ފިލިޕީންސް އަށް ބާރުގަދަ ތޫފާނެއް އަރައި އެތައް ބަޔަކު މަރުވެއްޖެ

މި އަހަރުގެ އެންމެ ބާރުގަދަ ތޫފާން ފިލިޕީންސްގެ މެދުތެރެ އަށް އަރައި މަދުވެގެން 66 މީހުން މަރުވެފައިވާ އިރު، އެތައް ހާސް މީހުން އެމީހުންގެ ގެތައް ދޫކޮށް ހިނގައްޖެ އެވެ.

ތޫފާނުގައި އައި ގަދަ ވިއްސާރައިގެ ސަބަބުން ބޮޑު އާބާދީ އެއް އޮންނަ މެދުތެރޭގެ ސެބޫ ރަށުގައި ހުރިހާ ސިޓީތަކެއް ވަނީ ފެންބޮޑުވެފައެވެ. އެތަނުގައި 49 މީހުން މަރުވެފައިވެއެވެ. 26 މީހުން ގެއްލިފައިވާ ކަމަށް ސިވިލް ޑިފެންސްގެ އޮފިޝަލަކު ބުދަ ދުވަހު ރޭޑިއޯ އިންޓަވިއު އެއް ގައި ބުނެފިއެވެ.

ވީޑިއޯތަކުން ފެންނަނީ މީހުން ގެތަކުގެ ފުރާޅު މައްޗަށް އަރާ ހިމާޔަތް ހޯދަމުންދާ މަންޒަރުތަކާއި، ގަދަ ވަޔާއި ވިއްސާރައިގައި ކާރުތަކާއި ކޮންޓެއިނަރުތައް މަގުތަކުގައި އޮޔާ ދާ މަންޒަރެވެ.

މަރުވި މީހުންގެ ތެރޭގައި ސެބޫ ގެ ދެކުނުގައި އޮންނަ މިންޑަނާއޯ ރަށުގައި ރިލީފް މަސައްކަތްތަކުގައި އެހީތެރިވުމަށް ފޮނުވި ސިފައިންގެ ހެލިކޮޕްޓަރެއް ވެއްޓި، އޭގައި ތިބި ހަ ކްރޫ މެމްބަރުން ހިމެނެއެވެ.

މަރުވި ގިނަ މީހުން މަރުވީ ގެނބިގެން ކަމަށް ރިޕޯޓްތައް ބުނެއެވެ. މި ވިއްސާރައިގެ ސަބަބުން ފަރުބަދަތަކުން ފެންގަނޑު ވަރަށް ބާރު މިނުގައި ސިޓީތަކަށާއި ރަށްތަކަށް އަންނަމުން ދެއެވެ.

ސެބޫ ގައި މީހުން އުޅޭ ސަރަހައްދުތަކަށް ލިބިފައިވާ ގެއްލުން ވަރަށް ބޮޑެވެ. ގިނަ ކުދި އިމާރާތްތައް ވަނީ ފެންބޮޑުވުމުގެ ސަބަބުން ހަލާކުވެފަ އެވެ. މަގުތަކުގައި ބޯ ކިސަޑު ވަނީ އުފެދިފައެވެ. ރެސްކިއު ޓީމުތައް ބޯޓުތަކުގައި ގޮސް ގެތަކުގެ ތެރޭގައި ތާށިވެފައި ތިބި މީހުން ދަނީ ސަލާމަތް ކުރަމުންނެވެ.