ހުޅަނގު އެފްރިކާ ހިސާބު މީހުންނަކީ އަބަދުވެސް ތަފާތު ކަންކަން ކުރަމުން އަންނަ ބަޔެކެވެ. އެކި ހުނަރުތައް ދައްކަމުން އަންނަ އިރު މިފަހަރު ވެސް ތަފާތު ކަމެއް ވަނީ ދައްކާލާފައެވެ. ހުޅަނގު އެފްރިކާގެ ގައުމެއް ކަމަށްވާ ނައިޖީރިއާގެ ލޭގޯސްގައި ވަނީ ކޮމިކް ތީމްތައް ހިމަނައިގެން ސްކެޗް ނުވަތަ ކުރަހައިގެން އެތެރެ ޑިޒައިންކޮށްފައިވާ ރެސްޓޯރެންޓެއް ހުޅުވާފައެވެ.

ރެސްޓޯރެންޓުގެ އެތެރެއަށް ވަނުމުން އިހުސާސް ކުރެވޭނީ ކުލަޖައްސާ ފޮތެއްގެ ތެރެއަށް ވަދެވޭ ހެންނެވެ. އަދި އެތަން ފަރުމާ ކޮށްފައިވަނީ އެތަނަށް ކެއުމަށް ދާ ފަރާތްތަކުން ކްރެޔޯން ކުލަ ހިފައިގެން ދާން ބޭނުންވާ ކަހަލަ ގޮތަކަށެވެ.

ލޭގޯސްގެ މެދުގައި ހުޅުވި ސްކެޗް ރެސްޓޯރެންޓް ހުޅުވީ މީގެ ދެމަހެއްހާދުވަސް ކުރިންނެވެ.

އެ ރެސްޓޯރެންޓުގެ މެނޭޖަރ މިހައިދިން ސިބިލިނި ބުނީ އެތަނުގެ ކޮންސެޕްޓް ހެދުމަށް ހިޔާލު އައީ ތަފާތު ގޮތަކަށް ކަމަށާއި، ބޭނުންވީ ކެއުމާއި އާޓަށް ލޯބިކުރާ ފަރާތްތަކަށް ތަފާތު ކަމެއް ކޮށްދިނުން ކަމަށެވެ.

މި ރެސްޓޯރެންޓުން އަގުހެޔޮ ކާބޯތަކެތި ލިބެން ހުންނަ އިރު، އޭގެ ތެރޭގައި ކޮކްޓެއިލްސް އަދި އެފްރިކާއަށް ހާއްސަ ކެއުންތައް ލިބެން ހުރެއެވެ.

ރެސްޓޯރެންޓަށް ކާން ދާ މީހުން އެތަނުގައި ހުރި ފޮޓޯތަކާއި، އެއިން ދޭހަކޮށްދޭ މާނަ އާއި ގުޅޭގޮތުން ތަފާތު ވާހަކަތައް އަހައެވެ. އަދި މިއާއެކު ރެސްޓޯރެންޓުން އެ ކުރެހުންތައް މެދުވެރިކޮށް މިސްރާއި، މިސްރުގައި ބޭނުންކުރި ތަފާތު ސިމްބަލް ނުވަތަ ނިޝާން ތަކާއި ގުޅޭ މުހިންމު މައުލޫމާތުތައް ކަސްޓަމަރުންނާއި ހިއްސާކުރެއެވެ.

މި ރެސްޓޯރެންޓާއެކު މިސްރަށް ނުދެވުނު ނަމަވެސް، އެތަނަށް ކާން ދާ ފަރާތްތަކަށް މިސްރާއި ގުޅޭ ތަފާތު މައުލޫމާތު ލިބި އެތަނުގައި އުޅެވޭ ކަހަލަ އިހުސާސެއްކޮށްދެއެވެ. މިސްރުގެ ތަފާތު ކަންކަމުގެ ތެރޭގައި އެތަނުގައި ހުންނަ ޕިރަމިޑާއި، އެމީހުންގެ އާދަކާދައާއި ސަގާފަތާއި އަޅުކަން ކޮށް އުޅުނު ގޮތުގެ މައުލޫމާތު އާންމުންނަށް ލިބިގެންދާނެއެވެ.

ނައިޖީރިއާގެ އާޓިސްޓެއް ލައްވާ ރެސްޓޯރެންޓުގެ ކުރެހުންތައް ކުރަހާފައިވާ އިރު، އެކަމަށް 3 މަސް ނެގިއެވެ. އަދި ކުރަހާފައިވާ އިރު ބައެއް ބަދަލުތައް ވެސް ގެނެސްފައިވެއެވެ. އޭގެ ތެރޭގައި މިސްރުގެ އެކި ހިސާބުތަކުން ފެނިފައިވާ އެކި ކަހަލަ ކުރެހުންތަކުގައި ހުންނަ މީހުންތައް ފޯނާ ކުޅޭތަން ފަދަ މަންޒަރުތައް ކުރަހާ އަދި އެކުރެހުންތަކަށް ބައެއް ބަދަލް ގެނެސްފައިވެސްވެއެވެ.