ހަމްސިކް ނަޕޯލީ ދޫކޮށްލަނީ..؟

އިޓަލީގެ ނަޕޯލީއަށް ކުޅެމުންއަންނަ ސްލޮވޭކިއާގެ ތަޖުރިބާކާރު މިޑްފީލްޑަރ މެރެކް ހަމްސިކް ނަޕޯލީ ދޫކޮށްލަން އުޅޭކަމުގެ އަޑުތައް މީޑިއާގައި ފެތުރެން ފަށައިފިއެވެ.

ހަމްސިކް ނަޕޯލީ ދޫކޮށް އެހެން ކުލަބަކަށް ބަދަލުވުމަށް ތައްޔާރު ވަމުން އަންނަ ކަމަށް އެންމެ ބޮޑަށް އަޑުފަތުރާފައިވަނީ އިޓަލީގެ މީޑިއާތަކުންނެވެ.

އިޓަލީގެ މީޑިއާތަކުން ޚަބަރު ފަތުރާގޮތުގައި ހަމްސިކް ދިއުމަށް ތައްޔާރުވަނީ މެންޗެސްޓާ ޔުނައިޓެޑަށެވެ. އެހެން ނަމަވެސް އަދި މެންޗެސްޓާ ޔުނައިޓެޑުން ހަމްސިކް ހޯދުމަށް ނަޕޯލީއާ ވާހަ ދައްކާފައިވާ ކަމެއް ނުވަތަ ނޫންކަމެއްވެސް މި ރިޕޯޓްގައި ބަޔާންކޮށްފައެއް ނުވެއެވެ.

މީޑިއާ ރިޕޯޓްތަށް ބުނާގޮތުން އުމުރުން 30 އަހަރުގެ މިޑްފީލްޑަރ ދިއުން އެންމެ ގާތް ކުލަބަކީ މެންޗެސްޓާ ޔުނައިޓެޑެވެ. ބައެއް ރިޕޯޓްތަށް ބުނާގޮތުގައި މީގެ ކުޑަ ދުވަސްކޮޅެއް ކުރިން ހަމްސިކް ވަނީ ނަޕޯލީ ދޫކޮށް އެހެން ކުލަބަކަށް ބަދަލުވާނެ ކަމުގެ އިޝާރާތެއްވެސް ކޮށްފައެވެ.

މީގެ ކުޑަ ދުވަސްކޮޅެއް ކުރިން މީޑިއާއަށް ދިން ބަސްދީގަތުމެއްގައި ހަމްސިކް ވަނީ ދުނިޔޭގެ މަސްހޫރު ބޮޑު ކުލަބަކުން ހުށައެޅުމެއް އަތުވެއްޖެ ނަމަ ނޫނެކޭ ބުނަން ވަރަށް އުނދަގޫވާނެ ކަމަށްބުނެފައެވެ.

އަދި އެކަހަލަ ފުރުސަތެއް ލިބިއްޖެނަމަ ނަޕޯލީ ދޫކޮށްލުން ގާތް ކަމަށްވެސް ހަމްސިކް ވަނީ ބުނެފައެވެ. ހަމްސިކް ވަނީ އޭނާ ދާން ބޭނުން ކުލަބުތަކުގެ ނަންވެސް ހާމަ ކޮށްފައެވެ. އޭގެ ތެރޭގައި ސްޕެއިންގެ ބާސެލޯނާ ، ޖަރުމަނުގެ ބަޔާން މިޔުނިކް، ޕީއެސްޖީ އަދި މެނެޗެސްޓާ ޔުނައިޓެޑް ހިމެނޭ ކަމަށް އޭނާ ބުންޏެވެ.

އެހެން ނަމަވެސް ރަސްމީކޮށް ކުލަބު ދޫކޮށްލަން އުޅޭކަމުގެ އިޝާރާތެއް ހަމްސިކް ދީފައި ނުވާކަމަށް ރިޕޯޓްތަށް ބުނެއެވެ.

2007 ވަނަ އަހަރު ބްރެސިއާއިން އިޓަލީގެ ނަޕޯލީއާ ގުޅުނު ހަމްސިކް ވަނީ މިހާތަނަށް އެޓީމަށް ޖުމުލަ 359 މެޗު ކުޅެދީ 93 ގޯލް ޖަހައިދީފައެވެ.