ހުޅުމާލޭގެ މުނިސިޕަލް ޚިދުމަތްތައް މާލެ ސިޓީ ކައުންސިލް އާ ހަވާލު ކުރެއްވި ކަމަށް ވިދާޅުވެ ރައީސް މުއިއްޒު ހެއްދެވީ "ބޮޑު ސިންގާ ދޮގެއް" ކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެ އެވެ.

މުއިއްޒު ވިދާޅުވެފައި ވަނީ ގާނޫނު އަސާސީ ބުނާ ގޮތުން ހުޅުމާލެ އަކީ މާލޭގެ ބައެއް ކަމަށެވެ. އެހެން ނަމަވެސް މިހުރިހާ ދުވަހު ހަވާލު ކޮށްފައި އޮތީ ކުންފުންޏަކާ ކަމަށެވެ.

"އަޅުގަނޑު (މާލޭ މޭޔަރު) އިންތިޚާބުގައި ވާދަ ކުރި އިރުގައި ވަރަށް ބާރު މިނުގައި ދެއްކިން އެކަން ނިމުމަކަށް ގެންނާނެ ވާހަކަ، ނަތީޖާ ނުކުތް ގޮތަކުން އެވާހަކަ ހުއްޓުނީ، އަޅުގަނޑުމެން އޭގެ ތަފާތު މި ދެއްކީ، އިންތިޚާބަކަށް ބެލުމެއް ނެތި، އަޅުގަނޑު ވައުދުވި ގޮތައް، އެވަނީ ހުޅުމާލޭގެ މުނިސިޕަލް ޚިދުމަތް މާލެ ސިޓީ ކައުންސިލް އާ ހަވާލު ކޮށްފައި."

މުއިއްޒު އިތުރަށް ވިދާޅުވެފައި ވަނީ ހުޅުމާލޭގެ މުނިސިޕަލް ޚިދުމަތްތައް މާލެ ސިޓީ ކައުންސިލް އާ ހަވާލު ކުރެއްވި އިރު އެކަން ކުރެއްވީ ހުރިހާ ވަސީލަތްތަކާ ވެސް އެކުގައި ކަމަށެވެ.

މުއިއްޒު ވިދާޅުވީ، ސިޓީ ކައުންސިލުން މުސާރަ ވެސް ދޭން ނުޖެހޭނެ ކަމަށާއި އެކަން ވެސް ކުރާ ގޮތައް ހަމަޖައްސާފައި ވާނީ އެޗްޑީސީ އިން ކަމަށެވެ.

އަދި ވެލިހަކަލް ތަކާއި ސައިޓް ވެސް ހަމަޖައްސައިދީފައިވާނެ ކަމަށެވެ.

"ކައުންސިލުން ކުރަން ޖެހޭނެ ކަމަކީ ޒިންމާދާރު ކަމާއެކު ޚިދުމަތް ދިނުން،" ކަމަށް ވެސް މުއިއްޒު ވަނީ ވިދާޅުވެފައެވެ.

ސަރުކާރުން ދޭން ޖެހޭ ފުރިހަމަ އެއްބާރުލުން އެކަމުގައި ދޭނެ ކަމަށް ވެސް މުއިއްޒު ވިދާޅުވިއެވެ.

މުއިއްޒުގެ މިވާހަކަ އަށް ރައްދު ދެއްވައި، މޭޔަރު އާޒިމް ވިދާޅުވީ، "މިއީ ވެސް ހައްދަވާފައިވާ ބޮޑު ސިންގާ ދޮގެއް،" ކަމަށެވެ.

އާޒިމް ސާފު ކޮށްދެއްވި ގޮތުން މުއިއްޒު މިހެން ވިދާޅުވީ އެއްވެސް ކަމެއް ނުކޮށް އެއީ ވެސް ކުރެއްވި ކަމެއް ކަމަށް ހެއްދަވައިގެން ކަމުގައެވެ.

އާޒިމް އިތުރަށް ވިދާޅުވީ، އަދި ވެސް އެ ވިދާޅުވި މުނިސިޕަލް ޚިދުމަތްތައް ކައުންސިލް އާ ހަވާލު ނުކުރާ ކަމަށެވެ.

މުއިއްޒު ވެރިކަމަށް ވަޑައިގަންނަވަން ހިންގެވި ކެމްޕޭނުގައި ހުޅުމާލެ އެޗްޑީސީ ދަށުން ނަގާ މާލެ ސިޓީ ކައުންސިލް އާ ހަވާލު ކުރައްވާނެ ކަމަށް ވިދާޅުވެ، ވެރިކަމަށް 2 އަހަރު ވެގެންދާއިރު އެކަން އެ ގޮތައް ކުރައްވާފައެއް ނުވެއެވެ.