އެތައް މިލިއަން ޑޮލަރަށް ޚިޔާނާތްވެފައިވާ ކަމަށް ބުނެ ފިލިޕީންސްގެ ނައިބު ރައީސްގެ އިތުބާރު ނެތް ކަމަށް ފާސް ކޮށްފި

އެތައް މިލިއަން ޑޮލަރުގެ ކަރަޕްޝަންގެ ތުހުމަތުގައި ފިލިޕީންސްގެ ނައިބު ރައީސްގެ އިތުބާރު ނެތް ކަމަށް އެ ގައުމުގެ ޕާލިމަންޓުން ފާސްކޮށްފިއެވެ.

ސާރާ ޑުޓާޓޭ އަށް ތުހުމަތުކުރެވެނީ ސަރުކާރުގެ އެތައް މިލިއަން ޑޮލަރު ނަހަމަ ގޮތުގައި ބޭނުންކުރިކަމަށާއި، އަދި ރައީސް ފާރޑިނެންޑް "ބޮންގްބޮންގް" މާރކޯސް ޖޫނިއަރ އަވަހާރަކޮށްލާނެ ކަމަށް ބުނެ ބިރުދެއްކުމެވެ. 

އޭނާ ވަނީ މި ތުހުމަތުތައް ދޮގުކޮށް، އޭނާއަކީ ސިޔާސީ ބަދަލުހިފުމުގެ ޝިކާރައަކަށް ވެފައިވާ ފަރާތެއް ކަމަށް ބުނެފައެވެ. 

މި ކުއްލި ފިޔަވަޅަކީ ޑުޓާޓޭ އާއި މާރކޯސް އާ ދެމެދު އޮތް ދެބަސްވުންތައް އިތުރަށް ގޯސްވެގެން ދިޔުމުގެ ނަތީޖާއެއް ކަމަށް ފާހަގަ ކުރެވެއެވެ. މި ދެބޭފުޅުންގެ މެދުގައި އުފެދިފައިވާ ދެބަސްވުން ތަކުގެ ސަބަބުން ފިލިޕީންސް ނުތަނަވަސް ކަމުގެ ތެރޭގައި އޮންނަތާ އެތައް މަސްތަކެއް ވަނީ ފާއިތުވެފައެވެ.

މި ބޭފުޅުންނަކީ ވެސް ފިލިޕީންސްގެ ސިޔާސީ މައިދާނުގައި ނަގާ ކިޔާ ދެ އާއިލާ އަކަށް ނިސްބަތްވާ ދެބޭފުޅުންނެވެ. އިތުބާރު ނެތް ކަމަށް ފާސް ކުރި ނައިބު ރައީސް އަކީ ކުރީގެ ރައީސް ރޮޑްރީގޯ ޑުޓާޓޭގެ ދަރިކަނބަލެކެވެ. އަދި ރައީސް އަކީ އަވަހާރަވެފައިވާ ފިލިޕީންސްގެ ކުރީގެ ލީޑަރު ފާޑިނަންޑް މާރކޯސްގެ ދޮށީ ދަރިކަލުންނެވެ. 

މަޖިލީހުގެ 306 މެންބަރުންގެ ތެރެއިން 215 މެންބަރުން ވަނީ ނައިބު ރައީސްގެ އިތުބާރު ނެތް ކަމަށް ވޯޓުދީފައެވެ. މިއީ އިތުބާރު ނެތް ކަމަށް ފާސްކުރުމަށް ބޭނުންވާ ތިންބައިކުޅަ އެއްބައިގެ އަޣުލަބިއްޔަތަށްވުރެ މާ ބޮޑު އަދަދެކެވެ. 

އިތުބާރު ނެތް ކަމަށް ފާސްކުރި ބިލު ދެން ހުށަހެޅޭނީ 24 މެންބަރުންގެ މައްޗަށް އެކުލެވޭ ސެނެޓަށެވެ. ސެނެޓުން މި މައްސަލަ ބަލާނީ އިމްޕީޗްމަންޓް ކޯޓުގެ ހައިސިއްޔަތުންނެވެ. 

ކޯޓަށް އޭނާ ކުށް ކުރެއްވިކަން ސާބިތުވެއްޖެ ނަމަ ޑުޓާޓޭ މަޤާމުން ވަކިކުރެވޭނެއެވެ. އަދި އޭނާއަކީ ފިލިޕީންސްގެ ތާރީޚުގައި އިމްޕީޗްކުރެވޭ ފުރަތަމަ ނައިބު ރައީސް އަށް ވެގެންދާނެއެވެ. 

ސެނެޓުން ޙުކުމް އިއްވަންދެން އޭނާ މަޤާމުގައި ދެމި ހުންނަވާނެ ކަމަށް ބެލެވެއެވެ. މައްސަލަ ބަލާނެ ތާރީޚެއް އަދި ކަނޑައެޅިފައެއް ނުވެއެވެ. 

2028 ވަނަ އަހަރު ދެވަނަ ދައުރަކަށް ކުރިމަތިލުމުގެ ޝަރުޠު ހަމަނުވާ މާރކޯސްގެ ފަހުން ރައީސް ކަމަށް ވަޑައިގަންނަވާނެ ފަރާތުގެ ގޮތުގައި ޑުޓާޓޭ އާ މެދު ގިނަބަޔަކު އައީ ދެކެމުންނެވެ. 

އެހެން ނަމަވެސް އިމްޕީޗްމަންޓެއްގެ ސަބަބުން އޭނާއަށް ރައީސް ކަމަށް ކުރިމަތިލުމުގެ ފުރުޞަތު ގެއްލިގެންދާނެއެވެ. އެއީ އޭނާއަށް ދައުލަތުގެ އެއްވެސް މަޤާމެއް ފުރުމަށް ދާއިމީކޮށް މަނާވެގެން ދާނެއަތީއެވެ.