"ފީފާގެ ރައީސްއާއެކު ރައީސް މުއިއްޒު ކުޅުއްވި މެޗަކީ މުޅި އިސްލާމީ އުއްމަތަށް ކުރި ޖެއްސުމެއް"

ފީފާއިން އިސްރާއީލް ބޭރުކުރުމަށް ފާޅުގައި ދެކޮޅުހަދަމުން ދަނިކޮށް، ފީފާގެ ރައީސް ޖިއާނީ އިންފަންޓީނޯ އާއެކު ރައީސް މުއިއްޒު ގަލޮޅު ދަނޑުގައި ފުޓުބޯޅަ މެޗެއް ކުޅުއްވުމަކީ ދިވެހި ރައްޔިތުންގެ ޝުއޫރުތަކާ ދެކޮޅަށް، މުޅި އިސްލާމީ އުއްމަތަށް ކުރި ޖެއްސުމެއް ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.

ހުކުރު ދުވަހުގެ ހަވީރު ގަލޮޅު ދަނޑުގައި ކުޅުނު މި މެޗު ބަލަން އައި ގިނަ ބަޔަކު އިސްރާއީލާ ދެކޮޅަށް ޝުއޫރު ފާޅުކުރުމަށް ބޯޑުތަކާއި ބެނާތައް ހިފައިގެން ތިބިއިރު، ފުލުހުން ވަނީ އެފަރާތްތައް ދަނޑުން ބޭރުކޮށްފައެވެ. މިކަމާ ގުޅިގެން ފައްޔާޒް މީސް މީޑިޔާގައި ކުރެއްވި ޕޯސްޓެއްގައި ފާހަގަކުރެއްވި ގޮތުގައި، ރަޝިއާ ސިފައިން ޔުކްރޭނަށް އެރިތާ އެންމެ 5 ދުވަހުގެ ތެރޭގައި ފީފާ އިން ރަޝިއާގެ ޤައުމީ ފުޓްބޯޅަ ޓީމު ސަސްޕެންޑްކުރިއެވެ.

އިސްރާއީލުން ޣައްޒާގައި ގަތުލުއާންމު ހިންގައި، ފަލަސްތީނުގެ ޤައުމީ ފުޓްބޯޅަ ޓީމުގެ ކުޅުންތެރިންނާއެކު އެތައްހާސް ބަޔަކު ޝަހީދުކޮށްފައިވާތީ، އިސްރޭލު ސަސްޕެންޑްކުރުމަށް މުޅި ދުނިޔޭން ގޮވަމުންދާތާ 2 އަހަރަށްވުރެ ގިނަ ދުވަސް ވީއިރުވެސް ފީފާއިން އެއްވެސް ފިޔަވަޅެއް އަޅާފައިނުވާކަމަށް ފައްޔާޒް ފާހަގަކުރެއްވިއެވެ.

ފައްޔާޒް އިތުރަށް ސުވާލު އުފައްދަވާފައިވަނީ، އިޒްރޭލު ސަސްޕެންޑްކުރުމަށް ފީފާއިން ފާޅުގައި ދެކޮޅުހަދަމުން ދަނިކޮށް، ފީފާގެ ރައީސްއާއެކު ރާއްޖޭގެ ރައީސް ފުޓްބޯޅަ މެޗެއް ކުޅެން ޖެހުނު ސަބަބާ މެދުގައެވެ. އަދި މިވަގުތު މިފަދަ ރަމްޒީ މެޗެއް ނުކުޅުނަސް ވެދާނެކަމަށް ފައްޔާޒް ވިދާޅުވިއެވެ.

https://raajje.mv/172369

ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުން، ފަލަސްތީނުގެ ދިދަތަކާއެކު ސުލްހަވެރިކަމާއެކު ޝުއޫރު ފާޅުކުރަމުން ދިޔަ ފަރާތްތައް ކުއްލިގޮތަކަށް ފުލުހުން އައިސް ދަނޑުން ބޭރުކުރުމުން، ގިނަ އަދަދެއްގެ ދިވެހިން ވަނީ ސަރުކާރުގެ މި ޢަމަލާމެދު ނުރުހުން ފާޅުކޮށްފައެވެ. އަދި ފަލަސްތީނުގެ މައްސަލައިގައި ސަރުކާރުން ދައްކަމުންދާ ވާހަކަތަކަކީ ދެފުށް ދެގޮތް، މާނައެއް ނެތް ވާހަކަތަކެއްކަން މި ހާދިސާއިން ސާބިތުވެގެން ދިޔަކަމަށް ގިނަ ފަރާތްތަކުން ފާހަގަކުރަމުންދެއެވެ.