ގޯސްވަނީ ސޯޝަލް ހައުސިން ފްލެޓްތައް ބިދޭސީންނަށް ދިނުމުން އެކަނި؟ އެޗްޑީސީ އަށް ވެސް އޮޅިއްޖެ!
26 ޑިސެމްބަރު 2025 | ހުކުރު 14:55ހުޅުމާލެ އިން ދޫކޮށްފައިވާ ސޯޝަލް ހައުސިންގ ޔުނިޓުތައް ބިދޭސީންނަށް ކުއްޔަށް ދީފައިވޭތޯ ބަލައި ފިޔަވަޅު އެޅުމާގުޅޭ އުސޫލެއް އެޗްޑީސީ އިން ހާމަ ކުރި އިރު އެ ތަނަކީ ސޯސަލް ހައުސިންގ އެއްވެސް ޔުނިޓަކީ ދޭސީއަކަސް ބިދޭސީއަކަށްވެސް ކުއްޔަށްދެވޭނެ ތަނެއް ނޫންކަން އެޗްޑީސީ އަށް ނޭނގުނެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)
ހުޅުމާލެ އިން ދޫކޮށްފައިވާ ސޯޝަލް ހައުސިންގ ޔުނިޓުތައް ބިދޭސީންނަށް ކުއްޔަށް ދީފައިވޭތޯ ބަލައި ފިޔަވަޅު އެޅުމާގުޅޭ އުސޫލެއް އެޗްޑީސީ އިން ހާމަ ކުރީ ބުދަ ދުވަހު އެވެ. ހުޅުމާލޭގައި ތަރައްޤީކޮށް ދޫކޮށްފައިވާ ސޯޝަލް ހައުސިން ޔުނިޓުތައް ޤަވާއިދާއި ޚިލާފަށް ބިދޭސީންނަށް ދެމުންދާކަން އެ ކޯޕަރޭޝަނަށް ފާހަގަކުރެވިފައިވާ ކަމަށް ބުނެ އެ ކޯޕަރޭޝަނުން މި ވަނީ ބައެއް ކަންކަން އާއްމުން ގެ ސަމާލު ކަމަށް ގެނެސްފަ އެވެ.
އޭގައިވާ ކަންކަމަށް ބަލާލާނަމެވެ. ސޯޝަލް ހައުސިން ޔުނިޓުތަކު ގެ ތެރެއިން އެއްވެސް ޔުނިޓެއް އެއްވެސް ފަރާތަކުން ބިދޭސީންނަށް ކުއްޔަށް ދޫކޮށްފައިވާ ނަމަ 3 ޖެނުއަރީ 2026 ގެ ކުރިން އެތަންތަން ހުސްކުރުމަށް އެ ފަރާތްތަކަށް އަންގަން ވާނެ ކަމަށް އެ ކޯޕަރޭޝަނުން މިވަނީ ބުނެފަ އެވެ. އަދި އެ ކޯޕަރޭޝަނާއި އެކު ވެފައިވާ އެއްބަސްވުމާއި އެއްގޮތަށް އަމަލުކުރުމަށް އާއްމުންނަށް މި ވަނީ އަންގާފަ އެވެ.
އަދި 3 ޖެނުއަރީ 2026 ގެ ފަހުން ހުޅުމާލެ އިން ދޫކޮށްފައިވާ އެއްވެސް ސޯޝަލް ހައުސިން ޔުނިޓެއް ބިދޭސީންނަށް ކުއްޔަށް ދީފައި ވާ ނަމަ، އެ ކޯޕަރޭޝަނާއި އެކު ވެފައިވާ ފްލެޓް އެއްބަސްވުން އުވާލާނެ ކަމުގެ އިންޒާރު ވެސް އެ ކޯޕަރޭޝަނުން ދީފައިވެ އެވެ.
ހެއްވާކަމަކީ ހުޅުމާލެ އިން ދޫކޮށްފައިވާ ސޯޝަލް ހައުސިންގ ޔުނިޓުތައް ބިދޭސީންނަށް ކުއްޔަށް ދީފައިވޭތޯ ބަލައި ފިޔަވަޅު އެޅުމާގުޅޭ އުސޫލެއް އެޗްޑީސީ އިން ހާމަ ކުރި އިރު އެ ތަނަކީ ސޯސަލް ހައުސިންގ އެއްވެސް ޔުނިޓަކީ ދޭސީއަކަސް ބިދޭސީއަކަށްވެސް ކުއްޔަށްދެވޭނެ ތަނެއް ނޫންކަން އެޗްޑީސީ އަށް ނޭނގުނެވެ.
މިކަން މިހެން އެންގުމުން އާއްމުން ގެ ކުރިމަތީގައި ވެސް އެޗްޑީސީ ވަނީ ބޮޑު ޖޯކަކަށެވެ. އެހެން ނުވާންވީ ސަބަބެއް ނެތެވެ. ބިދޭސީންނަށް ސޯޝަލް ހައުސިން ކުއްޔަށް ނުދޭން އަންގާ އުސޫލެއް ނެރުނު އިރު އެޗްޑީސީން އެކުލަވާލި އެއްބަސްވުމުގައި އެއްވެސް ބަޔަކަށް އެތަން ކުއްޔަށް ދެވޭނެ މަގު ފަހިވެފައި ނެތްކަން ނޭނގުނީތޯ އާއްމުން ދަނީ ސުވާލު އުފައްދަމުންނެވެ. މީސްމީޑިއާގައި އާއްމުން ބަންޑުން ކުރި ޝުއޫރުތަކުން އެކަން ވަރަށް ބޮޑަށް ސާފު ވެ އެވެ.
"ތިބޭފުޅުން އަމިއްލައަށް ހެދި އެގްރިމަންޓާ ޚިލާފު އިއުލާނެއް ކުރަން ހިތަށް އެރީތީ ތަނުގެ ފެންވަރާއި މުސާރަ ހަލާލު މިންވަރު ވަޒަންކުރެވިއްޖެ އެވެ. އެހެނީ، ސޯސަލް ހައުސިންގ އެއްވެސް ޔުނިޓަކީ ދޭސީއަކަސް ބިދޭސީއަކަށްވެސް ކުއްޔަށްދެވޭނެ ތަނެއް ނޫނެވެ. އެހެންވީމާ، މިކަމުގެ މަޤްޞަދާމެދު" މިއީ އާއްމު މީހަކު މީސްމީޑިއާގައި ލިޔުނު މެސެޖެކެވެ.
އެއީ ތެދެކެވެ. އެތައް ބަޔަކު ރީޗެކްކުރުމަށް ފަހު ސަރުކާރު ހިއްސާވާ ކުންފުންޏަކުން ބޮޑު އުސޫލެއް ނެރުނު އިރު އެކަމުގެ ވާނުވާ ވެސް އޮޅުންފިލާފައި ހުރި ހެނެއް ނުވެ އެވެ. މިކަހަލަ ދެކޮޅު ނުޖެހޭ ކަންކަން ކުރުމުން ވެއްޓެނީ ކުންފުނީ ގެ އަގެވެ. އަދި މިފަދަ އުސޫލުތައް ނެރުނު ނަމަވެސް ތަންފީޒު ކުރުމުގައި ފަހަތުފަޔަށް ބުރަވާކަން އާއްމުން ވަނީ ފާހަގަކޮށްފަ އެވެ.
"އަބަދުވެސް ބަލަނީ! ބަލަބަލާ ތިބެނީ އެއްވެސް ކަމެއް ނުވޭ!" މިއީ އިތުރު އާއްމު މީހެއް ގެ މެސެޖެވެ.
ދެން އޮތްކަމަކީ ބިދޭސީންނާއި މެދު ގެންގުޅޭ ތަފާތުކުރުންތަކުގެ ވާހަކަ އެވެ. އެއްވެސް މީހަކަށް ކުއްޔަށް ދިނުމުގެ ހުއްދަ ނެތް ތަނެއް ބިދޭސީ އަކަށް ކުއްޔަށް ދިނުމުން އިތުރަށް ކުށްވެރިވާ އުސޫލެއް އޮވެގެން ނުވާނެ އެވެ. އެކަން ވާނީ ނަސްލީ ތަފާތު ކުރުމަށެވެ.
އެކަމަކު މިއީ ވިސްނާލުން މުހިންމު ކަމެކެވެ. ގޯސްވަނީ ސޯޝަލް ހައުސިން ފްލެޓްތައް ބިދޭސީންނަށް ދިނުމުން އެކަނިތޯއެވެ؟ އެޗްޑީސީ އަށް ވެސް އެކަން އޮޅިއްޖެ އެވެ. ވާނީ ވެސް އެހެންތާ އެވެ. ތަންތަނުގައި ތިބި ދުވަސްވީ މުވައްޒަފުންނާއި އިދާރީ އޮނިގަނޑާއި ތަނުގެ ހިންގުން އެނގޭ މީހުން އެއް ފަރާތްކޮށްގެން ސިޔާސީ މުވައްޒަފުން ގެ ބާރުގައި ހިންގާ ސަރުކާރަކަށް މި ނޫން ވަރެއް ހަމަ ނުވާނެ އެވެ. އުސޫލެއް ހެދިޔަސް، ބަޔާނެއް ނެރުނަސް ފަޟީހަތް ނުވާނެ ގޮތަކަށް ކަމެއް ކުރެވޭތަނެއް ނާދެ އެވެ.
