ޤާނޫނުއަސާސީއަށް އިސްލާހުގެންނަން ދިން ވޯޓުގެ ނަތީޖާ ފެންނަ އިރު އެ މެމްބަރުން ހިތާމަކުރާނެ - ރޮޒައިނާ

ޤާނޫނުއަސާސީއަށް އިސްލާހު ގެނައުމަށް މިހާރު މަޖިލީހުގައި ތިބި މެމްބަރުން ދިން ވޯޓުގެ ނަތީޖާ ކުރިއަށް އޮތްތަނުގައި ފެންނައިރު އެ މެމްބަރުން އެކަމާޢި ހިތާމަ ކުރާނެ ކަމަށް އަންހެނުންގެ ރޫހުގެ ރައީސް ރޮޒައިނާ އާދަމް ވިދާޅުވެއްޖެއެވެ.

ރޮޒައިނާ އެފަދައިން ވިދާޅުވި އަންގާރަ ދުވަހުގެ ރޭ ބޭއްވި އެމްޑީޕީގެ ޤައުމީ މަޖިލީހުގެ ބައްދަލުވުމުގައި، ޤާނޫނުއަސާސީ އަށް ގެނައި ބަދަލު ދެމި އޮންނަ މުއްދަތުގައި ރައްޔިތުންގެ މަޖިލީހުގެ މެމްބަރަކު އެމްޑީޕީ އާއި ގުޅުމުގެ ސަބަބުން ޕާޓީން ވަކިކުރުމުގެ ސަބަބުން، މެމްބަރުކަން ގެއްލިއްޖެ ނަމަ އެ މެމްބަރަކު ނިސްބަތްވާ ދާއިރާގެ ބައި އިލެކްޝަންގައި އެ މެމްބަރަކު އަލުން އިންތިޚާބުކުރުމަށް ތާއީދުކޮށް ހުށަހެޅި ޤަރާރަށް ތާއީދުކޮށް ވާހަކަދައްކަވަމުންނެވެ.

19 ވަނަ މަޖިލީހުގައި އެމްޑީޕީގެ މެޖޯރިޓީ އޮތް އިރު މި ސަރުކާރާއި އެއް ފަދައަކުން ޤާނޫނުއަސާސީ އާއި ޤާނޫނުތަކަށް ބަދަލުގެނައުމުގެ ފުރުސަތު އޮތްކަމަށް ރޮޒައިނާ ފާހަގަކުރެއްވިއެވެ. އެހެންނަމަވެސް އެކަން އެގޮތަށް ކޮށްފައި ނުވަނީ ރައްޔިތުންނަށް ލިބޭ ހައްގުތައް ނިގުޅައިގަތުމަކީ އެމްޑީޕީން ޤަބޫލުކުރާ ކަމަކަށް ނުވާތީ ކަމަށް ރޮޒައިނާ ވަނީ ވިދާޅުވެފައެވެ. ތިންބާރު ވަކިވެފައިވާ ނިޒާމެއްގައި މިހާރު ފެނިގެން މިދިޔައީ ވެރިކަން ކުރުމާއި ރައްޔިތުންގެ މަޖިލީހުގެ ބާރު އެއްވި މަންޒަރު ކަމަށް ވެސް ރޮޒައިނާ ވިދާޅުވިއެވެ. ރިޔާސީ އިންތިޚާބުގެ ތެރޭގައި ވެސް މި ސަރުކާރު ވެރިކަމަށް އައިސްފި ނަމަ މިކަން މިހެން ހިނގާފާނެކަމުގެ ވާހަކަ ތަކުރާރުކޮށް ދައްކާފައިވާނެ ކަމަށް އޭނާ ފާހަގަކުރެއްވިއެވެ.

އެ ގަރާރަށް ބަހުސްކުރައްވަން މަޖިލީހުގެ އެމްޑީޕީގެ ޕީޖީ ލީޑަރ އިބްރާހިމް ނާޒިލް ވަނީ މަޖިލީހުގެ 93 މެމްބަރުން ތިބީ ތަޅު އެޅުވިފައި ކަމަށް ސިފަކުރައްވާފައެވެ. އެމްޑީޕީން ފާސްކުރި ގަރާރާއި އެކު ރައްޔިތުންގެ ހައްގުގައި މަސައްކަތްކުރަން އަނެއްކާވެސް ރަނގަޅު ފުރުސަތެއް ލިބިފައިވާ ކަމަށް ފާހަގަކުރައްވާ އެ މަގުން މަސައްކަތްކޮށްދެއްވުމަށް ނާޒިލް އެދިވަޑައިގަތެވެ. މި ގަރާރާއި އެކު މަޖިލިސް މެމްބަރުން ހޮވި އާއްމުންގެ ހައްގުގައި ވާހަކަދައްކަން އެމްޑީޕީ އިސްވެ ހޯދާދެވިފައިވާ ކަމަށް އޭނާ ވިދާޅުވިއެވެ. ރައީސުލްޖުމްހޫރިއްޔާ އަށް މެމްބަރުން ތަޅު ނޭޅުވޭނެ ކަމަށް ބުނުމުގެ ފުރުސަތު މަޖިލީހުގެ މެމްބަރުންނަށް މި ގަރާރުގެ ސަބަބުން ހޯދާދެވޭނެ ކަަމަށް ވެސް ނާޒިލް ވިދާޅުވިއެވެ.

މީގެ އިތުރުން ރައްޔިތުންގެ މަޖިލީހުގެ މަކުނުދޫ ދާޢިރާގެ ކުރީގެ މެމްބަރު މުހައްމަދު ރާއީ ވިދާޅުވީ އެ ގަރާރަކީ ރައީސް ޑރ.މުހައްމަދު މުއިއްޒު މެމްބަރުން ގައިގައި އެޅުވި މަރުތަޅު ނައްޓަން އެހީވެދޭނެ ގަރާރެއް ކަމަށެވެ. ޕީއެންސީގެ މެމްބަރުންވެސް ތިބީ ހިލިހިލާ ޖެހިފައި ކަމަށް އޭނާ ވިދާޅުވިއެވެ. މި ގަރާރުން ޤާނޫނުއަސާސީ އަށް ގެނައި ބަދަލާއި ދެކޮޅު މެމްބަރުންނަށް އެ ވާހަކަދައްކަން ފުރުސަތު ލިބޭނެ ކަމަށް ރާއީ ވިދާޅުވިއެވެ. ޕީއެންސީގައި ތިބި ބައެއް މެމްބަރުންނަކީ ވެސް ޤާނޫނުއަސާސީ އަށް ގެނައި އިސްލާހާއި ދެކޮޅު މީހުންކަމަށް އޭނާ ވަނީ ވިދާޅުވެފައެވެ.

އެ ގަރާރަށް ބަހުސްކުރައްވަމުން ގައްދޫ ދާއިރާގެ ރައީސް އަދި ނިމިދިޔަ ސަރުކާރުގައި ފެނަކަ ކޯޕަރޭޝަންގެ އެމްޑީއަކަށް ހުންނެވި އަހުމަދު ސައީދު މުހައްމަދު ވިދާޅުވީ ރާއްޖޭގައި ސިޔާސީ ޕާޓީ އުފެދުނީއްސުރެ އެމްޑީޕީން މަސައްކަތްކުރަމުން ދަނީ ގެއްލޭ ކޮންމެ ހައްގެއް ވެސް ހޯދާދިނުމަށް ކަމަށެވެ. އެ ހައްގުތައް ހޯދާދެވޭކަން ކަށަވަރުކުރުމަށް އެމްޑީޕީން ކެނޑިނޭޅި މަސައްކަތް ކުރާ ކަމަށް އޭނާ ވިދާޅުވިއެވެ. އެމަގުން ކަންކަން އިސްލާހުކުރަން މަސައްކަތްކުރުމުގައި ވަކި ބަޔަކު އިސްތިސްނާ ނުކޮށް އެންމެން އެކުގައި މަސައްކަތްކުރުމަށް ތާއީދުކުރައްވާ ކަމަށް އޭނާ ވިދާޅުވިއެވެ.

ޤާނޫނުއަސާސީ އަށް ގެނައި ބަދަލު ދެމި އޮންނަ މުއްދަތުގައި ރައްޔިތުންގެ މަޖިލީހުގެ މެމްބަރަކު އެމްޑީޕީ އާއި ގުޅުމުގެ ސަބަބުން ޕާޓީން ވަކިކޮށް، މެމްބަރުކަން ގެއްލިއްޖެ ނަމަ އެ މެމްބަރަކު ނިސްބަތްވާ ދާއިރާގެ ބައި އިލެކްޝަންގައި އެ މެމްބަރަކު އަލުން އިންތިޚާބުކުރުމަށް ތާއީދުކޮށް އެކަމަށް މަސައްކަތް ކޮށްދިނުމަށް އެމްޑީޕީގެ ޤައުމީ މަޖިލީހުން ވަނީ ފާސްކޮށްފައެވެ. ޤާނޫނުއަސާސީ އަށް ގެނައި ބަދަލާ ގުޅޭގޮތުން ޤައުމީ މަޖިލީހަށް އެ ގަރާރު ހުށަހެޅުއްވީ އަންގާރަ ދުވަހުގެ ރޭ ކޮލަމާފުށީ ދާއިރާގެ ރައީސް މަހްފޫޒް ސައީދުއެވެ.