ޔުއެފާ ޔޫރޮޕާ ލީގުގައި އެސްޓަން ވިލާ އާއި މެކަބީ ތެލް އަވީވް ބައްދަލު ކުރާ މެޗަށް، މެކަބީގެ ސަޕޯޓަރުން ނުވެއްދުމަށް ނިންމުމުން، އިނގިރެސިވިލާތުގެ ބޮޑު ވަޒީރު ކީ ސްޓާމާ ނުރުހުން ވެއްޖެ އެވެ.

ބުރާސްފަތި ދުވަހު އެސްޓަން ވިލާ އިން ބުނެފައިވާ ގޮތުގައި، ސަލާމަތީ ޙާލަތާއި ކަންކަމަށް ރިއާޔަތް ކުރުމަށް ފަހު، އެ މެޗަށް އަވޭ ޓީމުގެ ސަޕޯޓަރުން ނުވެއްދުމަށް ވެސްޓް މިޑްލޭންޑްސް ފުލުހުންގެ ފަރާތުން ލަފާ ލިބިފައިވާ ކަމަށެވެ. އެ ލަފާގެ މަތިން ބާމިންހަން ސޭފްޓީ އެޑްވައިޒަރީ ގުރޫޕުން ވެސް ވަނީ، ސަޕޯޓަރުން ނުވެއްދުމަށް ނިންމައިފަ އެވެ. އެހެންކަމުން މި ނިންމުމަށް ޔުއެފާ އިން ވެސް ތާއީދު ކުރާނެ ކަމަށް ބެލެވެ އެވެ.

އެކަމާ ގުޅިގެން ސްޓާމާ އޭނާގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވެފައި ވަނީ، އެ ނިންމުމަކީ ރަނގަޅު ނިންމުމެއް ނޫން ކަމަށެވެ. އޭނާ ވިދާޅުވީ އިނގިރޭސިވިލާތުގެ މަގުތައް މަތީގައި ޔަހޫދީންނާ ދެކޮޅު އަމަލު ތަކަށް ޖާގަ ނުދޭނެ ކަމަށެވެ. އެގޮތުން ސްޓާމާ ވިދާޅުވެފައި ވަނީ ފުލުހުންގެ ދައުރަކީ ފުޓުބޯޅަ ހުރިހާ ސަޕޯޓަރުންނަށް ވެސް، އެއްވެސް ބިރުވެރި ކަމެއް ނެތި މެޗު ބަލާލެވޭނެ މާހައުލެއް ޤާއިމު ކޮށްދިނުން ކަމަށެވެ.

ބޮޑު ވަޒީރު ސްޓާމާގެ އިތުރުން، އިދިކޮޅު ކޮންޒަވޭޓިވް ޕާޓީގެ ލީޑަރު ކެމީ ބަދެނޯޗް ވެސް ވަނީ އެ ނިންމުމާ މެދު ފާޑު ވިދާޅުވެފަ އެވެ. އެގޮތުން އެއީ ޤައުމީ ލަދުވެތި ކަމެއް ކަމަށް އޭނާ ވަނީ ވިދާޅުވެފަ އެވެ. އޭނާ ވިދާޅުވީ އެކަމުން ދޭހަވަނީ، އިނގިރޭސިވިލާތުގެ ބައެއް ސަރަހައްދު ތަކަށް ޔަހޫދީންނަށް ނުދެވޭ ކަމުގެ ނުރަނގަޅު މެސެޖު ކަމަށެވެ.

ބާމިންހަމްގެ ކުރީގެ މެމްބަރު ލޯޑް އިއާން އޯސްޓިން ވިދާޅުވެފައި ވަނީ، އެ ނިންމުމުގެ ސަބަބުން 2028 ވަނަ އަހަރުގެ ޔޫރޯ ފުޓުބޯޅަ މުބާރާތުގެ މެޗުތައް ވިލާ ޕާކުގައި ބޭއްވުމާ މެދު ސުވާލު އުފެދޭ ކަމަށެވެ. އަދި އެ ނިންމުން އަލުން މުރާޖައާ ކުރުމަށް ވެސް އޭނާ ވަނީ ގޮވާލައްވައިފަ އެވެ.

ނަމަވެސް، ބާމިންހަމްގެ ޕެރީ ބާ ސަރަހައްދުގެ މިނިވަން މެމްބަރެއް ކަމަށްވާ އައޫބް ޚާން ވަނީ އެ ނިންމުމަށް މަރުޙަބާ ކިޔުއްވައިފަ އެވެ. މެޗާ ގުޅިގެން އުފެދިފައިވާ ސިޔާސީ ހަލަބޮލި ކަމާއި، ނަމާން ކަމަށް ބަލާއިރު، މިގަދަ ފިޔަވަޅެއް އެޅުމަކީ މުހިންމު ކަމެއް ކަމަށް އޭނާ ވަނީ ވިދާޅުވެފަ އެވެ.

ވެސްޓް މިޑްލޭންޑްސް ފުލުހުން ބުނެފައި ވަނީ އެ ނިންމުން ނިންމާފައި ވަނީ ކުރީގެ ހާދިސާ ތަކަށާއި، މިހާރު ލިބިފައިވާ އިންޓެލިޖެންސް މައުލޫމާތަށް ބިނާކޮށް ކަމަށެވެ. އޭގެ ތެރޭގައި 2024 ވަނަ އަހަރު އަޔެކްސް އާއި މެކަބީ ބައްދަލު ކުރި މެޗުގައި ހިނގައި ދިޔަ ކަންތައްތައް ހިމެނޭ ކަމަށް ވަނީ ފާހަގަ ކޮށްފަ އެވެ.

2021 ވަނަ އަހަރުގެ އާބާދީ ބޯހިމެނުމުގައިވާ ގޮތުން ބާމިންހަމްގެ އާބާދީގެ 30 އިންސައްތަ އަކީ މުސްލިމުންނެވެ. އަދި ޣައްޒާގެ ހަނގުރާމަ ފެށުނީއްސުރެ، އެ ސިޓީގައި ފަލަސްޠީނަށް ތާއީދުކޮށް ގިނަ މުޒާހަރާތަކެއް ބާއްވާފައިވެ އެވެ.