ރާއްޖޭގެ ބޮޑު ސަރަހައްދަކަށް އުދަ އެރުން އެކަށީގެންވާތީ ސަމާލުވުމަށް އިލްތިމާސްކޮށްފި
މޫސުމާ ބެހޭ ގައުމީ އިދާރާއިން ވަނީ، ހޮނިހިރު ދުވަހުގެ 13:30އިން 17:00އަށް މުޅި ރާއްޖެއަށް ހުދު ސަމާލު ނެރެފަ
ރާއްޖޭގެ އުތުރުގެ ކަނޑުތައް އަދިވެސް ގަދަވާނެ
މޫސުން ގޯސްވެ، މުޅި ރާއްޖެއަށް އުދަ އެރުން އެކަށީގެންވާ ކަމަށް މޫސުމާ ބެހޭ ގައުމީ އިދާރާއިން ހޮނިހިރު ދުވަހު ބުނެފިއެވެ.
މޫސުމާ ބެހޭ ގައުމީ އިދާރާއިން ވަނީ، ހޮނިހިރު ދުވަހުގެ 13:30އިން 17:00އަށް މުޅި ރާއްޖެއަށް ހުދު ސަމާލު ނެރެ، އުދަ އެރުން އެކަށީގެންވާތީ ސަމާލުވުމަށް އިލްތިމާސްކޮށްފައެވެ.
މޫސުން ބޮޑަށް ގޯސްވެފައިވަނީ މެދު ރާއްޖެތެރެއާއި އުތުރަށެވެ. އެގޮތުން ހއ. އަތޮޅުން ފެށިގެން އދ. އަތޮޅަށް ހެނދުނުން ފަށައިގެން 16:30އާ ހަމައަށް ވަނީ ހުދު ސަމާލު ނެރެފައެވެ. މި ވަގުތުތަކުގައި ބޯކޮށް ވާރޭވެހި، ގުގުރައި، ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް މޫސުމާ ބެހޭ އިދާރާއިން ލަފާކޮށްފައިވެއެވެ.
އެ އޮފީހުން ވަނީ، ކުރިއަށް އޮތް 24 ގަޑިއިރު ކަނޑުތައް އާދައިގެ ވަރަކަށް މަޑުވެފައި ވިލާގަނޑުގައި އާދައިގެ ވަރަކަށް ގަދަވާނެ ކަމަށް ލަފާކޮށްފަ އެވެ.
މޫސުން ގޯސްވެ، ކަނޑު ވެސް ގަދަވާނެ ކަމަށް ލަފާކުރެވޭތީ މޫސުމާ ބެހޭ ގައުމީ އިދާރާއިން ވަނީ ދަތުރުފަތުރު ކުރުމުގައި ސަމާލުވުމަށް ވެސް އިލްތިމާސް ކޮށްފައެވެ،
ހުކުރު ދުވަހު މާލެއަށް ވަރަށް ބޮޑަށް އުދަ އަރައިފައިވާކަން ފާހަގަކޮށްލަން ޖެހެއެވެ. އެގޮތުން ކާނިވާ ސަރަހައްދުން އުދަ އަރައި، އެ ސަރަހައްދުގައި ހިންގާ ކެފޭ ރެސްޓޯރެންޓުތަކަށް އުދައިގެ އަސަރުކޮށްފައިވެއެވެ.
މި ދުވަސްވަރު ރާއްޖެއަށް ކުރަނީ ހުޅަނގު މޫސުމުގެ ވިއްސާރަކަމަށް މޫސުމާއި ބެހޭ ގައުމީ އިދާރާއިން ބުނެއެވެ.
