ހުޅުމާލެއަށް ދިމާވެގެން އުޅޭ އެންމެ ބޮޑު މައްސަލައަކީ ބެލެނިވެރި ފަރާތް ސާފުނުވުން ކަމަށާއި ހުޅުމާލެ އެޗްޑީސީގެ ބެލުމުގެ ދަށުގައި އޮތުމުން ފަޅު މެނޭޖްކުރާނެ ބައެއް ނެތް ކަމަށް ޝަމްހީދު ވިދާޅުވި.
ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެމްބަރު، ޑރ. އަޙްމަދު ޝަމްހީދު ފަލަ ސުރުހީ ޕްރޮގްރާމްގައި ވާހަކަދައްކަވަނީ
ސިޔާސަތެއް އޮތް ނަމަ އެޗްޑީސީގެ ޚަރަދު ހަމަޖައްސަން 1 ބިލިއަން ރުފިޔާ ބަޖެޓުން ބޭރުން ދޭކަށް ނުޖެހުނީސް ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެމްބަރު، ޑރ. އަޙްމަދު ޝަމްހީދު ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުންނެވެ.
ދާދިފަހުން ރައީސް ޑރ.މުހައްމަދު މުއިއްޒު ވަނީ އެޗްޑީސީ އާއި ގުޅުން ހުރި ކަންކަން ވެސް ނިންމަވަނީ ވަރަށް ރަނގަޅަށް ކަންކަން ބެލުމަށް ފަހު، ރަނގަޅަށް ހިސާބުޖައްސަވައިގެން ކަމަށް ވިދާޅުވެފަ އެވެ. އެކަމަށް އިޝާރާތްކުރައްވާ ޝަމްހީދު ވިދާޅުވީ ރައީސް އެހެން ވިދާޅުވި ނަމަވެސް ހަގީގަތަކީ އެއީ ނޫން ކަމަށެވެ. ސަރުކާރަށް ފްލެޓްތައް އަގުހެޔޮ ކުރުމުން އެޗްޑީސީ އަށް ލިބޭ ގެއްލުން ރޭކާލީ މާ ފަހުން ކަަމަށް އޭނާ ވިދާޅުވިއެވެ.
"އާ ފްލެޓްތައް އަޅަން ހުރި ފައިސާ މި ދެނީ އަގު ހެޔޮކުރުމުން ލިބުނު ގެއްލުން ފޫބައްދާ ދޭން. އެހެންވީމަ އާ ފްލެޓެއް ނޭޅުނު ރައްޔިތުންނަކަށް މި އަހަރު ނިމުނު އިރު. ބަޖެޓު ނެތުނީމަ އެއް ނޫން އެނގޭނީ ކަންކަން ރާވާ ނަމަ ބޭނުންވާ ވަރަށް ފައިސާ ނެތްކަން" ޝަމްހީދު ވިދާޅުވި އެވެ.
ހުޅުމާލެ އަށް ދިމާވެގެން އުޅޭ އެންމެ ބޮޑު މައްސަލަ އަކީ ހުޅުމާލޭގެ ބެލެނިވެރި ފަރާތް ސާފު ނުވުން ކަމަށް އޭނާ ވިދާޅުވި އެވެ. އެތަނުގެ ވަށައިގެން އޮތް ކަނޑުގެ އިހްތިޞާސް އޮތީ އެޗްޑީސީގެ ބެލުމުގެ ދަށުގައި ކަމަށް ވެސް ޝަމްހީދު ވިދާޅުވި އެވެ. އެހެން އެކަން އޮތުމުން ހުޅުމާލެ ފަޅު މެނޭޖް ކުރާނެ ބައެއް ނެތް ކަމަށް އޭނާ ވަނީ ފާހަގަކުރައްވާފަ އެވެ. ހުޅުމާލެ އަކީ ކުންފުންޏެއްގެ ބެލުމުގެ ދަށުގައި އޮތް ތަނަކަށް ވެގެން ނުވާނެ ކަމަށް އޭނާ ވިދާޅުވި އެވެ.
"އެޗްޑީސީގެ ތަންތަކީ ރިއަލް އެސްޓޭޓް އުސޫލުން ހުރި ތަންތަން. ހުޅުމާލެ މަގުތަކަކީ އެޗްޑީސީ ބިމަށް ވެގެން ނުވާނެ. ޕާކާއި ފަޅަކީ އެޗްޑީސީ ތަންތަނަށް ވެގެން ނުވާނެ." ޑރ.ޝަމްހީދު ވިދާޅުވި އެވެ.
އެޗްޑީސީ އަށް ބޮޑު ގެއްލުމެއް ވެފައި ވަނިކޮށް އެޗްޑީސީ މުވައްޒަފުންނަށް ބޯނަސްގެ ގޮތުގައި 18،600ރ. ދޭން މި ހަފްތާގައި ވަނީ ފަށާފަ އެވެ.
