ނައިޖީރިއާގެ "ދަ އިންކްރެޑިބަލް ކިޑްސް" ނަށަނީ ދިރިއުޅުން ބަދަލުކުރަން

އިންޓަނެޓުގެ ޒަރީއާއިން އެތައް ބަޔަކު ދުނިޔޭގެ މަގުބޫލުކަން ހޯދަމުން އަންނައިރު އެކަހަލަ ކަމެއް ވެދާނެ ކަމަށް ނައިޖީރިއާއަށް އުފަން ޖޮޝުއާ އަނުމް ދުވަހަކު ވެސް އުއްމީދެއް ނުކުރެއެވެ. ބައްޕަ ދޫކޮށްލާފައި ދިއުމުން އަނުމް އޭނާގެ ނުވަ ބެއިންނާއި މަންމައާއެކު ދިރިއުޅެމުން އައީ ވަރަށް ދަތި ހާލުގައެވެ. ގިނަ ފަހަރު ކާނެ އެއްޗެއް ވެސް ލިބެނީ ނަސީބުންނެވެ.

އަނުމްގެ އުމުރުން 15 އަހަރުވެފައިވާއިރު އޭނާ ކުޑައިރު ދިމާވި ހާދިސާއެއްގެ ސަބަބުން ވައަތް ބުރިކޮށްލަން ޖެހުނެވެ. ނަމަވެސް އޭގެ ސަބަބުން އޭނާ ފަހަތަކަށް ނުޖެހެއެވެ. އޭނާއަކީ އިންސްޓަގްރާމުގައި ދުވަހަކަށްފަހު ދުވަހެއް ފޮލޯވަރުން އިތުރުވަމުން އަންނަ ނަށާ ގްރޫޕެއް ކަމަށްވާ "ދަ އިންކްރެޑިބަލް ކިޑްސް" ގެ ހިއްސާއެކެވެ.

"ދަ އިންކްރެޑިބަލް ކިޑްސް" ގެ އެންމެ މަޝްހޫރު އެއް ވީޑިއޯގައި ފެންނަނީ ވަރަށް ހިކިކޮށް ތިބި ހަ ކުދިން ނަށާ މަންޒަރެވެ. އެ ވީޑިއޯއަށް މިހާތަނަށް 55،000 އަށްވުރެ ގިނަ ވިއުސް ވަނީ ލިބިފައެވެ.

މި ގްރޫޕްގައި އިސްކޮށް ހަރަކާތްތެރިވަނީ އެންމެ ފަސް އަހަރުގެ އިމެނުއެލާ މައިކާ އެވެ. އެ ގްރޫޕުގެ ވީޑިއޯތަކުގައި ނައިޖީރިއާގެ މަޝްހޫރު ލަވަތަކަށް ތަފާތު ގޮތްތަކަށް ނަށައެވެ. އެ ގްރޫޕުގެ ނެށުމުގައި ގެންގުޅޭ ހަރަކާތްތަކުގެ ސަބަބުން ގިނަ ބަޔަކަށް އެ ގްރޫޕް ކަމުދެއެވެ.

މި ގްރޫޕުގައި ހިމެނޭ ހުރިހާ ކުދިން ވެސް ދިރިއުޅެނީ ނައިޖީރިއާގެ އަބޫޖާ ސަރަހައްދުގައި މަލިކީ އިމެނުއެލް ކައިރީގައެވެ. އޭނާއަކީ ވެސް ނެށުންތެރިއެކެވެ. އަދި "ދަ އިންކްރެޑިބަލް ކިޑްސް" ގެ ފައުންޑަރ އެވެ.

އޭނާގެ ފަރާތުން ނަށަން ދަސް ކުރާ ގިނަ ކުދިންނަކީ އަނުމް ގޮތަށް ދަތި ހާލަތުގައި ދިރިއުޅޭ އާއިލާތަކުގެ ކުދިންނެވެ. އެ ކުދިންނަށް އޭނާގެ ގެއަކީ ރެފިއުޖީ ކޭމްޕެއް ފަދަ ތަނެކެވެ.

އިމެނުއެލް އެ ކުދިންނަށް ހަރަދުކޮށް ހަދަނީ ކުރަހައިގެންނެވެ. އޭނާގެ ކުރެހުންތައް ވިއްކައިގެން ލިބޭ ލާރިން ސްކޫލް ފީ ދައްކައި އެހެން ބައެއް ޒަރޫރީ ކަންކަން ފުރިހަމަ ކޮށްދެއެވެ.

ޑޯން ޖެޒީ އަކީ ނައިޖީރިއާގެ މިޔުޒިކް ޕްރޮޑިއުސަރެކެވެ. އޭނާ އެދުވަހު ދިން ހަދިޔާއާއެކު "ދަ އިންކްރެޑިބަލް ކިޑްސް" މަޝްހޫރުވާން ފެށިއެވެ. އެއާއެކު ތަފާތު އިވެންޓުތަކުގައި ނަށަން އެ ގްރޫޕަށް ދައުވަތުވެސް ލިބެން ފެށިއެވެ.

ޖޯޝުއާ އަނުމްގެ މަންމަ ވީރާ އަނޫ ބުނީ އޭނާގެ އުމުރުން ފަސް އަހަރުގައި އަނބުގަހަކުން ވެއްޓި ދިމާވި ހާދިސާއެއްގެ ސަބަބުން އޭނާގެ އަތް ބުރިކޮށްލަން ޖެހުމުން ވަރަށް ދެރަވި ކަމަށެވެ. އެއް އަތް ނެތުމުން އޭނާއަށް ދިރިއުޅުމުގައި ކުރެވޭނެ ކަމެއް ނޯންނާނެ ކަމަށް ބުނެ މީހުން ވާހަކަ ދައްކާތީ ދެރަވި ކަމަށް ވެސް އޭނާ ބުންޏެވެ.

އަނުމްގެ މަންމައަށް އޭނާގެ ސްކޫލަށް ފީ ދައްކާނެ ލާރިއެއްވެސް ނުލިބެއެވެ. ނަމަވެސް ނަށައިގެން ލިބޭ ލާރިން މިހާރު އެކަން ވެސް ކުރެވޭތީ އުފާވާ ކަމަށް އޭނާ ބުންޏެވެ.

ނެށުމުގެ އިތުރުން ސްކޫލުން އައިސް މި ކުދިންތައް ކުޅުމުގައި ވަގުތު ހޭދަ ކުރެއެވެ. އެ ވަގުތަކީ އެކުދިންގެ ކޯޗު އިމެނުއެލް އަށް ކުރެހުމަށް ލިބޭ ވަގުތެވެ.

އެ ގްރޫޕް އެންމެ ބޮޑަށް ވިދާލާފައިވަނީ އަބުޖާ އާއި ލާގޯސްގައެވެ. ދުވަހަކަށްފަހު ދުވަހެއް އެ ގްރޫޕުގެ މަގުބޫލުކަން އިތުރުވަމުން އަންނައިރު އުއްމީދަކީ ނަންބަރުތައް އިތުރުވުން ކަމަށް އިމެނުއެލް ބުންޏެވެ.

އިމެނުއެލް ބުނި ގޮތުގައި އެފަދަ ކުދިންނާ އޭނާ ބޮޑަށް ގުޅެނީ އެއީ އޭނާވެސް ބޮޑުވެގެން އައި ހާލު ކަމަށް ވާތީ ކަމަށެވެ. އޭނާ ވެސް ބޮޑުވެގެން އައީ ފަގީރު ހާލުގައި ކަމަށާއި ޖެހިގެން އަންނަ ދުވަހު ކާނެ އެއްޗެއް ލިބޭނެ ކަމުގެ ޔަގީންކަމެއް ނޯންނަ ކަމަށް އޭނާ ބުންޏެވެ.