ފެނަކާއިގެ ، ކޮރަޕްޝަނާއި ފަސާދައިގެ އަމަލު ހިންގި މުވައްޒަފުންގެ ތެރޭގައި، އެކުންފުނީގެ 13 އެޗްއޯޑީން
ދާއިމީ މުވައްޒަފުންނާއި، ކޮންޓްރެކްޓް މުވައްޒަފުގެ ނަން ވެސް ލިސްޓު ގައި ހިމެނޭ
ބުދަ ދުވަހު ކުރިއަށް ގެންދިޔަ މާލިއްޔަތު ކޮމެޓީގައި ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ނާޒިމް ވާހަކަ ދައްކަވަނީ
ފެނަކަ ކޯޕްރޭޝަން ލިމިޓެޑް ގައި ކޮރަޕްޝަނާއި ފަސާދައިގެ އަމަލު ހިންގި މުވައްޒަފުންގެ ތެރޭގައި، އެކުންފުނީގެ 13 އިސްވެރިން ހިމެނޭކަން ހާމަވެއްޖެ އެވެ.
ބުދަ ދުވަހު ކުރިއަށް ގެންދިޔަ މާލިއްޔަތު ކޮމެޓީގައި އެ ކޮމެޓީގެ މުގައްރިރު އަދި ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވީ ފެނަކާ ގައި ކޮރަޕްޝަނާއި، ފަސާދައިގެ އަމަލު ތައް ހިންގި މުވައްޒަފުން މިހާރުން މިހާރަށް އެކަހެރި ކުރުމަށް އޮޑިޓަރ ޖެނަރަލް ފޮނުވާފައިވާ ރިޕޯޓު ގައި ބަޔާން ކޮށްފައިވާ ކަމަށެވެ. އެ މުވައްޒަފުންގެ މައުލޫމާތު ފޮނުވައި ދިނުމަށް އެދުމުން އެ މައުލޫމާތު ހިއްސާ ކޮށްފައިވާ ކަމަށް މެންބަރު ނާޒިމް ވިދާޅުވި އެވެ.
އެ ލިސްޓަށް އިޝާރާތް ކުރައްވައި މެންބަރު ނާޒިމް ވިދާޅުވީ ހެޑް އޮފް ޑިމާޓްމަންޓު ގައި ހިމެނޭ 13 ބޭފުޅެއްގެ ނަން އެބައޮތް ކަމަށެވެ. އަދި ދާއިމީ މުވައްޒަފުންނާއި، ކޮންޓްރެކްޓް މުވައްޒަފުންގެ ނަން ވެސް ލިސްޓު ގައި ހިމެނޭ ކަމަށެވެ.
އިއްޔެ 12 ޖެހުމާ ހަމަ އަށް އޮތީ ސުންގަނޑި ދެވިފައި ފެނަކަ އަށް އެ މުވައްޒަފުންގެ މައުލޫމާތު އަޅުގަނޑުމެންނަށް ފޮނުވަން. މިއަދު ހެނދުނު އެ މައުލޫމާތު ތައް އެބަވޭ ފޮނުއްވާފައި. ފެނަކާގެ ޕްރޮޖެކްޓް ޑިޕާޓްމަންޓާއި، ޕްރޮކިއުމަންޓު ޑިޕާޓްމަންޓުގެ ހެޑް އޮފް ޑިޕާޓްމަންޓުގެ ގޮތުގައި ހިމެނޭ ނަންތަކާއެކު އެބަވޭ ފޮނުއްވާފައި. އެބައޮތް 13 ބޭފުޅެއްގެ ނަން އެބަވޭ ފޮނުއްވާފައި. މިކަމުގައި ޝާމިލުވާ ކަމަށް 13 ބޭފުޅުން ހެޑް އޮފް ޑިޕާޓްމަންޓުގައި ތިއްބެވި ކަމަށް. އޭގެ އިތުރުން އެ ޑިޕާމްޓްމަންޓު މައްސަލާގައި ޝާމިލުވާ ބޭފުޅުންގެ ނަންތައް ދެއްވާފައި ހުރިއިރުގައި ދާއިމީ މުވައްޒަފުންނާ ކޮންޓްރެކްޓް މުވައްޒަފުން ތިބިކަން ފާހަގަކޮށްލަން. އެހެންވީމަ ޕްރޮޖެކްޓް ސްޓާފުންގެ 19 ސްޓާފުން މިހާރު ތިބި ކަމަށް މައުލޫމާތު ދެއްވާފައި ވަނީ.ކޮމެޓީގެ މުގައްރިރު އަދި ދިއްގަރު ދާއިރާގެ މެންބަރު އަހުމަދު ނާޒިމް
މެންބަރު ނާޒިމް ވިދާޅުވީ މިހާތަނަށް ފެނަކައިން ވަރަށް ގިނަ މުވައްޒަފުން ވަޒީފާ އިން ވަކި ކޮށްފައިވާ ކަމަށެވެ. 2021 އާއި 2023 އާ ދޭތެރޭގައި 64 މުވައްޒަފުން ވަޒީފާ އިން ވަކި ކޮށްފައިވާ ކަމަށް މެންބަރު ނާޒިމް ވިދާޅުވި އެވެ.
މި ދިޔަ ސަރުކާރު ގައި ފެނަކާ ގައި ބޮޑެތި ހިޔާނަތްތަކެއް ހިންގާފައިވާ ކަމަށް ބުނެ، މި ސަރުކާރުން ދަނީ އެ މައްސަލަތައް ތަހުގީގު ކުރަމުންނެވެ. ދަންވަރުގެ ވަގުތު އޮޑިޓަރ ޖެނަރަލް އޮފީހުން ފެނަކާގެ އޮޑިޓް ރިޕޯޓެއް ނެރިފައިވަނީ ރަނގަޅު ނިޔަތެއް ނެތި ކަމަށް ގިނަ ބަޔަކު ދަނީ ބުނަމުންނެވެ.
މީގެ އިތުރުން ފެނަކައިގެ ކުރީގެ މެނޭޖިން ޑިރެކްޓަރު އަހުމަދު ސައީދުގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ހިފުމުގެ ކުށް ސާބިތުވާ ކަމަށް ކަނޑައަޅައި 4 އަހަރަށް ޖަލަށް ލުމަށް 28 ސެޕްޓެންބަރު 2025 ގައި ހުކުމް ކޮށްފަ އެވެ. 4 އަހަރުގެ ޖަލު ހުކުމެއް އިއްވިއިރު، ދައުލަތުން އެދިފައިވަނީ 1 އަހަރާ 7 މަހުގެ ހުކުމެއް އިއްވައިދިނުމަށެވެ. އަދި މިއީ އިންސާފު ވެރިކޮށް ހިންގި ޝަރީއަތެއް ނޫން ކަމަށް ބުނެ، އެއްވުންތައް ބާއްވައި، ސައީދު އަށް އިންސާފު ހޯދައިނުމަށް ގިނަ ބަޔަކު ގޮވާލާފައިވެ އެވެ.
