ބާރުގަދަ ތޫފާނެއްގެ އަސަރު ފިލިޕީންސް އަށް ކުރަން ފެށުމާއެކު މިލިއަނެއްހާ މީހުން ގެދޮރުން ނެރެފި

ބާރުގަދަ ތޫފާނެއްގެ އަސަރު ކޮށްފައިވާ ފިލިޕީންސް އަށް އިތުރު ތޫފާނެއްގެ އަސަރު ކުރާނެ ކަމަށް ބެލެވުމާއެކު މިލިއަނަކަށް ގާތްކުރާ އަދަދެއްގެ މީހުން ގެދޮރުން ދޫކޮށް ދާން ޖެހިއްޖެ އެވެ.

ގިނަ ބަޔަކު ގެދޮރުން ނެރުމަށް މަސައްކަތް ކުރަމުން ގެންދާއިރު އެންމެ ފަހުން ކުރިމަތިވި ބާރު ގަދަ ތޫފާނުގައި 200 އަށްވުރެ ގިނަ މީހުން މަރުވެފައި ވެއެވެ.

ފަންގް-ވޮންގް ނަން ދީފައިވާ މި ތޫފާނުގެ އަސަރު އާދިއްތަ ދުވަހު ކުރަން ފަށާފައިވާ އިރު، ގަދަ ވަޔާއި، ވިއްސާރައިގެ އިތުރުން އުދަ އެރުންފަދަ ނުރައްކާތަކާ ވަނީ ކުރިމަތިވެފައެވެ. މި ތޫފާނުގެ ސަބަބުން ކަރަންޓު ކެނޑުމާއި ފުރާނަ އަށް ނުރައްކާ ވެދާނެ ކަމުގެ އިންޒާރު ރަސްމީ އިދާރާތަކުން ވަނީ ދީފައެވެ.

ފިލިޕީން އެޓްމޮސްފެރިކް، ޖިއޮފިޒިކަލް އެންޑް އެސްޓްރޮނޮމިކަލް ސާވިސަސް އެޑްމިނިސްޓްރޭޝަން (ޕަގާސާ) އިން ބުނީ، އާދީއްތަ ދުވަހުގެ ރޭ އައުރޯރާ ޕްރޮވިންސަށް ތޫފާން އަރާނެ ކަމަށް ލަފާކުރެވޭ ކަމަށާއި، ވައިގެ ބާރު ގަޑިއަކު 185 ކިލޯމީޓަރު (115 މޭލު) އަށް ވުރެ މައްޗަށް ދިއުން އެކަށީގެންވާ ކަމަށާއި، އަދި ކޮޅިގަނޑުގައި ގަޑިއަކު 230 ކިލޯމީޓަރު (143 މޭލު) އަށް ވުރެ މަތިވާނެ ކަމަށެވެ.

ބާރުގަދަ ތޫފާން އަކަށް ފިލިޕީންސް ހުށަހެޅިފައިވާ އިރު ތޫފާން ކަލްމޭގީ ގެ ސަބަބުން އަންގާރަ ދުވަހު މެދުތެރޭގެ ޕްރޮވިންސްތަކުގައި މަދުވެގެން 224 މީހުން މަރުވެފައިވެއެވެ.

ފިލިޕީންސްގެ ރައީސް ފާޑިނަންޑް މާކޯސް ޖޫނިއަރ ވަނީ ކަލްމޭގީ ގެ ސަބަބުން ލިބުނު ގެއްލުންތަކާއި، ފަންގް-ވޮންގް އިން ކުރިމަތިވާނެ ކަމަށް ލަފާކުރެވޭ ކާރިސާގެ ސަބަބުން ކުއްލި ނުރައްކަލުގެ ހާލަތު އިއުލާން ކުރައްވައިފަ އެވެ.

ސިވިލް ޑިފެންސް އޮފީހުން ބުނާ ގޮތުގައި، ފަންގް-ވޮންގް އިން ދިމާވާ ނުރައްކާތަކުގެ އަސަރު 30 މިލިއަނަށްވުރެ ގިނަ މީހުންނަށް ކުރިމަތިވެދާނެ ކަމުގައެވެ.

ފިލިޕީންސަށް އަހަރަކު ގާތްގަނޑަކަށް 20 ތޫފާން އަރަ އެވެ. މި ގައުމަށް ބިންހެލުން ތައް ގިނައިން ކުރިމަތިވުމުގެ އިތުރުން އަލިފާން ފަރުބަދަ ތައް ގޮވުން ފަދަ ހާދިސާ ތަކާ ހެދި، ދުނިޔޭގެ އެންމެ ގިނައިން ކާރިސާތަކާ ކުރިމަތިލާ ގައުމުތަކުގެ ތެރެއިން ގައުމަކަށް ފިލިޕީންސް ވަނީ ވެފަ އެވެ.