ވިއްސާރަ އާއި ގުޅިގެން ލަންކާއަށް ހިލޭ ގުޅޭ ގޮތަށް އުރީދޫ އިން ހަދައިފި
28 ނޮވެމްބަރު 2025 | ހުކުރު 10:39ސްރީލަންކާގައި ކުރަމުންދާ ވިއްސާރައިގައި މިހާތަނަށް ފެންބޮޑުވެ 56 މީހަކު މަރުވެ 21 މީހަކު ގެއްލިފައިވޭ
އުރީދޫ ކަސްޓަމަރުންނަށް ލަންކާއަށް ކުރާ ކޯލްތަކުގެ ކޮންމެ 5 މިނެޓެއް ހިލޭ
ސްރީލަންކާ އަށް ކުރަމުންދާ ވިއްސާރަ އާއި ގުޅިގެން އުރީދޫ މޯލްޑިވްސް އިން 24 ގަޑިއިރު ހިލޭ ލަންކާއަށް ކޯލް ކުރުމުގެ ފުރުސަތު ދީފި އެވެ.
އުރީދޫ އިން ބުނީ މިއީ މި ދަނޑިވަޅުގައި އާއިލާ އާއި ރަހުމަތްތެރިންގެ ސަލާމަތާއި ރައްކާތެރިކަން ކަށަވަރު ކުރުމަށް އެހީތެރިވެދިނުމުގެ ގޮތުން ހުޅުވާލި ފުރުސަތެކެވެ. ކުރިއަށް އޮތް 24 ގަޑިއިރަށް ކޮންމެ ކޯލް ސެޝަނެއްގެ ފުރަތަމަ 5 މިނެޓު މުޅިން ހިލޭ ކަސްޓަމަރުންނަށް ސްރީ ލަންކާއަށް ގުޅޭނެ ކަމަށް އުރީދޫ އިން ބުނެ އެވެ.
އެ ކުންފުނިން ބުނީ އަމާޒަކީ ދަތި އުނދަގޫ ދަނޑިވަޅުތަކުގައި މުޖުތަމައަށް އެހީތެރިކަން ފޯރުކޮށްދިނުމަށް ތައްޔާރަށް ތިބުމެވެ.
ލަންކާ އަށް ކުރަމުންދާ ވިއްސާރައިގައި މިހާތަނަށް ފެންބޮޑުވެ 56 މީހަކު ވަނީ މަރުވެފަ އެވެ. ފެންބޮޑުވުމުގެ ހާދިސާގައި މިހާތަނަށް 21 މީހަކު ވަނީ ގެއްލިފަ އެވެ. ލަންކާގެ ކޯރުތަކުގެ ފެންބޮޑުވަމުން ދާއިރު، ތިރި ސަރަހައްދުތަކުގައި ދިރިއުޅޭ ރައްޔިތުން އުސް ސަރަހައްދުތަކަށް ބަދަލުވުމަށް ޑީއެމްސީން ވަނީ އިންޒާރުދީފަ އެވެ. ކުރިއަށް އޮތް 48 ގަޑިއިރުގެ ތެރޭގައި ކެލާނީ ކޯރު ވާދީގެ ތިރި ސަރަހައްދުތަކަށް ރެޑް ލެވެލް ގެ އިންޒާރު އިރިގޭޝަން ޑިޕާޓްމަންޓުން ވަނީ ދީފަ އެވެ. ނުރައްކާތެރި ސަރަހައްދުތަކުގެ ތެރޭގައި ވެރިރަށް ކޮލަމްބޯ ހިމެނެ އެވެ.
