ޒަހަމްވި މާނިއުގެ މަންމަ: "ސަރުކާރުން ހަދަނީ ދޮގު، އެއްވެސް އެހީތެރިކަމެއް ނުދޭ"
މި ހާދިސާ ހިނގަން މެދުވެރިވީ މާނިއު ދުއްވި ސެސްނާ-125 މަރުކާގެ ބޯޓު ލޭންޑުކޮށްފައި ބޯޓު ނު ނިވާ އޭނާ ފޭބި ވަގުތު ކަމަށް ދަރިވަރުން ބުނޭ
ޕިންސްގެ ޓްރެއިނިން އުޅަނދެއްގައި ދަނިކޮށް، އެ އުޅަނދުގެ ފިޔަގަނޑު ފެންނަ ގޮތަށް ނަގާފައިވާ ފޮޓޯ އެއް
ފިލިޕީންސްގައި ޕައިލެޓުކަން ކިޔަވާ ރާއްޖޭގެ ދަރިވަރެއް ކަމަށްވާ ހދ. ހަނިމާދޫ، އަބްދުލް މާނިއު، ޓްރެއިނިން މަތިންދާ ބޯޓެއްގެ ބުރަފަތީގައި ޖެހި ޒަހަމްވި ހާދިސާ އާއި ގުޅިގެން އޭނާ އަށް ސަރުކާރުގެ އެއްވެސް އެހީތެރިކަމެއް ނުލިބޭ ކަމަށާއި ސަރުކާރުން އެހީތެރިވާ ކަމަށް ބުނެ ހަދަނީ ދޮގު ކަމަށް އޭނާގެ އާއިލާ އިން ބުނެފިއެވެ.
މާނިއުގެ މަންމަ އައިޝަތު އިހުސާނާ ރާއްޖެޓީވީގެ "ފަށާއިރު" ޕްރޮގްރާމަށް ފޯނު މެދުވެރިކޮށް ދިން ބަސްތީގަތުމެއްގައި ބުނެފައި ވަނީ، އޭނާގެ "ދަރިފުޅުގެ ކަންކަން ގާތުން ބަލަމުންދާ ކަމަށް ބުނެ ސަރުކާރުން އެކަން ސިޔާސީ ނުކުރުން އެދޭ ކަމަށެވެ. އޭނާގެ މަންމަ ވަނީ ފޯނުކޯލެއް ކުރުމަކީ އެހީތެރިކަން ކަމަށް ވާނަމަ، އެއީ އެހީތެރިކަމެއް ކަމަށް ބެލިދާނެ ކަމަށާއި އޭގެ އިތުރަށް އެހީ އެއް ނުލިބޭ ކަމަށް ބުނެފައެވެ.
ހާދިސާގެ ރިޕޯޓު ލިބުނު ވަގުތުން ފެށިގެން ރައީސް ޑރ.މުހައްމަދު މުއިއްޒުގެ ލަފަޔާ އެއްގޮތަށް ސަރުކާރުން އޭނާގެ ކަންކަން ވަރަށް ކައިރިން ބަލަމުންދާ ކަމަށް ފޮރިން މިނިސްޓަރ ޑރ.އަބްދުﷲ ހަލީލް ވަނީ ވިދާޅުވެފައެވެ. އެކަމާއި ގުޅޭ ގޮތުން އޭނާ ވަނީ މީސްމީޑިއާގައި މެސެޖެއް ވެސް ހިއްސާ ކުރައްވާފައެވެ. އެގޮތުން ފޮރިން މިނިސްޓްރީ އާއި، ހަޔަރ އެޑިޔުކޭޝަން މިނިސްޓްރީގެ އިތުރުން ސިވިލް އޭވިއޭޝަނުން ވެސް މާނިއުގެ ހާލު އޮޅުން ފިލުވާތީ އުފާކުރާ ކަމަށް މާނިއުގެ ބައްޕަ ބުނެފައިވާ ކަމަށް ޑރ.ހަލީލް ވިދާޅުވިއެވެ.
މާނިއުގެ މަންމަ ބުނެފައި ވަނީ ދަރިފުޅަށް ދިމާވި ހާދިސާ އަށް ފަހު އޭނާ އަށް ލިބުނީ ކުއްލި ސިހުމެއް ކަމަށެވެ. އެންމެ ފަހުން ސަރުކާރުގެ ފަރާތުން މީހަކު އޭނާ އަށް ގުޅާފައި ވަނީ އެޕްރިލް 13 ވަނަ ދުވަހު ހަވީރު ކަމަށް އޭނާ ވަނީ ބުނެފައެވެ. އޭގެ ފަހުން ސަރުކާރުން އެއްވެސް ވަރަކަށް އޭނާ އަށް ވެސް އާއިލާގެ އެހެން މީހަކަށް ވެސް ގުޅާފައި ނުވާ ކަމަށް އޭނާގެ މަންމަ ވަނީ ބުނެފައެވެ.
މީގެ އިތުރުން ޑރ.ހަލީލް މާނިއުގެ ބައްޕަ އަށް ގުޅިކަން ނުވަތަ ނޫންކަން ޔަޤީންކޮށް ބުނަން ނޭނގޭ ކަމަށް މާނިއުގެ މަންމަ ވަނީ ބުނެފައެވެ. މާނިއުގެ މަންމަ ބުނި ގޮތުން އޭނާ އަށް ހާދިސާގެ ޚަބަރު ލިބުނީ އޭނާގެ ރަށް ކަމަށްވާ ހަނިމާދޫގައި ހުއްޓާއެވެ. އަދި މާނިއު އާއި އެކު ކިޔަވާ ދަރިވަރުންނާއި އާއިލާ ފިޔަވާ އިތުރު މީހެއްގެ އެހީތެރިކަން ނުލިބޭ ކަމަށް އޭނާގެ މަންމަ ވަނީ ބުނެފައެވެ.
"އަޅުގަނޑު ބުނާނީ ދަރިފުޅަށް ހެޔޮ ދުއާ ކޮށްދޭށޭ އެންމެންވެސް. މިތާ ތިބި ދަރިވަރުންނަށް ވަރަށް ބޮޑަށް ޝުކުރު އަދާކުރަން ބޭނުން. އެ ކުދިންގެ އެހީތެރިކަން އަޅުގަނޑަށް ވަރަށް ބޮޑަށް ލިބޭ." މާނިއުގެ މަންމަ ވަނީ ބުނެފައެވެ.
މި ވަގުތު ދަރިފުޅުގެ ހާލު ރަނގަޅުވަމުންދާ ކަމަށް އޭނާ ވަނީ ފާހަގަކޮށްފައެވެ. ނަމަވެސް ޑޮކްޓަރުން ލަފާ ދެނީ އޭނާ އަދި ވާހަކަ ނުދައްކަން ކަމަށާއި، ރިކަވަރ ވަންދެން ރަނގަޅަށް އަރާމުކުރުމަށް ކަމަށް އޭނާގެ މަންމަ ވަނީ ބުނެފައެވެ.
މި ހާދިސާ ހިނގަން މެދުވެރިވީ މާނިއު ދުއްވި ސެސްނާ-125 މަރުކާގެ ބޯޓު ލޭންޑުކޮށްފައި ބޯޓު ނު ނިވާ އޭނާ ފޭބި ވަގުތު އަނބުރައިގަނެގެން ގޮސް ބުރަފަތީގައި ޖެހުމުން ކަމަށް އޭނާ އާއި އެކުގައި ކިޔަވާ ބައެއް ދަރިވަރުންނާއި ހަވާލާދީ މީޑިއާތަކުން ވަނީ ރިޕޯޓްކޮށްފައެވެ. މާނިއުގެ މަންމަ ބުނީ ހާދިސާ ހިނގި ގޮތް މުޅިން ސާފު ނުވާ ކަމަށެވެ. އަދި ދަރިފުޅަށް ރަނގަޅަށް ވާހަކަ ދެކެވެންދެން އެ ހާދިސާ ހިނގި ގޮތުގެ ވާހަކަ ރަނގަޅަށް ސާފު ނުކޮށް އެ ވާހަކަ ނުދެއްކުމަކީ އޭނާ އެދޭ ގޮތް ކަމަށް އޭނާ ވަނީ ބުނެފައެވެ.
