އަނިޔާވެރިކަން މިހާރު މާ ބޮޑަށް ދިގު ދެމިއްޖެ. ރައްޔިތުން ފަހަތަށް ޖެހެވޭކަށް ނެތް: ފައިސަލް
10 ސެޕްޓެމްބަރު 2017 | އާދީއްތަ 03:03ތަރައްޤީއަކީ ދަރިންގެ ދަރިން ދަރަނިވެރިވާ ކަމަކަށް ވާކަށް ނުޖެހޭ
ފައިސަލް: ބިރު ފަހަނައަޅާ ދާން ޖެހޭ
މިގައުމުގައި އަނިޔާވެރިކަމާއި ކޮރަޕްޝަންގެ އަމަލުތައް މާގިނަ ދުވަހަށް ދެމިގެން ހިނގައްޖެ ކަމަށާއި ރައްޔިތުން ބިރުގަނެ ފަހަތަށް ޖެހެވޭކަށް ނެތް ކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު ފައިސަލް ނަސީމް ވިދާޅުވެއްޖެއެވެ.
ފައިސަލް މިހެން ވިދާޅުވީ ގުޅިފައިވާ ޕާޓީ ތަކުން ހޮނިހިރު ދުވަހުގެރޭ ކުނޫޒުގައި ބޭއްވި ޖަލްސާގައި ވާހަކަދައްކަވަމުންނެވެ.
ފައިސަލް ވިދާޅުވީ މިސަރުކާރަކީ ރަނގަޅު ކަންކަން ކުރަން ފަސްޖެހޭ ސަރުކާރެއް ކަމަށާއި އެކަމުގެ ސަބަބުން މިސަރުކާރުގެ އަނިޔާވެރިކަމާއި ކޮރަޕްޝަންގެ އަމަލުތައް ދިގުލައިގެންދާ ކަމަށެވެ. މިއީ ރައްޔިތުން ވިސްނަންޖެހޭ ކަމެއް ކަމަށާއި އަނިޔާވެރިކަމާއި ކޮރަޕްޝަން އަކީ ދިގުލައިގެންދާން ފުރުސަތު ދޭންޖެހޭ ކަމެއް ކަމަށް ރައްޔިތުން ގަބޫލުނުކުރާނެ ކަމަށެވެ. ފައިސަލް ވިދާޅުވީ ބިރުވެތިވާންވީ ހަމައެކަނި ހެއްދެވި ފަރާތަށް ކަމަށާއި ގައުމާ ދޭތެރޭ ވިސްނުމަށްފަހު ގައުމުގެ ހައްގުގައި ފަސްޖެހިގެން ނުވާނެ ކަމަށެވެ.
ތަރައްގީއަށްޓަކައި މިސަރުކާރުން ވެސް ކަންތައްތަކެއް ކުރަމުންދާ ކަން ފާހަގަކުރައްވަމުން ފައިސަލް ވިދާޅުވީ ތަރައްގީ ބޭނުންވަނީ ކޮރަޕްޝަނާ ނުލައި އަދި ރައްޔިތުންގެ ހައްގުތައް ވެސް ލިބޭ ގޮތަށް ކަމަށެވެ. ތަރައްގީގެ މަޝްރޫއުތަކުން ނާޖާއިޒު ބޮޑެތި ފައިދާތަކެއް ނަގަމުންދާ ކަމަށް ބުނެ ރައްޔިތުން ސުވާލު އުފައްދާ ކަމަށްވެސް އޭނާ ވިދާޅުވި އެވެ.
"މިފެންނަނީ ރައްޔިތުންގެ ސިކުނޑިތަކަށް ވަންނަން މަސައްކަތް ކުރާ ތަން. ރައްޔިތުން ތަރައްގީ ބޭނުން ވާނެ. އެކަމަކު ތަރައްގީއަކީ ދަރިންގެ ދަރިން ދަރަނިވެރިވާ ކަމަކަށް ވާކަށް ނުޖެހޭ. އަޅުގަނޑުމެން އެބަޖެހޭ ވިސްނަން،" ފައިސަލް ވިދާޅުވިއެވެ އިސްލާމް ދީނުގައި ވެސް އަނިޔާވެރިކަމަކީ މަނާކުރައްވާފައިވާ ކަމެއް ކަން ފާހަގަކުރައްވަމުން ފައިސަލް ވިދާޅުވީ އަނިޔާވެރިކަމުން ސަލާމަތް ވުމަށް މަސައްކަތް ކުރަންޖެހޭ ކަމަށެވެ. ނަމަވެސް އަނިޔާގެ ވާހަކަދެއްކުމުން އެވާހަކަ ހުތުރުވެ މިއަދު ކުށްވެރިވަމުންދާ ކަމަށްވެސް ފައިސަލް ވިދާޅުވި އެވެ. އިލެކްޝަންސް ކޮމިޝަނުން މަޖިލީހުގެ މެންބަރުންގެ ގޮނޑި ގެއްލުވާލަމުންދާ ދިއުމަށް އިޝާރާތް ކުރައްވާ ފައިސަލް ވިދާޅުވީ ކޮމިޝަނުން އަމަލުކުރާ ގޮތުން ހިނި އަންނަ ކަމަށެވެ. އިލެކްޝަންސް ކޮމިޝަންގެ ރައީސް އަހްމަދު ސުލައިމާނަކީ މިހާރު އަމަލުކުރަމުންދާ ގާނޫނު އަސާސީ އެކުލަވާލި ހާއްސަ މަޖިލީހުގެ މެންބަރުކަން ވެސް ކުރެއްވި ބޭފުޅެއް ކަން ފާހަގަކުރައްވަމުން ފައިސަލް ވިދާޅުވީ މެންބަރުންގެ ގޮނޑި ގެއްލޭނެ ކަމަށް ގާނޫނު އަސާސީގައި އޮންނަ ގޮތް ސުލައިމާނަށް އެނގިވަޑައިގަންނަވާނެ ކަމަށެވެ. މެމްބަރުންގެ ގޮނޑި ގެއްލުވާލެވޭނީ ސުޕްރީމް ކޯޓުން ކަމަށް ގާނޫނު އަސާސީގެ 74 ވަނަ މާއްދާގައި ބުނެފައިވާއިރު، އެ ނޫން ގޮތަކަށް އިލެކްޝަންސް ކޮމިޝަނަށް އަމަލު ކުރެވޭނީ ގާނޫނު އަސާސީ ބަދަލުކޮށްގެން ކަމަށް ފައިސަލް ނަސީމް ވިދާޅުވި އެވެ.
ފައިސަލް ވިދާޅުވީ ދިވެހި ދައުލަތަކީ ހަމައެކަނި ރައީސުލްޖުމްހޫރިއްޔާ ނޫން ކަމަށާއި ރައީސުލްޖުމްހޫރިއްޔާގެ ހިދުމަތަށް މަސައްކަތް ކުރާ ފަދައިން ދައުލަތުގެ އެހެން މުއައްސަސާތަކުގެ މަސްއޫލިއްޔަތާއި ޒިންމާތައް އަދާކުރެވޭ ގޮތަށް ސަލާމަތީ ފަރާތްތަކުން މަސައްކަތް ކުރަންވާނެ ކަމަށެވެ. ނަމަވެސް މިއަދު ފެންނަނީ ދައުލަތުގެ އެންމެ ބާރުގަދަ މުއައްސަސާ ކަމުގައިވާ ރައްޔިތުންގެ މަޖިލީހަށް ސިފައިންނާއި ފުލުހުން ގާނޫނާ ހިލާފަށް ވަދެ މަޖިލީހުގެ ގާނޫނީ މަސައްކަތްތަކަށް ހުރަސް އެޅޭގޮތަށް އަމަލުކުރައްވާ މަންޒަރު ކަމަށެވެ.
