ސައުދީ އަރަބިއްޔާ އަށް ދަތުރުކުރާ ނަމަ ގެންދާ ކޮންޓްރޯލްޑް ބޭހަށް ކުރިން ހުއްދަ ހޯދުން ލާޒިމު ކޮށްފި

ސައުދީ އަރަބިއްޔާ އަށް ދަތުރު ކުރާ ފަރާތްތަކުން ގެންދާ ކޮންޓްރޯލްކުރާ ބޭސްތަކަށް ހުއްދަ ހޯދަން ޖެހޭ ގޮތައް ސައުދީ އަރަބިއްޔާ އިން ހަމަ ޖައްސައިފިއެވެ.

ނޮވެމްބަރު 1 ން ފެށިގެން ސައުދީ އަރަބިއްޔާ އަށް ވައިގެ މަގުންނާއި އެއްގަމު މަގުން އަދި ކަނޑުގެ މަގުން އެ ގައުމަށް އަންނަ ނުވަތަ އެ ގައުމުން ފުރާ ދަތުރުވެރިން ވެސް ކޮންޓްރޯލް ކޮށްފައިވާ ބޭސް ގެންދިއުމަށް ކުރިން ހުއްދަ ހޯދަން ޖެހޭނެއެވެ.

ސައުދީ އަރަބިއްޔާގެ ނޫސް، ސައުދީ ގެޒެޓުން ބުނީ މިފަދަ ބޭސް ބޭނުން ކުރާ ދަތުރުވެރިންގެ ދަތުރު ފަސޭހަކޮށްދިނުމަށް ސައުދީ ސަރުކާރުން ކުރާ މަސައްކަތުގެ ބައެއް ކަމުގައެވެ.

މީގެ މަސްތަކެއް ކުރިން ސައުދީ ފުޑް އެންޑް ޑްރަގް އޮތޯރިޓީ (އެސްއެފްޑީއޭ) އިން އެ ގައުމުން އަދި އެ ގައުމަށް ދަތުރުކުރާ ފަރާތްތަކުން ގެންގުޅޭ ނާކޮޓިކްސް އަދި ސައިކޮޓްރޮޕިކް މާއްދާތައް ހިމެނޭ ކޮންޓްރޯލް ކޮށްފައިވާ ބޭސްތަކަށް ކްލިއަރެންސް ޕާމިޓް ހޯދުމުގެ އުސޫލުތައް ވަނީ ހާމަ ކޮށްފައެވެ.

ގަވާއިދުގެ ދަށުން ވިޔަސް ނާކޮޓިކްސް ނުވަތަ ސައިކޮޓްރޮޕިކް މާއްދާތައް ހިމެނޭ އެއްވެސް ބޭހެއް ވެއްދޭނީ ވަރަށް ހަރުކަށި ޝަރުތުތަކެއްގެ ދަށުން ކަމަށް ސައުދީ އަރަބިއްޔާ އިން ވަނީ ނިންމާފައެވެ.

ސަރުކާރުގެ ނިންމުމުގައިވާ ގޮތުން ދަތުރުވެރިން ހުއްދަ ނެތި ކޮންޓްރޯލް ކޮށްފައިވާ މާއްދާތައް ހިމެނޭ ބޭސް ގެންގުޅުމަކީ މަނާ ކަމެކެވެ. އެހެން ކަމުން ދަތުރުވެރިން ގެންދާ މިފަދަ ބޭސްތައް ޑިކްލެއަރކޮށް ބޭނުންވާ ލިޔެކިޔުންތައް ހުށަހަޅަން ޖެހެއެވެ.

އެސްއެފްޑީއޭއިން ބުނީ ކޮންޓްރޯލްކުރާ ބޭސްތަކުގެ ޕާމިޓްތަކާ ގުޅުންހުރި ހުރިހާ މައުލޫމާތެއް އެ އިދާރާގެ ކޮންޓްރޯލްޑް ޑްރަގް ސިސްޓަމް (ސީޑީއެސް) މެދުވެރިކޮށް https://cds.sfda.gov.sa އިން ލިބެން ހުންނާނެ ކަމަށެވެ.