ތަކެތީގެ އަގު ކޮންޓްރޯލް ކުރުމަށް ޒިމްބާބުވޭއިން ރަން ފައިސާފޮއްޗެއް ތައާރަފު ކޮށްފިއެވެ.
އެ ޤައުމުން މި ފައިސާފޮތި ވިއްކާނީ އާއްމުކޮށް ބިޑަށް ހުޅުވާލައިގެންނެވެ. މި ފައިސާ ފޮއްޗަށް އެ ޤައުމުން ދީފައިވާ ނަމަކީ "މޯސި އޯ ޓުންޔާ" އެވެ. މި ފައިސާއަކީ ލިކުއިޑް އެސެޓެއްގެ ގޮތުގައި ބޭނުން ކުރެވޭ އެއްޗެކެވެ.
ލިކުއިޑް އެސެޓަކީ ބޭނުންވުމުން އެ އެއްޗެއް ފައިސާއަށް ބަދަލުކުރެވޭ ތަކެއްޗެވެ. މި ފައިސާ ފޮތިވެސް ނަގުދު ފައިސާއަށް ބަދަލު ކުރެވޭނެ ކަމަށާއި ޤައުމުގެ އެތެރޭގެ ވިޔަފާރިތަކާއި ބޭރުގެ ވިޔަފާރިތަކުގައި ވެސް މި ފައިސާފޮތި ބޭނުން ކުރެވޭނެ ކަމަށް ޒިންބާބުވޭގެ ރިޒަރވް ބޭންކުން ބުނެއެވެ.
މި ފައިސާފޮތި ނަގުދު ފައިސާއަށް ބަދަލު ކުރެވޭނީ އެ މީހެއްގެ މިލްކިއްޔާތުގައި ފައިސާފޮތި އޮންނަތާ މަދުވެގެން 180 ދުވަސް ވުމުންނެވެ.
އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ބުނެފައިވާ ގޮތުގައި ޒިންބާބުވޭގެ އިންފްލޭޝަން މިހާތަނަށް ވަނީ 837 އިންސައްތައަށް އިތުރުވެފައެވެ. މީގެ ސަބަބުން މީހުން ފައިސާ ފަހަށް ރައްކާކުރުމަށް އަސަރު ކޮށްފައިވާ ކަމަށާއި ޒިންބާބުވޭ ޑޮލަރުގެ ބަދަލުގައި އެމެރިކާ ޑޮލަރަށް ބަރޯސާވާ މިންވަރުވެސް އިތުރުވެފައިވާ ކަމަށް ވަނީ ބުނެފައެވެ.
ބޭރުގެ މީޑިއާތަކުން ރިޕޯޓް ކުރާ ގޮތުގައި ޒިމްބާބުވޭގައި ބައެއް ވިޔަފާރިތަކުން މިހާރު އެ ޤައުމުގެ ޑޮލަރު ގަބޫލެއް ނުކުރެއެވެ. އެ މީހުން ބޭނުންވަނީ އެމެރިކާ ޑޮލަރެވެ. މިކަންކަމަށް އަލަށް ތައާރަފު ކުރި ރަން ފައިސާފޮތިން ހައްލެއް ލިބޭނެ ކަމަށް އެ ޤައުމުން ގަބޫލުކުރެއެވެ.
މި ފައިސާފޮތި ހަދާފައިވަނީ 22 ކެރެޓް ރަނުންނެވެ. ރަނަކީ ބައިނަލްއަގުވާމީ މާކެޓުގައި ވެސް ބަލައިގަންނާނެ އެއްޗަކަށްވުމުން އޭގެ އަގު ނުވެއްޓި ހިފެހެއްޓޭނެއެވެ.
ޒިމްބާބުވޭއިން މި ފައިސާފޮތި ވިއްކަނީ ވެސް އެހާ އަގުބޮޑުކޮށެވެ. އެގޮތުން، ހޯމަ ދުވަހު ތައާޜަފު ކުރި މި ފައިސާ ފޮތީގެ އަގަކީ 1824 އެމެރިކާ ޑޮލަރެވެ. މިއީ އެ ޤައުމުގެ އެންމެ އާދައިގެ ދިރިއުޅުމުގައި ދިރިއުޅޭ ފަރާތްތަކަށް މާބޮޑު އަގަކަށްވާތީ ބައެއް ފަރާތްތަކުން ކަންބޮޑުވެއެވެ.
