މެންޗެސްޓަރ ޔުނައިޓެޑްގެ ބަދަލު ގޯލްކީޕަރަކަށް ކުޅެމުން އަންނަ އާޖެންޓީނާގެ އެއް ނަންބަރު ގޯލް ކީޕަރު ސާޖިޔޯ ރޮމޭރޯ އެކުލަބު ދޫކޮށްލަން އުޅޭކަމުގެ ޚަބަރުތައް ފެތުރިއްޖެއެވެ.

ރޮމޭރޯއާ ގުޅޭ ގޮތުން އިޓަލީ ބައެއް މީޑިއާތަކުން ރިޕޯޓްކުރާ ގޮތުގައި އޭނާ ބަދަލުވުމަށް ވިސްނަމުންދަނީ އިޓަލީގެ އިންޓަ މިލާނަށެވެ. އަދި އެކަމަށް ތައްޔާރުވުމުގެ ގޮތުން އިޓަލީން ރޮމޭރޯ ގެޔެއް ވެސް ގަނެފައިވާ ކަމަށް ރިޕޯޓްތައް ބުނެއެވެ.

ރިޕޯޓްތައް ބުނާ ގޮތުން އިންޓަރ މިލާނުން ރޮމޭރޯ ގެންދަން ބޭނުންވަނީ ދެ އަހަރު ދުވަހުގެ މުއްދަތަކަށެވެ. އެގޮތުން އެކުލަބުން އޭނާއަށް ދެ އަހަރު ދުވަހުގެ ކޮންޓްރެކްޓެއް ހުށަހަޅާފައި ވެއެވެ. ނަމަވެސް މިހާތަނަށް އެކަމަށް ރޮމޭރޯ އާބަސް ބުނެފައެއް ނުވެއެވެ.

އިޓަލީގެ މީޑިއާތަކުން ރިޕޯޓްކުރާ ގޮތުގައި ކޮންޓްރެކްޓްއާ މެދު އެއްޗެއް ނުބުންޏަސް އެއީ މިފަހަރުގެ ފިނު މޫސުމުގައި ފެނިދާނެ އެއް ޓްރާންސްފަރއެވެ.

މީގެ ކުރިން ވެސް ރޮމޭރޯ ވަނީ ޔުނައިޓެޑް ދޫކޮށްލަން ބޭނުން ކަމަށް ބުނެފައެވެ. އެކަމާ ގުޅިގެން އެކުލަބުގެ ކޯޗު މޮރީނިއޯ ބުނެފައި ވަނީ އޭނާ ރޮމޭރޯ ހިފަހައްޓަން ބޭނުންވާ ކަމަށެވެ. ނަމަވެސް ޔުނައިޓެޑްގެ މަދު މެޗަކުން ފިޔަވައި ރޮމޭރޯއަށް މޮރީނިއޯ ފުރުސަތު ދީފައެއް ނުވެއެވެ.

އިންޓަރ މިލާންއަށް ރޮމޭރޯ ބަދަލުވާން އުޅޭކަމުގެ އަޑުތައް ފެތުރިފައިވާއިރު، އިންޓާގެ ގޯލް ކީޕަރު ސަމިރް ހެޑަނޮވިޗްއަކީ މެންޗެސްޓަރ ޔުނައިޓެޑް އިން ފާރަލަމުން އަންނަ ކީޕަރުންގެ ލިސްޓުގައި ހިމެނޭ ގޯލްކީޕަރެކެވެ.

އިންޓަ މިލާނަށް ރޮމޭރޯ ބަދަލުވެދާނެ ކަމަށް އެންމެ ބޮޑަށް ބެލެވޭ އެއް ސަބަބަކީ އޭނާއަށް ފުރަތަމަ އެގާރައިން ޖާގަ ލިބުމެވެ. މީގެ އެއް ސީޒަން ކުރިން ހިލޭ ޓްރާންސްފާއެއްގައި ޔުނައިޓެޑާއި ގުޅުނު ރޮމޭރޯ ޔުނައިޓެޑް އެގާރައިން މިފަހަކަށް އައިސް ޖާގަ ލިބެނީ ޔޫރޮޕާ ލީގުގައެވެ.

ޔުނައިޓެޑާއެކު ރޮމޭރޯ ހަދާފައިވާ ކޮންޓްރެކްޓް ހަމަވާނީ 2019 ވަނަ އަހަރަށެވެ. ނަމަވެސް ޓްރާންސްފާ ރިކުއެސްޓެއް އައިސްފި ހިނދެއްގައި ޔުނައިޓެޑުން ރޮމޭރޯ ހިފަހައްޓާނެ ކަމަށް ނުބެލެވެއެވެ.