ހައްޓަށް ލުއިވުމާއި ޖީބަށް ލުއިވުމަކީ ޕްލާސްޓިކާއި ރަބަރުގެ އުފެއްދުންތަކާ ދުރުވުމަށް އެޅިފައި އޮތް އެންމެ ބޮޑު އެއް ހުރަހެވެ. ނަމަވެސް މިފަދަ އުފެއްދުންތަކުގެ ސަބަބުން ވެއްޓަށް ލިބެމުންދާ ގެއްލުންތަކުގެ އަޑުވެސް ވަކި މަޑެއް ނޫނެވެ. އެހެންކަމުން، މިކަމަށް ބޭނުން ވަނީ އިންޤިލާބީ ނުވަތަ އީޖާދީ ހައްލެއް ކަމާ މެދު ދެބަސްވެވޭކަށް ނެތެވެ. އަދުގެ ބައެއް ޒުވާނުން ދަނީ މިހާރުވެސް އެކަން ސާބިތުކޮށްދެމުންނެވެ. އެފަދަ އެކަކީ ނައިޖީރިއާގެ ފަންނުވެރިޔާ ޔޫޖީން ކޮމްބޯޔޭއެވެ.

ޢުމުރުން 30 އަހަރުގެ ކޮމްބޯޔޭގެ މަސައްކަތަކީ އުކާލާފައި ހުންނަ ރަބަރު، ޕްލާސްޓިކް ނުވަތަ ނައިލޯން ފައިވާންތައް އެއްކޮށްގެން ތަފާތު އެކި ކަހަލަ ކުރެހުންތައް ތައްޔާރު ކުރުމެވެ. ކޮމްބޯޔޭ ބުނާ ގޮތުގައި، މިއީ ނައިޖިރިއާއަށް މިއަދު ކުރިމަތިލާން ޖެހިފައިވާ ޕްލާސްޓިކްގެ ތަޣައްޔަރު ކަމުން ޤައުމު ސަލާމަތް ކޮށްދިނުމަށް އޭނާއަށް ކޮށްދެވޭ މަސައްކަތެކެވެ.

ކޮމްބޯޔޭގެ މި މަސައްކަތް ފެށިގެން އައީ 2017 ވަނަ އަހަރުގެ ތެރޭގައި، ކޮލެޖް އެސައިމަންޓެއްގެ ގޮތުގައި ކަމަށް ވީ ނަމަވެސް، މިއަދު މިއީ ކޮމްބޯޔޭގެ ފުލްޓައިމް ވަޒީފާއެވެ. އޯގަން ސްޓޭޓްގައި ސްޓޫޑިއޯއެއްވެސް ހިންގަމުން އަންނަ ކޮމްބޯޔޭ މިއަދު ދަނީ، މި ރޮނގުން ކުރިއަށް ދާން ބޭނުންވާ ކުދިންނަށް، މި ފަންނުވެރިކަން އުނގަންނައިދީ، ދަސްކޮށްދެމުންނެވެ.

ކޮލެޖުގައި ކޮމްބޯޔޭ ހޭދަ ކުރި ދުވަސްވަރުވީ، ކުރެހުމުގެ ފަންނަށް ބޭނުންވާ އެކި ކަހަލަ ސާމާނުތައް ހޯދަން ދަތިވި ދުވަސްވަރަކަށެވެ. ކޮލެޖު ހުރި ސަރަޙައްދުގެ ގޮތުންނެވެ. އެހެންކަމުން، ލެކްޗަރަރު ކޮމްބޯޔޭގެ ކިބައިން އެދުނީ، ވަށައިގެންވާ ވެށީގެ ތެރެއިން ކޮންމެވެސް އެއްޗެއް ހޯދައިގެން އޭނާގެ ކުރެހުންތަކަށް ކުލަ ގެނެސް، އަމާޒުތައް ހާސިލު ކުރުމަށެވެ.

ކޮމްބޯޔޭ ދަސްވެނިވީ ކުލަޖެއްސުމުގެ ފަންނުވެރިކަމުގެ ރޮނގުން ކަމުގައި ވީ ނަމަވެސް، ކޮލެޖު ތަޢުލީމު ފުރިހަމަ ކުރުމަށްފަހު، ފާއިތުވެދިޔަ 4 އަހަރެއްހާ ދުވަހަށް ކޮމްބޯޔޭ ކުރިހާވެސް ކަމަކީ މިއީއެވެ. އޭނާގެ ފަންނުވެރިކަން ފައްކާ ކުރުމެވެ. އުކާލާފައި ހުންނަ ފައިވާން ކިބތައް ބޭނުންކޮށްގެން މީސްމީހުންގެ ތަސްވީރުތައް، ވީހާވެސް އަސްލާ އެއްގޮތަށް، ވީހާވެސް ކުލަގަދަކޮށް ގެނެސްދިނުމެވެ.

އޭނާގެ މަސައްކަތަށް ބޭނުންވާ ގިނަ ސާމާނުތައް، ކޮމްބޯޔޭ ހޯދަނީ ކުނިގޮނޑުތަކާއި، ކޯރުތަކުގެ އައްސޭރިފަށުގެ ސަރަޙައްދުތަކުންނެވެ. އެ ސާމާނުތައް ސްޓޫޑިއޯއަށް ގެންގޮސް، ޑިސްއިންފެކްޓްކުރެއެވެ. އާ ކުރެހުންތައް ތައްޔާރު ކުރުމުގެ ކުރިން، އެ ކުނިތައް ދޮންނަންވެސް ދޮވެއެވެ.

ކުރެހުމުގެ ސައިޒަށް ބަލާ، ބައެއް މަސައްކަތައް ނިންމާލުމަށް 1 މަހާއި 4 މަހާ ދެމެދުގެ މުއްދަތެއް ކޮމްބޯޔޭ ހޭދަ ކުރެއެވެ.

ނައިޖީރިއާ ސަރުކާރުގެ ތަފާސް ހިސާބުތައް ދައްކާ ގޮތުން އެ ޤައުމުން ކޮންމެ އަހަރަކުވެސް އުފައްދާ ޕްލާސްޓިކް ކުނީގެ ބަރުދަން، 2.5 މިލިއަންޓަނަށް އަރައެވެ. އެގޭ ތެރެއިން ބައެއް ކުނި ރަނގަޅު ގޮތުގައި ނައްތާނުލެވި އުޅެނިކޮށް ފައިބައިގެން ދަނީ ކަނޑާއި ކޯރުތަކަށެވެ.