ވިއެޓްނާމުގެ މެދުތެރޭ ސަރަޙައްދުތަކަށް ހަފްތާބަންދުން ފެށިގެން ވެހެމުންދާ ބޯވާރެއާ ގުޅިގެން ދިމާވި ފެންބޮޑުވުމުގެ ހާދިސާތަކުގައި 41 މީހަކު މަރުވެ، 9 މީހަކު ގެއްލިފައިވާއިރު، 52،000 ގެދޮރު ފެނުގެ އަޑިއަށް ގޮސް 10،000 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވެއެވެ. މި އަހަރުގެ ފުރަތަމަ 10 މަސް ދުވަހުގައި ވިއެޓްނާމަށް ކުރިމަތިވި ގުދުރަތީ ކާރިސާތަކުގެ ސަބަބުން 2 ބިލިއަން އެމެރިކާ ޑޮލަރުގެ ގެއްލުން ލިބިފައިވާއިރު، އަންނަ އާދީއްތަ ދުވަހާ ހަމައަށް ވެސް މިހާލަތު ދެމިގެންދާނެ ކަމަށް އޮފިޝަލުން ލަފާކުރެވޭ.
ވިއެޓްނާމް ގައި ފެން ބޮޑުވުމުގެ ސަބަބުން 52،000 އަށް ވުރެ ގިނަ ގެދޮރު އަޑިއަށް ގޮސް ބޮޑު ސަރަހައްދަކުން ވަނީ ކަަރަންޓުގެ ޚިދުމަތް ކެނޑިފައި
ވިއެޓްނާމުގެ މެދުތެރޭގެ ސަރަޙައްދުތަކަށް ހަފްތާ ބަންދުން ފެށިގެން މެދުނުކެނޑި ވެހެމުންދާ ބޯ ވާރެއާ ގުޅިގެން ފެންބޮޑުވުމުގެ ހާދިސާތަކުގައި މިހާތަނަށް މަދުވެގެން 41 މީހަކު މަރުވެފައިވާ ކަމަށާއި، ގެއްލިގެން 9 މީހަކު ހޯދުމުގެ މަސައްކަތް އަދިވެސް ކުރިއަށްދާ ކަމަށް އެ ޤައުމުގެ ދައުލަތުގެ މީޑިއާއިން ރިޕޯޓްކޮށްފިއެވެ.
ރިޕޯޓްތައް ބުނާގޮތުން، މި ފެންބޮޑުވުމުގެ ސަބަބުން 52،000 އަށްވުރެ ގިނަ ގެދޮރު ފެނުގެ އަޑިއަށް ގޮސް، ފަސް ލައްކަ ގޭބިސީ އާއި ވިޔަފާރިތަކުން ވަނީ ކަރަންޓު ކެނޑިފައެވެ. އަދި ފެންބޮޑުވުމުގެ އަސަރުކޮށްފައިވާ ސަރަޙައްދުތަކުން ދިހަ ހާހަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފަ އެވެ.
ފާއިތުވި ތިން ދުވަހުގެ ތެރޭގައި އެކި ސަރަޙައްދުތަކަށް 1.5 މީޓަރަށް (5 ފޫޓަށް) ވުރެ މައްޗަށް ވާރޭ ވެހިފައިވާއިރު، ބައެއް ހިސާބުތަކުގައި ފެންގަނޑު ވަނީ 1993 ވަނަ އަހަރު އެ ގައުމަށް ކުރިމަތިވި ފެންބޮޑުވުމުގެ ހާދިސާގައި ފެންގަނޑު އެންމެ ބޮޑުވި މިންވަރު ކަމަށްވާ 5.2 މީޓަރަށް ވުރެ ވެސް މައްޗަށް އަރާފައެވެ.
ފަހަކަށް އައިސް ވިއެޓްނާމަށް ވަނީ ގަދަފަދަ މޫސުމީ ހާދިސާތަކާ ކުރިމަތިލާން ޖެހިފައެވެ. އެގޮތުން، ކަލްމައެގީ އާއި ބުއަލޯއި ގެ ނަން ދީފައިވާ ދެ ތޫފާން، ވަރަށް ގާތްގާތުގައި އެ ޤައުމަށް އަރައި، ގިނަ ބައެއްގެ ފުރާނަ ގެއްލި، ބޮޑެތި ގެއްލުންތަކެއް ލިބިފައިވެއެވެ.
ސަރުކާރުގެ ހިސާބުތައް ދައްކާ ގޮތުގައި، މި އަހަރުގެ ޖެނުއަރީ މަހުން އޮކްޓޯބަރު މަހުގެ ނިޔަލަށް ވިއެޓްނާމަށް ކުރިމަތިވި ގުދުރަތީ ކާރިސާތަކުގެ ސަބަބުން 2 ބިލިއަން އެމެރިކާ ޑޮލަރުގެ ގެއްލުން ލިބިފައިވެއެވެ.
އޮފިޝަލުން ވިދާޅުވާ ގޮތުގައި، މި ސަރަޙައްދުގެ މޫސުން މަދުވެގެން އަންނަ އާދީއްތަ ދުވަހާ ހަމައަށް ވެސް މިހާލަތުގައި ދެމިގެންދާނެއެވެ. ސިފައިންނާއި ފުލުހުން ވަނީ ރައްޔިތުން ރައްކާތެރި ހިސާބުތަކަށް ބަދަލުކުރުމަށްޓަކައި ވަގުތީ ހިޔާތައް ޤާއިމުކުރުމަށް ހަރަކާތްތެރިވެފައެވެ.
ބިންގަނޑު ކަނޑައިގެން ދިއުމުގެ ސަބަބުން މައި މަގުތަކަށާއި ހައިވޭތަކަށް ގެއްލުން ލިބުމާ ގުޅިގެން އެ ޕްރޮވިންސުން ވަނީ ކުއްލި ނުރައްކަލުގެ ޙާލަތު އިޢުލާންކޮށްފައެވެ.
ވިއެޓްނާމަކީ "ރޮބަސްޓާ" ކޮފީ ބީންސް އެންމެ ގިނައިން އުފައްދައި ބޭރުކުރާ އެއް ޤައުމެވެ. "ރޮބަސްޓާ" އަކީ އިންސްޓަންޓް ކޮފީ އާއި ބައެއް އެސްޕްރެސޯ ބްލެންޑްތަކުގައި ބޭނުންކުރާ ހިތި ރަހައެއް ހުންނަ ކޮފީ ބީން ގެ ބާވަތަކެވެ.
