އަންހެނުން ލީޑަރޝިޕްގައި ތިބުމަށް އުސޫލުތަކަށް ގެނެވިދާނެ ބަދަލުތައް ބަލާ ދިރާސާކުރުން މުހިންމު ކަމަށް ރޮޒައިނާ ވަނީ ވިދާޅުވެފަ
އެމްޑީޕީގެ އަންހެނުންގެ ރޫހުގެ ރައީސާ ރޮޒެއިނާ އާދަމް
ޕާޓީތަކުގެ އިސް މަޤާމުތައް ދޭ އިރު މިންތީގެ ހަމަހަމަކަން ޤާއިމްކުރުން ވަރަށް މުހިންމު ކަމަށް ރައްޔިތުންގެ މަޖިލީހުގެ ކުރީގެ މެމްބަރު އަދި އެމްޑީޕީގެ އަންހެނުންގެ ރޫހުގެ ރައީސާ ރޮޒެއިނާ އާދަމް ވިދާޅުވެއްޖެއެވެ.
އެމްޑީޕީގެ އަސާސީ ގަވައިދަށް ގެންނަން ފެންނަ ބަދަލުތައް އަންހެނުންގެ ރޫހާ ހިއްސާ ކުރުމަށް މިހާރު ހުޅުވާލާފައިވާ ފުރުސަތާއި ގުޅިގެން ރާއްޖެއެމްވީ އަށް މައުލޫމާތުދެއްވަމުން އޭނާ ވިދާޅުވީ ސިޔާސީ ޕާޓީތަކުގެ އިސް މަޤާމުތަކާއި ސަރުކާރުތަކުގައި އަންހެނުންގެ ބައިވެރިވުން އޮތުން ވަރަށް މުހިންމު ކަމަށެވެ. އެހެންކަމުން އަންހެނުން ލީޑަރޝިޕްގައި ތިބުމަށް އުސޫލުތަކަށް ގެނެވިދާނެ ބަދަލުތައް ބަލާ ދިރާސާކުރުން މުހިންމު ކަމަށް ރޮޒައިނާ ވަނީ ވިދާޅުވެފައެވެ. އެގޮތުން ކޮމިޓީތަކާއި ޤައުމީ މަޖިލީހުގައި ވެސް އަންހެނުންގެ ދައުރު ފުޅާކުރަން ޖެހޭ ކަމަށް ރޮޒައިނާ ފާހަގަކުރެއްވިއެވެ.
ރާއްޖެއެމްވީ އަށް ދެއްވި ބަސްތީގަތުމުގައި ރޮޒައިނާ ވިދާޅުވީ ޕާޓީ ވަރުގަދަކުރުމަށާއި ނިންމުންތައް ހަރުދަނާކުރުމަށް އަންހެނުންގެ ބައިވެރިވުން ވަރަށް މުހިންމު ކަމަށެވެ. އަދި ޕާޓީގެ އިސް ސަފުގައި އަންހެނުން ތިބުމަކީ މުހިންމު ކަމެއް ކަމަށް ވާއިރު ހަމަހަމަ އުސޫލަކުން ފުރުސަތު ލިބޭނެ ގޮތްތަކެއް ކަނބަލުންނަށް ހޯދާދިނުން މުހިންމު ކަމަށް ރޮޒައިނާ ވަނީ ވިދާޅުވެފައެވެ.
ހަމައެހެންމެ މި އަހަރުގެ އަންހެނުންގެ ދުވަހުގެ ޝިއާރުކަމަށްވާ އެކްސެލެރޭޓް އެކްޝަން ޝިއާރާއި އެއްގޮތަށް އެމްޑީޕީގެ އެންމެ ބޮޑު މަގްސަދަކީ ސިޔާސީ މައިދާނުގައި އަންހެނުން ބާރުވެރިކުރުވުން ކަމަށް ރޮޒައިނާ ވިދާޅުވިއެވެ. ރޮޒައިނާ ވަނީ ކެބިނެޓާއި އިސް މަޤާމުތަކުގައި މި ސަރުކާރަށް ބަލާ އިރު ތިބީ ވަރަށް މަދު ބައެއްކަން ފާހަގަކުރައްވާފައެވެ. އެހެންކަމުން ޤައުމުގެ ކަންކަން ނިންމާ ފެންވަރުގައި މިހާރުވެސް އަންހެނުން ވަރަށް މަދުކަމަށް އޭނާ ވިދާޅުވިއެވެ. އަދި ކޮންމެ ޕާޓީއެއްގައި ވެސް އަންހެނުންގެ ގޮތްޕެއް އޮތް ނަމަވެސް ލީޑަރޝިޕްގެ މަޤާމްތަކުގައި އެންމެ އެކަށީގެންވާ ގޮތަށް ކަނބަލުން ނެތް ކަމަށް ރޮޒައިނާ ވިދާޅުވިއެވެ.
އެމްޑީޕީގެ ލީޑަރޝިޕްގައި އަންހެނުން އިތުރުކުރުމަށާއި އެ ޕާޓީ ހިންގުމުގައި އަންހެނުންގެ ދައުރު ފުޅާކުރުމަށްޓަކާ، ޕާޓީގެ އަސާސީ ގަވާއިދަށް ގެންނަން ފެންނަ ބަދަލުތައް ހުށަހެޅުމަށް އާއްމު މެމްބަރުންނަށް ފުރުސަތު ހުޅުވާލާފައިވަނީ އަންގާރަ ދުވަހުން ފެށިގެންނެވެ. އެގޮތުން އެ ފުރުސަތު މި މަހުގެ 20 ވަނަ ދުވަހުގެ 14:00 އާ ހަމަޔަށް ވަނީ ހުޅުވާލާފައެވެ. އެ މުއްދަތުގެ ތެރޭގައި، އީމެއިލް: womenswing@mdp.org.mv މެދުވެރިކޮށް ބަދަލުތައް ހުށަހެޅުމުގެ ފުރުސަތު ވަނީ ހުޅުވާލާފައެވެ.
