ކުރިއަށް އޮތް 24 ގަޑިއިރު މޫސުން ގޯސް، ރާޅުގެ އުސްމިނުގައި 7 ފޫޓް ހުންނާނެ: މޫސުމާބެހޭ ގައުމީ އިދާރާ
ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައިގަދަވުން އެކަށީގެންވޭ
މޫސުން ގޯސް ކަނޑު ގަދަ ދުވަހެއް
މުޅި ރާއްޖޭގެ މޫސުން ކުރިއަށް އޮތް 24 ގަޑިއިރު ގޯސްވާނެ ކަމަށާއި، ރާޅުގެ އުސްމިނުގައި 7 ފޫޓް ހުންނާނެ ކަމަށް މޫސުމާބެހޭ ގައުމީ އިދާރާއިން ބުނެފިއެވެ.
މޫސުމާބެހޭ ގައުމީ އިދާރާއިން ބުނީ، ހުކުރު ދުވަހުގެ ހެނދުނު 10:00ން ހޮނިހިރު ދުވަހުގެ 10:00ށް އެކިހިސާބަށް ވިއްސާރަކުރުމާއެކު ގުގުރާނެ ކަމަށާއި، ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށެވެ.
ހުޅަނގާއި ހުޅަނގުއުތުރުން ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައިގަދަވުން އެކަށީގެންވާ ކަމަށް އެއިދާރާއިން ބުނެއެވެ.
މޫސުމާބެހޭ ގައުމީ އިދާރާއިން ބުނީ، ކަނޑުތައް ގަދަވާނެ ކަމަށާއި، ރާޅުގެ އުސްމިނުގައި 4 ނުވަތަ 7 ފޫޓު ހުންނާނެ ކަމަށެވެ. އަދި ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރު ކުރުން އެކަށީގެންވާ ކަމަށް އެއިދާރާއިން ބުނެއެވެ.
މީގެ އިތުރުން މޫސުމާބެހޭ ގައުމީ އިދާރާއިން ވަނީ ރާއްޖޭގެ ބޮޑު ސަރަހަދަކަށް ވައިޓް އެލާޓް ނެރިފައެވެ. އެއީ ހެނދުނު 9:30ން މެންދުރުފަހު 3:30ށް ހއ.އަތޮޅުން ފެށިގެން ލ.އަތޮޅަށެވެ.
ރާއްޖެއަށް މިހާރު ކުރަމުންދާ ވިއްސާރާގައި ފާއިތުވެދިޔަ 24 ގަޑިއިރު އެންމެ ބޯކޮށް ވާރޭވެހިފައިވަނީ ލ. ކައްދޫއަށެވެ.
އެެގޮތުން، އެ ރަށަށް ވަނީ 79.5 މިލިމީޓަރުގެ ވާރޭ ވެހިފައެވެ. ދެވަނައަށް އެންމެ ބޯކޮށް ވާރޭ ވެހިފައި ވަނީ ނ. މާފަރަށެވެ. އެ ރަށަށް 71.2 މިލިމީޓަރުގެ ވާރޭ ވެހިފައިވާއިރު، ތިންވަނައަށް އެންމެ ބޯކޮށް ވާރޭ ވެހުނީ ކުޅުދުއްފުށި ސިޓީއަށެވެ. އެސިޓީއަށް 66.5 މިލިމީޓަރުގެ ވާރޭ ވެހިފައިވެއެވެ.
މީގެ އިތުރުން އދ. މާމިގިއްޔަށް 57.5 މިލިމީޓަރުގެ ވާރޭ، ށ. ފުނަދޫއަށް 46.2 މިލިމީޓަރުގެ ވާރޭ، ހދ. ހަމިނާދޫއަށް 46.2 މިލިމީޓަރުގެ ވާރޭ އަދި މާލެއަށް 49.8 މިލިމީޓަރުގެ ވާރޭ ވެހިފައިވެއެވެ.
ރާއްޖޭގެ މޫސުން ގޯސްވެ، ހިތާމަވެރި ގިނަ ހާދިސާތައް ދަނީ ހިނގަމުންނެވެ. އެހެންކަމުން ޚާއްސަކޮށް ކަނޑުދަތުރުކުރާ ފަރާތްތަކުން މުސޫމަށް ސަމާލުވުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ.
