93 ގޮނޑީގެ ތެރެއިން އެންމެ 3 ގޮނޑި އަންހެނުންނަށް ލިބުމަކީ ލަދުވެތި ކަމެއް ކަމަށް މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ ވަނީ އެކްސްގައި އެކަމާއި މެދު ކަންބޮޑުވުން ފާޅުކުރައްވާ ޕޯސްޓެއް ހިއްސާކުރައްވާފައެވެ. އަދި މިއީ ލަދުވެތިކަމެއް ކަމަށާއި މިކަމުން އެނގެނީ ރާއްޖެ އަށް ކިހާ ބޮޑަށް ކޯޓާ ސިސްޓަމެއްގެ ބޭނުން ޖެހިފައިވާކަން ކަމަށް ރޮޒައިނާ ވިދާޅުވިއެވެ. އަދި އަންހެނުން ތަމްސީލްކުރާ އިންސައްތަ އެހާ ދަށްވުމަކީ ޤައުމެއްގެ ހައިސިއްޔަތުން ވެސް ވަރަށް ލަދުގަންނަން ޖެހޭ ކަމެއް ކަަމަށް އޭނާ ވަނީ ވިދާޅުވެފައެވެ.
2009 ވަނަ އަހަރު މަޖިލީހަށް 5 ކަނބަލުން، 2019 ވަނަ އަހަރު 4 ކަނބަލުން ވަނީ ހޮވިވަޑައިގަންނަވާފައެެވެ. އެހެންކަމުން އަންހެން މެމްބަރުންގެ ނިސްބަތް ދަނީ ފަހަރަކުން ފަހަރަކަށްއި ދަށަށެވެ. އަނެއްކޮޅުން މަޖިލިސް މެމްބަރުންގެ އަދަދު ދަނީ އިތުރުވަމުންނެވެ. އެހެންކަމުން މިއީ ފިޔަވަޅު އަޅަން ޖެހޭ ކަމެއް ކަމަށް ރޮޒައިނާ ވަނީ ވިދާޅުވެފައެވެ. ރޮޒައިނާ ވަނީ އޭނާ ހުށަހަޅުއްވާފައިވާ ކޯޓާގެ އިސްލާހު އެޖެންޑާގައި ހިމަނާދެއްވުމަށް މަޖިލީހުގެ ރައީސް މުހައްމަދު އަސްލަމްގެ ކިބައިން އެދިވަޑައިގަންނަވާފައެވެ.
ރައްޔިތުންގެ މަޖިލީހުގެ 33 އިންސައްތައަކީ އަންހެނުންކަމަށް ކަނޑައެޅުމަށް ޤާނޫނު އަސާސީ އަށް އިސްލާހެއް ރޮޒައިނާ ވަނީ ހުށަހަޅުއްވާފައެވެ. އައްޑޫ މީދޫ ދާއިރާގެ މެންބަރު ރޮޒައިނާ އާދަމް މި އިސްލާހު ހުށަހަޅުއްވާފައި ވަނީ 28 ފެބްރުއަރީ 2024ގައެވެ.
މި ބިލު ހުށަހެޅުމުގެ ބޭނުމަކީ ރައްޔިތުންގެ މަޖިލީހަށް އިންތިޚާބުވާ މެންބަރުންގެ ތެރޭގައި އަންހެނުންގެ ހިއްސާ ކަށަވަރުކުރުމަށާއި ރައްޔިތުންގެ މަސްލަހަތާއި ގައުމީ މަސްލަހަތު ހިމާޔަތްކުރުމުގައި އަންހެނުންގެ ދައުރު އިތުރުކޮށް، ގައުމުގެ މުހިންމު ނިންމުންތަކުގައި އަންހެނުންގެ ބަސް ހިމެނުން ކަމަށް ރޮޒައިނާ ވިދާޅުވިއެވެ. މީގެ އިތުރުން ރައްޔިތުންގެ މެދުގައި އަންހެނުންގެ ބައިވެރިވުން އިތުރުކޮށް، ސިޔާސީ މައިދާނުގައި އަންހެނުންނަށް ފުރުސަތުތަކެއް ހުޅުވާދީ، ސިޔާސީ މައިދާނުގައި އަންހެނުންގެ ނިސްބަތް އިތުރުކުރުމަކީ ވެސް މި ބިލްގެ މަޤްސަދެއް ކަމަށް ރޮޒައިނާ ވިދާޅުވިއެވެ.
ޤާނޫނު އަސާސީ އަށް އިސްލާހު ގެނައުމަށް ހުށަހަޅާފައި ވަނީ 71 ވަނަ މާއްދާގެ (ށ)ގެ ފަހަތަށް އަކުރުތަކެއް އިތުރުކުރުމަށެވެ.
އޭގެ ތެރޭގައި 71 ވަނަ މާއްދާގެ (ހ)ގެ ދަށުން ކަނޑައަޅާ މެމްބަރުންގެ 33 އިންސައްތަ ޚާއްސަކުރަންވާނީ އަންހެނުން ކަމަށް ބަޔާންކޮށް އެ މާއްދާގެ (ނ)ގެ ގޮތުގައި އަކުރެއް އިތުރުކުރުން ހިމެނެއެވެ.
އަދި މެންބަރުން އިންތިޚާބު ކުރާ ދާއިރާތައް ކަނޑައަޅާނީ ގުރުއަތުލައިގެން ކަމަށާއި އަންހެން މެންބަރުން އިންތިޚާބުކުރާނެ ދާއިރާތައް ކަނޑައަޅާނީ ދާއިރާތައް ހަމަހަމަވާނެ އުސޫލަކުން ދައުރުވާ ގޮތަށް ކަމަށް ބަޔާންކޮށް (ރ)ގެ ގޮތުގައި 71 ވަނަ މާއްދާ އަށް އަކުރެއް އިތުރުކުރުމަށް ވަނީ ހުށަހަޅުއްވާފައެވެ. އަދި މި އުސޫލު ކަނޑައަޅާގޮތް ބަޔާން ކުރަންވާނެ ކަމަށް ވަނީ ބުނެފައެވެ.
ތިން ވަނަ އަކުރަކީ (ބ)އެވެ. އެބައިގައި ބުނެފައިވަނީ ދާއިރާތައް ކޯޓާގެ ދަށުން ތަމްސީލްވެ ނިމުމުން، އެ އަކުރުގައިވާ ނިސްބަތުން އަންހެނުން ދެން އިންތިޚާބުކުރުމާ މެދު މަޖިލީހުން ގޮތެއް ކަނޑައަޅަން ވާނެ ކަމަށެވެ.
މީގެ އިތުރުން މި ޤާނޫނަށް އަމަލުކުރަން ފެށުމަށް ފަހު ރައްޔިތުންގެ މަޖިލިސް އިންތިޚާބުގެ ޤާނޫނުގެ ދަށުން އިއުލާން ކުރާ ފުރަތަމަ އިންތިޚާބު ބާއްވާނީ ޤާނޫނުގައި ކަނޑައަޅާ ގޮތުގެ މަތިން ކަމަށް ވެސް ވަނީ ބުނެފައެވެ. އެހެންކަމުން މި ބިލު ފާސްވެ ޤާނޫނަކަށް ވެއްޖެ ނަމަ 2029 ވަނަ އަހަރު ބާއްވާ މަޖިލިސް އިންތިޚާބު ބާއްވަން ޖެހޭނީ މި ޤާނޫނާއި އެއްގޮތަށެވެ.
