އަލް ނަޞްރު ކައިރިން އަލް ޙިލާލަށް މޮޅު ނުވެވުނު

ސައުދީ ޕްރޯ ލީގުގައި އެންމެ ފަހުގެ ޗެމްޕިއަން އަލް ޙިލާލް އަދި ވާދަވެެރި އަލް ނަޞްރު ކުޅުނު މެޗު އެއްވަރުވެގެން ނިމިއްޖެ އެވެ.

ހުކުރު ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ އަލް ނަޞްރުންނެވެ. ނަމަވެސް އަލް ޙިލާލް އިން ވަނީ ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ފުރަތަަމަ މިނެޓުގައި އަލް ނަޞްރުން ވަނީ އަލް ޙިލާލް ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ބްރެޒިލްގެ ޓަލިސްކާ އެވެ. އޭގެ ފަހުން ވެސް އަލް ނަޞްރަށް ވަނީ މެޗުގައި ލަނޑު ޖަހައި ލީޑު ފުޅާ ކުރާނެ ފުރުސަތު ލިބިފަ އެވެ. އެގޮތުން އެ ޓީމަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަދި ސެނެގާލްގެ ސަޑިއޯ މާނޭ އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ.

މެޗުގެ ނަތީޖާ ހަމަހަމަ ކުރުމަށް އަލް ޙިލާލް އިން ވެސް ވަރަށް މަސައްކަތް ކުރި އެވެ. އެގޮތުން އެ ޓީމަށް ކުޅެމުން އަންނަ ސަައުދީ އަރަބިޔާގެ ސަލީމް އަލް ދައުސާރީ އަށް ލިބުނު ފުރުސަތުގެ ބޭނުން ކުރެވޭ ގޮތެއް ނުވި އެވެ. މެޗުގެ ނަތީޖާ ހަމަހަމަ ކުރުމަށް އަލް ޙިލާލް އިން ކުރި މަސައްކަތް ކާމިޔާބުވީ 77 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ މޮޅު ކުޅުމެއް ދައްކަމުން އަންނަ ސާބިއާގެ ސާޖެޖް މިލިންކޮވިޗް ސަވިޗް އެވެ.

މިއީ މި ސީޒަންގެ ސައުދީ ލީގުގައި އަލް ޙިލާލް މޮޅު ނުވެ ނިންމާލަން ޖެހުނު ފުރަތަމަ މެޗެވެ. މެޗު އެއްވަރުވި ނަމަވެސް އަދި ވެސް އެ ޓީމު އޮތީ އެއް ވަނައިގަ އެވެ. އެއީ މިހާތަނަށް ކުޅުނު ނުވަ މެޗުން 24 ޕޮއިންޓު ހޯދައިގެންނެވެ. އަލް ޙިލާލްއާ އެއްވަރު ކުރި އަލް ނަޞްރު އޮތީ ނުވަ މެޗުން 19 ޕޮއިންޓާ އެކު ތިން ވަނައިގަ އެވެ. ދެ ވަަނައިގައި 24 ޕޮއިންޓާ އެކު އޮތީ އަލް އިއްތިހާދު އެވެ.