ބެލެންޑިއޯ އަށް ފަހު، ފީފާ އެވޯޑު ވެސް ޑެމްބެލޭ ހޯދައިފި

ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ދެމުން އަންނަ ފީފާ ބެސްޓް އެވޯޑު، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އޮސްމާން ޑެމްބެލޭ ހޯދައިފި އެވެ.

އަންގާރަ ދުވަހުގެ ރޭ އޮތް އެވޯޑު ހަފްލާގައި ޑެމްބެލޭ އެ އެވޯޑު ހޯދާފައި ވަނީ، ބާސެލޯނާ އަށް ކުޅެމުން އަންނަ ސްޕެއިންގެ ލަމީން ޔަމާލް އަދި ރެއާލް މެޑްރިޑަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭއާ ވާދަކޮށެވެ. 

ފީފާ އެވޯޑު ޑެމްބެލޭ ހޯދާފައިވާއިރު، މިދިޔަ ސީޒަންގައި އޭނާ ވަނީ ޕީއެސްޖީ އާއެކު ގިނަ ކާމިޔާބީ ތަކެއް ހޯދައި، މޮޅު ކުޅުމެއް ވެސް ދައްކައިފަ އެވެ. އެގޮތުން ޕީއެސްޖީ އިން އެ ކުލަބުގެ ތާރީޚުގައި ފުރަތަމަ ފަހަރަށް ޔުއެފާ ޗެމްޕިއަންސް ލީގު ކާމިޔާބު ކުރިއިރު، ޑެމްބެލޭ ވަނީ އިސް ދައުރެއް އަދާ ކޮށްފަ އެވެ.

މީގެ އިތުރުން ޑެމްބެލޭ ވަނީ ޕީއެސްޖީ އާއެކު ފްރާންސް ލީގުގެ އިތުރުން، ފްރާންސް ކަޕް އަދި ޓްރޮފީ ޑީ ޗެމްޕިއަންސް ވެސް ކާމިޔާބު ކޮށްފަ އެވެ. ޗެމްޕިއަންސް ލީގުގެ މިދިޔަ ސީޒަންގެ އެންމެ މޮޅު ކުޅުންތެރިޔަކަށް ވެސް ހޮވުނީ ޑެމްބެލޭ އެވެ. އަދި ފްރާންސް ލީގުގެ އެންމެ މޮޅު ކުޅުންތެރިޔަކަށް ވެސް ޑެމްބެލޭ ހޮވުނުއިރު، އެންމެ ގިނަ ލަނޑު ޖެހި ކުޅުންތެރިންގެ ތެރޭގައި ވެސް އޭނާ ހިމެނެ އެވެ.

ފީފާ އެވޯޑު ޑެމްބެލޭ ހޯދާފައިވާއިިރު، މިއަހަރުގެ ސެޕްޓެމްބަރު މަހުގެ ތެރޭގައި އޭނާ ވަނީ ފްރާންސް ފުޓުބޯޅަ އިން ދުނިޔޭގެ އެންމެ މޮޅު ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު ވެސް ކާމިޔާބު ކޮށްފަ އެވެ. އެ އެވޯޑު ޑެމްބެލޭ ހޯދީ ޔަމާލްގެ އިތުރުން، ވިޓީނިއާ ވާދަ ކޮށްގެންނެވެ. 

މީގެ އިތުރުން، ފީފާ އިން ހޮވާ އަހަރުގެ އެންމެ މޮޅު ކޯޗަަކަށް ހޮވުނީ ޕީއެސްޖީ އަށް އިރުޝާދު ދެމުން އަންނަ ސްޕެއިންގެ ލުއިސް އެންރީކޭ އެވެ. އަދި އެންމެ މޮޅު ގޯލު ކީޕަރަކަށް ހޮވުނީ ޕީއެސްޖީ ދޫކޮށްލުމަށް ފަހު، މެންޗެސްޓަރ ސިޓީ އަށް ބަދަލުވި ޖިއާންލުއިޖީ ޑޮންނަރުންމާ އެވެ. އޭގެ އިތުރުން، އެންމެ މޮޅު އަންހެން ކުޅުންތެރިޔަކަށް ހޮވުނީ ސްޕެއިންގެ  އައިޓާނާ ބޮންމާޓީ އެވެ. މިއީ މި އެވޯޑު ޖެހި ޖެހިގެން އޭނާ ހޯދި ތިން ވަނަ ފަހަރެވެ.