އިނގިރޭސިވިލާތުގެ ބޮޑު ވަޒީރު ކީ ސްޓާމާ، ސޯޝަލް މީޑިއާ ޕްލެޓްފޯމް - ޓިކްޓޮކް އެކައުންޓެއް ހައްދަވައި ރަސްމީކޮށް ބޭނުން ކުރައްވަން ފައްޓަވައިފި އެވެ.

އިނގިރޭސިވިލާތުގެ ސަރުކާރުގެ ޑިވައިސްތަކުން ޓިކްޓޮކް މަނާ ކޮށްފައި ވަނިކޮށް، ބޮޑު ވަޒީރު ސްޓާމާ ޓިކްޓޮކް އެކައުންޓެއް ހައްދަވާފައި ވަނީ ހޯމަ ދުވަހު އެވެ. މިއީ ޒުވާން އުމުރުފުރައިގެ ރައްޔިތުންނާއި ވޯޓަރުންނާ ގުޅުން ބަދަހި ކުރުމަށް ބޮޑު ވަޒީރު ސްޓާމާ ކުރައްވަމުން ގެންދަވާ މަސައްކަތުގެ ބައެއް ކަމަށް ރިޕޯޓު ތަކުގައި ވަނީ ފާހަގަ ކޮށްފަ އެވެ. އެއާ އެކު ސްޓާމާ ވެގެން ގޮސްފައި ވަނީ، އިނގިރޭސިވިލާތުގެ ބޮޑު ވަޒީރުންގެ ތެރެއިން ޓިކްޓޮކް ބޭނުން ކުރައްވަ ފުރަތަމަ ބޮޑު ވަޒީރަށެވެ.

ބޮޑު ވަޒީރުގެ އޮފީސް ޑައުނިން ސްޓްރީޓްގެ ތަރުޖަމާނު ވިދާޅުވެފައި ވަނީ، ބޮޑު ވަޒީރު ސްޓާމާގެ ޓިކްޓޮކް އެކައުންޓު ހިންގުމަށް ސަލާމަތީ ކަންކަން ރައްކާތެރި ކުރުމުގެ ފިޔަވަޅުތައް އަޅާފައިވާ ކަމަށެވެ. ސްޓާމާގެ ޓިކްޓޮކް އެކައުންޓުގައި ޝާއިއު ކޮށްފައިވާ ފުރަތަމަ ވީޑިއޯގައި ފެންނަނީ އަނބިކަނބަލުންނާ އެކު ޑައުނިން ސްޓްރީޓްގެ ކްރިސްމަސް ބޮކިތައް ދިއްލުމުގެ ޙަރަކާތައް ވަޑައިގަންނަވާ މަންޒަރެވެ. އެ ވީޑިއޯގައި ސްޓާމާ ވިދާޅުވަނީ ޓިކްޓޮކް އިން އޭނާ ފޮލޯ ކުރެއްވުމަށެވެ.

ދެ ވަނަ ވީޑިއޯގައި ފެންނަނީ ޔުކްރެއިންގެ ރައީސް ވުލޮޑޮމިއަރ ޒެލެންސްކީ އަށް މަރުޙަބާ ދަންނަވާ މަންޒަރެވެ. އެގޮތުން ހިންގަވާފައި ޒެލެންސްކީ، ބޮޑު ވަޒީރުގެ ރަސްމީ ދެކޮޅު 10 ޑައުނިން ސްޓްރީޓް އަށް ވަޑައިގަންނަވާއިރު، ޒެލެންސްކީ އަށް މަރުޙަބާ ދެންނެވުމަށް ސްޓާމާ ނިކުމެ ހުންނަވައި މަންޒަރު ވެސް ފެނެ އެވެ.

ސްޓާމާގެ ޓިކްޓޮކް އެކައުންޓުގައި ޕޯސްޓު ކޮށްފައިވާ ތިން ވަނަ ވީޑިއޯގައި ފެންނަނީ، ސްޓާމާ އާއި ޒެލެންސްކީގެ އިތުރުން ފްރާންސްގެ ރައީސް އިމަނުއެލް މެކްރޮން އަދި ޖަރުމަނުގެ ޗާންސެލަރު ފްރެޑްރިކް މާޒް މަޝްވަރާ ކުރައްވާ މަންޒަރެވެ. މިއީ ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގައި ސުލްޙަ ޤާއިމު ކުރުމަށް ކުރަމުން އަންނަ މަސައްކަތުގައި، ޔުކްރެއިންގެ މަސްލަޙަތު ހިމާޔަތް ކުރުމަށް ހަތަރު ލީޑަރުން ބޭއްވެވި ބައްދަލުވުމެކެވެ.

އެއަށް ފަހު އަންގާރަ ދުވަހު ސްޓާމާ ވަނީ ހަތަރު ވަނަ ވީޑިއޯއެއް ވެސް ޓިކްޓޮކް އެކައުންޓުގައި ޕޯސްޓު ކުރައްވައިފަ އެވެ. އެ ވީޑިއޯގައި ފެންނަނީ ދުވަހުގެ މަސައްކަތްތައް ފަށައި ގަތުމަށް ސްޓާމާ ވަޑައިގަންނަވާއިރު، ޑައުނިން ސްޓްރީޓްގެ ބައެއް މުވައްޒަފުންނާ އޭނާ ވާހަކަ ދައްކަވާ މަންޒަރެވެ.

އެ އެކައުންޓުން ފަސް ވަނަ ވީޑިއޯއެއް ޕޯސްޓު ކޮށްފައި ވަނީ އަންގާރަ ދުވަހުގެ ރޭ އެވެ. އެ ވީޑިއޯގައި ފެންނަނީ މިދިޔަ ހަފުތާގެ ތެރޭގައި ބޮޑު ވަޒީރު ސްޓާމާ ސްކޫލަކަށް ޒިޔާރާތް ކުރެއްވިއިރު، އެ ސްކޫލްގެ ދަރިވަރަކާ އެކު ހީ ސަމާސާ ކުރައްވާ މަންޒަރެވެ. އަދި މިޔުޒިކާ އެއްވަރަށް، ސްޓާމާ އާއި ދަރިވަރު އަތުން އިޝާރާތް ކުރައްވަމުން ނަށާ މަންޒަރު ވެސް ފެނެ އެވެ.

ޓިކްޓޮކް ހިންގާ މައި ކުންފުނި ކަމަށްވާ، ޗައިނާގެ ބައިޓްޑާންސްއާ ގުޅިފައިވާ ޑޭޓާ ސެކިއުރިޓީގެ ކަންބޮޑުވުންތަކާ ގުޅިގެން، އިނގިރޭސިވިލާތުގެ ސަރުކާރުގެ ޑިވައިސް ތަކުން ޓިކްޓޮކް މަނާ ކޮށްފައި ވަނީ 2023 ވަނަ އަހަރުގެ މާޗު މަހުގެ ތެރޭގަ އެވެ. އިނގިރޭސިވިލާތުގެ އިތުރުން، ބައެއް އެހެން ޤައުމު ތަކުގައި ވެސް ވަނީ އެކަން މަނާ ކޮށްފަ އެވެ.

އެގޮތަށް ޓިކްޓޮކް މަނާ ކުރުމުގެ ކުރިން، 2022 ވަނަ އަހަރު އިނގިރޭސިވިލާތުގެ ބޮޑު ވަޒީރުގެ އޮފީސް، 10 ޑައުނިން ސްޓްރީޓް އިން ވަނީ ރަސްމީ ޓިކްޓޮކް އެކައުންޓެއް ހުޅުވައިފަ އެވެ. ކުރީގެ ބޮޑު ވަޒީރު ބޮރިސް ޖޯންސަންގެ ދައުރުގެ ތެރޭގައި ޑައުނިން ސްޓްރީޓް އިން ޓިކްޓޮކް އެކައުންޓެއް ހުޅުވައި ބޭނުން ކުރަން ފެށި ނަމަވެސް، ތިން މަސް ދުވަސް ފަހުން ވަނީ އެ އެކައުންޓުން ވީޑިއޯ ޕޯސްޓު ކުރުން ހުއްޓާލައިފަ އެވެ.

ބޮޑު ވަޒީރު ސްޓާމާގެ ތަރުޖަމާނު ވިދާޅުވީ ސަރުކާާރުގެ ގިނަ ޑިވައިސް ތަކުގައި ޓިކްޓޮކް އެޕްލިކޭޝަން ބޭނުން ކުރުމުގެ މަނާ ކުރުންތައް އަދި ވެސް ދެމި އޮތް ކަމަށެވެ. އަދި ޓިކްޓޮކާ ގުޅިގެން ސަރުކާރުގެ ސެކިއުރިޓީ ޕޮލިސީ އަށް އެއްވެސް ބަދަލެއް ނާންނާނެ ކަމަށް ވެސް އޭނާ ވިދާޅުވެފައިވެ އެވެ.

ސްޓާމާ ޓިކްޓޮކް އެކައުންޓެއް ހައްދަވާފައިވާއިރު، ސްޓާމާ އާއި އޭނާގެ ސަރުކާރުގެ މަޤުބޫލުކަން ދަށްވެފައިވާކަން ވަނީ ފާހަގަ ކުރެވިފަ އެވެ. މިފަދަ ދަނޑިވަޅެއްގައި ޓިކްޓޮކް އެކައުންޓެއް ހައްދަވައި، ބޭނުން ކުރަން ފެއްޓެވުމުގެ މައިގަނޑު މަޤުސަދަކީ ރައްޔިތުންނާ ވީހާ ވެސް ގާތުން ގުޅުން ބަދަހި ކުރުމަށް ކަމަށް ފާހަގަ ކޮށްފައިވެ އެވެ.

ޑޭޓޭ ސެކިއުރިޓީ އާއި އެހެނިހެން މައްސަލަތަކާ ގުޅިގެން ކަންބޮޑުވުން ތަކެއް އޮތް ނަމަވެސް، ޓިކްޓޮކް އަކީ ދުނިޔޭގެ އެންމެ މަޤުބޫލު ސޯޝަލް މީޑިއާ އެޕްލިކޭޝަން ތަކުގެ ތެރޭގައި ހިމެނޭ އެޕެކެވެ. ދުނިޔޭގެ އެކި ކަންކޮޅު ތަކުގައި 1.5 ބިލިއަނަށް ވުރެ ގިނަ މީހުން އަދި އިނގިރޭސިވިލާތުގައި 30 މިލިއަނަށް ވުރެ ގިނަ މީހުން ޤަވާއިދުން ޓިކްޓޮކް ބޭނުން ކުރެ އެވެ.

ޓިކްޓޮކް ބޭނުން ކުރައްވަން ސްޓާމާ ފައްޓަވާފައިވާއިރު، އޭނާގެ އިތުރުން ފްރާންސްގެ ރައީސް އިމަނުއެލް މެކްރޮން އާއި، އެމެރިކާގެ ރައީސް ޑޮނަލްޑް ޓްރަމްޕް އަދި އޮސްޓްރޭލިއާގެ ބޮޑު ވަޒީރު އެންތަނީ އަލްބަނީސް ފަދަ ބޭފުޅުން ވެސް ޓިކްޓޮކް ބޭނުން ކުރައްވަމުން ގެންދަވަ އެވެ.