އަލޮންސޯ ބުނީ ރެއާލް އިން މަސައްކަތް ކުރި ކަމަށާއި، ފުރުސަތު ނުގެއްލޭ ކަމަށް

ސްޕެނިޝް ލީގުގައި އެންމެ ފަހުން ޖިރޯނާއާ ދެކޮޅަށް ކުޅުނު މެޗުން ރެއާލް މެޑްރިޑު އެއްވަރު ވީ ނަމަވެސް، އެ ޓީމުގެ ކުޅުންތެރިން ވަރަށް ބޮޑަށް މަސައްކަތް ކުރި ކަމަށް ރެއާލްގެ ކޯޗު ޒަބީ އަލޮންސޯ ބުނެފި އެވެ.

ޖިރޯނާއާ ދެކޮޅަަށް ކުޅުނު މެޗުން މޮޅުވެ، އެއް ވަނަ އަށް ޖެހިލުމުގެ ފުރުސަތު ރެއާލް އަށް އޮތް ނަމަވެސް، އެ މެޗު އެއްވަރު ވުމުން ރެއާލް އޮތީ ދެ ވަަނައިގަ އެވެ. ޕޮއިންޓެއްގެ ލީޑަކާ އެކު މިވަގުތު އެއް ވަނައިގައި އޮތީ ވާދަވެރި ބާސެލޯނާ އެވެ.

އަލޮންސޯ ބުނީ ޖިރޯނާ މެޗުގެ ދެ ވަނަ ހާފުގައި ރެއާލްގެ ކުޅުންތެރިން ވަރަށް ބޮޑަށް މަސައްކަތް ކުރި ކަމަށެވެ. ޚާއްސަކޮށް މެޗުން މޮޅުވުމަށް ކުޅުންތެރިން ހިތްވަރު ލައިގެން މަސައްކަތް ކުރިއިރު، މެޗުން މޮޅުވާނެ ފުރުސަތު ވެސް އެ ޓީމަށް ލިބުނު ކަމަށް އަލޮންސޯ ބުންޏެވެ. އެހެން ނަމަވެސް، ރެއާލް އަށް އެންމެ ބޮޑަށް ދިމާވި މައްސަލަ އަކީ ލިބުނު ފުރުސަތުގެ ބޭނުން ނުކުރެވުން ކަމަށް އޭނާ ވަނީ ފާހަގަ ކޮށްފަ އެވެ.

މެޗު އެއްވަރުވެ މިވަގުތު ރެއާލް ދެ ވަނައިގައި އޮތް ނަމަވެސް، އަލޮންސޯ ބުނީ ސީޒަން ނުނިމޭ ކަމަށެވެ. އޭނާ ބުނީ ސްޕެނިޝް ލީގަކީ ވަރަށް ދިގު ލީގެއް ކަަމަށާއި، ލީގުގައި ބާކީ މެޗުތައް ވެސް ރެއާލް އަށް އޮތް ކަމަށެވެ. އެހެންކަމުން، އަދި އެއްވެސް ކަމެއް ނުނިމޭ ކަމަށާއި، ރެއާލް އަށް އޮތީ ހިތްވަރާ އެކު ކުރިއަށް ދިޔުން ކަމަށް އޭނާ ބުންޏެވެ.

ލީގުގައި އެންމެ ފަހުން ރެއާލް ކުޅުނު ތިން މެޗު ވެސް އެއްވަރުވެފައިވާއިރު، އެކަމަށް އިޝާރާތްކޮށް އަލޮންސޯ ބުނީ އެއީ މައްސަލަ ޖައްސަން ބޭނުންވާ ކަމެއް ނޫން ކަމަށެވެ. އޭނާ ބުނީ އެ މެޗު ތަކުގެ ނަތީޖާ އަނބުރާލުމުގެ ފުރުސަތު ރެއާލް ލިބުނު ކަމަށާއި، ނަމަވެސް، އެކަން ކާމިޔާބު ނުވީ ކަމަށެވެ. މިވަގުތު ޓީމުގައޮ އޮތް ރޫހާއި ހިތްވަރާ އެކު ކުރިއަށް ދިޔުމުގައި ސާބިތުވެ ތިބެން ޖެހޭ ކަން ފާހަގަ ކުރަމުން އަލޮންސޯ ބުނީ، ފާޑު ކިޔުންތަކާ ވެސް ކުރިމަތިލާން ޖެހޭނެ ކަމަށެވެ.

އެހެން ނަމަވެސް، ރެއާލް ކުރާ މަސައްކަތާ މެދު ހިތްހަމަ ޖެހޭ ކަމަށާއި، އަބަދު ވެސް ކުރިއަށް ދަނީ ރަނގަޅު ކުރަން ހުންނަ ކަންކަމަށް ސަމާލުކަން ދީގެން ކަމަށް އަލޮންސޯ ބުންޏެވެ. އަދި ކުރިއަށް އޮތް މެޗުން ނަތީޖާ ނެރެ، ރެއާލް އަލުން ރަނގަޅު ފޯމަށް ގެނައުމަށް މަސައްކަތް ކުރާނެ ކަމަށް ވެސް އަލޮންސޯ ބުނެފައިވެ އެވެ.

މިހާތަނަށް ލީގުގައި ކުޅެފައިވާ 14 މެޗުން 33 ޕޮއިންޓާ އެކު ރެއާލް އޮތީ ދެ ވަނައިގަ އެވެ. 10 މެޗުން އެ ޓީމު މޮޅުވެފައިވާއިރު، ތިން މެޗުން އެއްވަރުވެފައިވެ އެވެ. އަދި އެއް މެޗުން ބަލިވެފައިވެ އެވެ. އެއް ވަނައިގައި އެންމެ ފަހުގެ ޗެމްޕިއަން ބާސެލޯނާ އަށް 14 މެޗުން ލިބެނީ 34 ޕޮއިންޓެވެ.