީ ވެރިޔާ އަވަހާރަކޮށްލުމަށް އިސްރާއީލުން ހުށަހެޅި ޕްލޭނެއް އެމެރިކާގެ ރައީސް ޑޮނަލްޑް ޓްރަމްޕް ވީޓޯ ކުރެއްވި ކަމަށް ހަނގުރާމައިގެ ތެރޭގައި ދެކެވުނު ވާހަކަތަކާ ގުޅޭގޮތުން ސުވާލު ކުރުމުން، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އެކަން ދޮގު ކުރި ނަމަވެސް، އެ ފިޔަވަޅުގެ ސަބަބުން "ހަނގުރާމަ ނިމުމަކަށް އަންނާނެ" ކަމަށް އޭނާ އޭރު އޮތީ ވިދާޅުވެފައެވެ.

އެކަމާ ގުޅިގެން ޓްރަމްޕް ވެސް ވިދާޅުވެފައި ވަނީ އީރާނުގެ އެންމެ މަތީ ވެރިޔާއަކީ "ވަރަށް ފަސޭހަ އަމާޒެއް" ކަމަށާއި އަދި މިވަގުތައް އޭނާ އަވަހާރަ ނުކޮށްލާނެ ކަމަށެވެ.

ޢުމުރުފުޅުން 86 އަހަރުގެ ޚާމަނައީ އަކީ 1989 ވަނަ އަހަރުން ފެށިގެން އީރާނުގެ އެންމެ މަތީ ވެރިޔާއެވެ. އަދި ޤައުމުގެ ހުރިހާ ކަމެއްގައި ވެސް އެންމެ ފަހު ބަސް ވިދާޅުވުން އޮންނަނީ އޭނާއަށެވެ.

މި މަހުގެ ކުރީކޮޅު އީރާނުގެ ރައީސް މަސްޢޫދު ޕެޒިޝްކިއާން ވިދާޅުވެފައި ވަނީ، ހަނގުރާމައިގެ ދުވަސްވަރު ޚާމަނައީ ގެ ފުރާނަފުޅާ މެދު ވަކިން ޚާއްޞަކޮށް ކަންބޮޑުވެވަޑައިގެންނެވި ކަމަށާއި، އޭނާ ނެތިއްޖެ ނަމަ ޤައުމުގެ މުއައްސަސާތައް "އެއްބަޔަކު އަނެއްބަޔަކާ ހަނގުރާމަ ކުރަން ފަށައިފާނެ" ކަމުގެ ބިރު ހީވި ކަމަށެވެ.