މަޖިލީހުގެ 33 އިންސައްތަ އަންހެނުންނަށް ޚާއްސަ ކުރާ އިސްލާހުގެ މަސައްކަތް އަވަސްކޮށްދޭން ރޮޒެއިނާ އެދިވަޑައިގެންފި

ރައްޔިތުން މަޖިލީހުގެ މެންބަރުންގެ އަދަދުގެ 33 އިންސައްތަ އަންހެނުންނަށް ޚާއްސަކުރުމަށް ހުށަހަޅާފައިވާ އިސްލާހުގެ މަސައްކަތް 7 މެންބަރުންގެ ވަގުތީ ކޮމެޓީއަކަށް ފޮނުވައިގެން 19 ވަނަ މަޖިލީހުން އެ އިސްލާހު ފާސްކޮށްދިނުމަށް އައްޑޫމީދޫ ދާއިރާގެ މެންބަރު ރޮޒައިނާ އާދަމް އެދިވަޑައިގެންފިއެވެ.

ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް އިސްލާހު ގެނައުމުގެ ބިލު ހުށަހަޅުއްވާފައި މެންބަރު ރޮޒެއިނާ ވިދާޅުވީ މި ބިލު ހުށަހެޅުއްވުމުގެ ބޭނުމަކީ މަޖިލީހަށް އިންތިޚާބުވާ މެންބަރުން ތެރޭގައި އަންހެނުން ހިއްސާ ކަށަވަރުކުރުމަށާއި، ރައްޔިތުންގެ މަސްލަހަތާއި ގައުމީ މަސްލަހަތު ހިމާޔަތް ކުރުމުގައި އަންހެނުންގެ ދައުރު އިތުރުކޮށް ގައުމުގެ މުހިންމު ނިންމުންތަކުގައި އަންހެނުންގެ ބަސް ހިމެނުމަށާއި، ރައްޔިތުންގެ މެދުގައި އަންހެނުން ބައިވެރިވުން އިތުރުކޮށް ސިޔާސީ މައިދާނުގައި އަންހެނުންނަށް ފުރުސަތުތަކެއް ހުޅުވާލަދީ ސިޔާސީ މައިދާނުގައި އަންހެނުން ނިސްބަތް އިތުރު ކުރުން ކަމަށެވެ.

Advertisement

މެންބަރު ރޮޒެއިނާ ވިދާޅުވީ ފުރުސަތު ހަމަހަމައަށް ދިނުމުން ހަމަހަމަކަން ގާއިމްކުރެވޭތޯ އެއީ މިއަދު އުފައްދަންޖެހޭ ސުވާލެއް ކަމަށެވެ. މަޖިލީހަށް އިޝާރަތް ކުރައްވައި މެންބަރު ރޮޒައިނާ ވިދާޅުވީ 90 ފިރިހެނުން އިންތިޚާބުވާއިރު، 3 އަންހެނުން އިންތިޚާބުވުމަކީ ހަމަހަމަވުން ނޫން ކަމަށެވެ. ގާނޫނުން ކަނޑައަޅާފައި އޮންނަ ގޮތަކަށް ރައްޔިތުން ވޯޓުލާ ކަމަށާއި، ސިޔާސަތު ބައްޓަން ކުރާއިރުގައި ހަމަހަމަކަން ގެނައުމަށް އެ ސިޔާސަތުތައް ބައްޓަން ކުރަންޖެހޭ ކަމަށް އޭނާ ވިދާޅުވިއެވެ.

ކައުންސިލްތަކަށް ވެސް ކޯޓާ ކަނޑައެޅިކަން ފާހަގަކުރައްވައި މެންބަރު ރޮޒެއިނާ ވިދާޅުވީ މިއަދު ކައުންސިލްތަކުގައި ހަމަހަމަކަމާއެކު އަންހެނުންނާއި ފިރިހެނުން ތިބޭ ކަމަށާއި، ހެޔޮ ބަދަލެއް ގެނެވިފައިވާ ކަމަށެވެ. އެހެންކަމުން މަޖިލީހުގައި ވެސް އަންހެނުންނަށް ޚާއްސަ ކޯޓާއެއް ކަނޑައަޅައި، މަސައްކަތްކޮށްފިނަމަ ހެޔޮ ބަދަލެއް ގެނެވޭނެ ކަމަށް މެންބަރު ރޮޒެއިނާ ވިދާޅުވިއެވެ. އަދި ވިދާޅުވީ ކުރީބައިގައި އިލެކްޝަންސް ކޮމިޝަނަށް ވެސް އަންހެނުން ކުރިމަތިލާނެ ދާއިރާތައް ކަނޑައެޅުމުގެ ފުރުސަތު ލިބޭނެ ކަމަށެވެ.

މީގެ ކުރިން ރާއްޖޭގެ ގާނޫނު އޮތްގޮތުން ވެރިކަމަށް ވެސް ކުރިމަތިލެވެނީ 45 އަހަރުން މަތިވުމުންކަން ފާހަގަކުރައްވައި މެންބަރު ރޮޒެއިނާ ވިދާޅުވީ އެ ގާނޫނަށް ވެސް އިސްލާހު ހުށަހަޅައިގެން ބަދަލުކުރީ ކަމަށެވެ. އެހެންކަމުން މިއަދު 35 އަހަރަށްވުރެ މަތިވުމުން ވެރިކަމަށް ކުރިމަތިލެވޭ ކަމަށް އޭނާ ވިދާޅުވިއެވެ.

ދުނިޔޭގެ ދިރާސާތަކަށް އިޝާރާތް ކުރައްވައި މެންބަރު ރޮޒެއިނާ ވިދާޅުވީ ދެޖިންސް ހަމަހަމަކޮށް މަސައްކަތް ކުރުމުން ބިނާކުރަނިވި ހިޔާލާއި އުފެއްދުންތެރިކަމާއި މައްސަލަތައް ނިންމުމުގައި ރަނގަޅު ގޮތްތައް އިހްތިޔާރުކުރެވޭ ކަމަށެވެ. އދ ފާހަގަކޮށްފައިވާ ކަންތައްތަކަށް ރިޔާއަތްކޮށް މެންބަރު ރޮޒެއިނާ ވިދާޅުވީ އަންހެނުންގެ ބައިވެރިވުން އޮންނަ ރައްޔިތުން މަޖިލިސްތަކުގައި ސިއްހީ ދައިރާއާއި އަންހެނުންގެ ސިއްހަތާއި ގުޅުންހުރި ކަންކަމާއި، އިޖްތިމާއީ މައްސަލަތަކަށް ހައްލު ހޯދުމުގައި އިތުރު ކުރިއެރުން ލިބޭ ކަމަށެވެ. އަދި ތައުލީމީ ދާއިރާއާއި، ކުޑަކުދިންގެ މައްސަލަތަކަށް އިތުރު ސަމާލުކަން ދޭކަން ފާހަގަކުރެވޭ ކަމަށް އޭނާ ވިދާޅުވިއެވެ.

ރާއްޖޭގެ ހާލަތަށް އަލިއަޅުއްވާލައްވައި މެންބަރު ރޮޒެއިނާ ވިދާޅުވީ ވޯޓަށް ފައިސާގެ ނުފޫޒު މިހާރު ވަންނަ ގޮތަށް ވަންނަ ކަމަށްވާނަމަ ކުރިއަށް އޮތް ރައްޔިތުން މަޖިލީހުގައި އެންމެ އަންހެނަކު ނެތުމަކީ އެކަށީގެންވާ ކަމެއް ކަމަށެވެ. އަދި ދުނިޔޭގެ 132 ގައުމެއްގައި ކޯޓާ އަންހެނުންނަށް މަޖިލިސްތަކުގައި ކަނޑައެޅިފައިވާއިރު، ރާއްޖޭގައި ވެސް ކޯޓާ ކަނޑައަޅަންޖެހޭ ކަމަށް އޭނާ ވިދާޅުވިއެވެ.

މެންބަރު ރޮޒެއިނާ ވަނީ 7 މެންބަރުންގެ ކޮމެޓީއަކަށް މި އިސްލާހު ފޮނުވައި، މި ދައުރުގެ ތެރޭގައި މަސައްކަތް ނިންމައިދިނުމަށް އެދިވަޑައިގެންފައެވެ. އަދި ކޮމެޓީ މަރުހަލާގައި ގެންނަންޖެހޭ ރަނގަޅު ބަދަލުތައް ގެނައުމަށް ވެސް މެންބަރު ރޮޒެއިނާ އެދިވަޑައިގެންފައިވެއެވެ. މަޖިލީހުން އަންހެނުންނަށް 33 އިންސައްތަ ކޯޓާއެއް ކަނޑައެޅުމަކީ ފިރިހެނުންގެ ހައްގު ގެއްލޭނެ ކަމެއް ނޫން ކަމަށް މެންބަރު ރޮޒެއިނާ ވިދާޅުވިއެވެ.