"ލޫޓުވައިފި ލޫޓުވައިފި" ބޮޑު އެއްވުމަށް ތައްޔާރުވުމުގެ ގޮތުން "އަންހެނުންގެ އަޑު" ހަރަކާތް މާލޭގައި ކުރިއަށް ގެންގޮސްފި
އެމްޑީޕީން މާލޭގައި 'ލޫޓުވައިފި، ލޫޓުވައިފި' ނަމުގައި ބޮޑު އެއްވުމަކަށް ދަނީ ތައްޔާރުވަމުން
"ލޫޓުވައިފި، ލޫޓުވައިފި" ބޮޑު އެއްވުމަށް ތައްޔާރުވުމުގެ ގޮތުން "އަންހެނުންގެ އަޑު"
"ލޫޓުވައިފި، ލޫޓުވައިފި" ބޮޑު އެއްވުމަށް ތައްޔާރުވުމުގެ ގޮތުން "އަންހެނުންގެ އަޑު" ހަރަކާތް މާލޭގައި ކުރިއަށް ގެންގޮސްފި އެވެ.
އަންގާރަ ދުވަހު ހަވީރު އާރޓިފިޝަލް ބީޗުން ފެށި މިހަރަކާތަކީ، އަންނަ އޮކްޓޫބަރު މަހުގެ ތިން ވަނަ ދުވަހު އެ ޕާޓީން ބޭއްވުމަށް ތައްޔާރުވަމުން ދާ "ލޫޓުވައިފި ލޫޓުވައިފި" ބޮޑު ހަރަކާތަށް ތައްޔާރުވުމަށާއި އަދި އެހަރަކާތުގައި ވީހާވެސް ގިނަބަޔަކު ބައިވެރިކުރުމަށް ހިތް ވަރުދިނުމަށް ގޮވާލާ ހިންގި ހަރަކާތެއް ކަމަށް އެމްޑީޕީން ބުނެއެވެ.
މިހަރަކާތުގައި ރައީސް ޑރ. މުހައްމަދު މުއިއްޒު ރައްޔިތުންނަށް ވެފައިވާ ވައުދުތައް، ސަރުކާރަށް ހަނދާންކޮށްދިނުމުގެ ގޮތުން އަންހެނުން ވަނީ ބޯޑުތަކެއްގައި މިވައުދުތައް ލިޔެގެން މާލޭގެ ބޮޑެތި މަގުތަކުގައި ޝުއޫރުފާޅުކޮށްފަ އެވެ.
އެމްޑީޕީގެ މި ހަރަކާތުގައި އެޕާޓީގެ އިސް ސަފުގައި ހަރަކާތްތެރިވާ ގިނަ އަދަދެއްގެ ބޭފުޅުން ވަނީ ބައިވެރިވެފަ އެވެ. އެގޮތުން މިވަގުތު ރައްޔިތުން މަޖިލީހުގައި ކުރީގެ މެމްބަރުންނާއި ލީޑަރޝިޕްގެ އިސް ސަފުގައި ހަރަކާތްތެރިވާ ބައެއް ފަރާތްތަކުން ވަނީ ބައިވެރިފައެވެ.
އެގޮތުން ކުރީގެ މަޖިލިސް މެމްބަރު ރޮޒައިނާ އާދަމް ވިދާޅުވީ ތަކެތީގެ އަގުތައް އިންތިހާއަށް ބޮޑުވެފައިވާއިރު، ރައްޔިތުންގެ ޓެކްސް ފާއިސާއިން އެތައް ބޭކާރު ހަރަދުކުރައްވަމުން ގެންދަވާ ކަމަށް ވިދާޅުވި އެވެ. އަދި ކުރީ ސަރުކާރުގެ ބޮލުގައި ހުރިހާ ކަމެއް އަޅުވަމުން ރައްޔިތުންނަށް އޮޅުވާ ދޮގު ހައްދަވަމުން ގެންދަވާތީ ރައްޔިތުންނަށް މިއަދު އެކަން ބަލައި ނުގަނެވޭނެ ކަމަށް ރޮޒެއިނާ ވިދާޅުވި އެވެ.
ކުރީގެ ސްޓޭޓް މިނިސްޓަރ އިފްހާމް ހުސެއިން ވިދާޅުވީ ބޭސް ސިޓީއަށް ސަލާން ޖަހަން ޖެހިފައިވާއިރު ކަރަންޓް ބިލުންވެސް މިސަރުކާރުން ގެންދަނީ ވައްކަން ކުރަމުން ކަމަށެއެވެ.
އަދި ކުރީގެ ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވީ އެމްޑީޕީން 3 އޮކްޓޯބަރުގައި ނިކުންނަނީ ރައްޔިތުންގެ ފާއިސާއިން ރައީސް މުއިއްޒު މުޅި ގައުމު ލޫޓްވަމުންދާތީ، ގިނަ އަދަދެއްގެ ރައްޔިތުންގެ އެދުމުގެ މަތިން ކަމަށެއެވެ. އަދި ރައީސް މުއިއްޒުއަށް ދެ އަހަރު ދުވަހު ވެރިކަމުގައި ހުންނަވަން ފުރުޞަތު ދިން ނަމަވެސް ރައްޔިތުންނަށް ކޮށްދިން އެއްވެސް ކަމެއް ނެތް ކަމަށް މާރިއާ ވިދާޅުވި އެވެ.
'ޕިކަޕް ޖަލްސާ' މާލޭގެ އެކި ސަރަހައްދުތަކުގައި ކުރިއަށް ގެންދިޔަ މި ހަރަކާތުގައި ރައީސް މުއިއްޒުގެ ސަރުކާރުން ރައްޔިތުންގެ ހައްގުތަކަށް އަރައިގަނެ، ރައްޔިތުންގެ ބޭސްފަރުވާ އަށާއި، ޑޮލަރުގެ އަގު ބޮޑުވުމާއި، ތަކެތީގެ އަގު މައްޗަށް ދިއުން ފަދަ ދިރިއުޅުމަށް ދަތިވާ އެތައް ކަމެއް ކުރަމުން ގެންދާކަން ފާހަގަ ކޮށް ނުރުހުމުގެ ޝުއޫރު ފާޅު ކޮށްފައިވެއެވެ.
އެމްޑީޕީގެ ގިނަ ހަރަކާތްތެރިންނާއި ސަޕޯޓަރުން ބައިވެރިވި މި ހަރަކާތުގައި އަދުގެ ސަރުކާރުން ގާނޫނު އަސާސީ އަށާއި ގާނޫނުތަކަށް ބަދަލުތައް ގެނެސް ރައްޔިތުންގެ އެންމެ އަސާސީ ހައްގުތަކަށް އަރައިގަންނާތީ އެކަމާ ނުރުހުން ފާޅުކޮށް ވާހަކަ ދެއްކުން އޮތެވެ.
މި ހަރަކާތުގެ ތެރޭން މާލޭގެ ބޮޑެތި މަގުތަކުގައި، އަންނަމަހު 3 ވަނަ ދުވަހު މާލޭގައި، 'ލޫޓުވައިފި، ލޫޓުވައިފި' ނަމުގައި ބޭއްވުމަށް ތައްޔާރުވަމުންދާ ބޮޑު އެއްވުމަށް ތައްޔާރު ކޮށްފައިވާ ޚާއްސަ ލަވަ ޖެހުމާއި އެކު އެ އެއްވުމުގައި ވީހާވެސް ގިނަ ބަޔަކު ބައިވެރިވުމަށް ދައުވަތު ދީފައިވެއެވެ.
