ސައުދީ ޕްރޯ ލީގުގައި އަލް ނަޞްރާ ދެކޮޅަށް ކުޅުނު މެޗުން މޮޅުވެ، އަލް އިއްތިހާދުން ލީގު ތާވަލްގެ އެއް ވަނަ މަގާމު ދަމަހައްޓައިފި އެވެ.

ހުކުރު ދުވަހުގެ ރޭ އަލް ނަޞްރާ ދެކޮޅަށް ކުޅުނު މެޗު އަލް އިއްތިހާދުން ކާމިޔާބު ކުރީ 2-1 އިންނެވެ. މެޗުގައި އަލް އިއްތިހާދުން ލަނޑު ޖަހައި ކުރި ހޯދާފައި ވަނިކޮށް، އަލް ނަޞްރުން ނަތީޖާ ހަމަހަމަ ވެސް ކުރި އެވެ. ނަމަވެސް މެޗުގެ އެންމެ ފަހު ވަގުތުގައި ލަނޑު ޖަހައިގެން އަލް އިއްތިހާދު ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތު ލިބިފަ އެވެ. އެހެން ނަމަވެސް އެއްވެސް ޓީމަކަށް އެ ފުރުސަތުގެ ބޭނުން ކުރެވޭ ގޮތެއް ނުވި އެވެ. މެޗުގައި ދެ ޓީމުން ވެސް ލަނޑުތައް ޖެހީ ދެ ވަނަ ހާފުގަ އެވެ. މެޗުގެ ދެ ވަނަ ހާފު ފަށައިގެން ދިހަ ވަނަ މިނެޓުގައި ކަރީމް ބެންޒެމާ ވަނީ ލަނޑު ޖަހައި އަލް އިއްތިހާދަށް ކުރި ހޯދައިދީފަ އެވެ. ނަމަވެސް އޭގެ ދެ މިނެޓު ފަހުން ކްރިސްޓިއާނޯ ރޮނާލްޑޯ ވަނީ ލަނޑު ޖަހައި އަލް ނަޞްރަށް ނަތީޖާ ހަމަހަމަ ކޮށްދީފަ އެވެ. މެޗުން އަލް އިއްތިހާދު މޮޅުވީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ސްޓެވަން ބާގްވެއިން ޖެހި ލަނޑުންނެވެ.

މޮޅާއެކު އަލް އިއްތިހާދު އެއް ވަނައިގައި އޮތީ މިހާތަނަށް އެ ޓީމު ކުޅެފައިވާ 13 މެޗުން 36 ޕޮއިންޓާ އެކު އެވެ. އަލް އިއްތިހާދަށް ވުރެ އެއް މެޗު މަދުން ކުޅެގެން، ދެ ވަަނައިގައި އޮތް އެންމެ ފަހުގެ ޗެމްޕިއަން އަލް ޙިލާލަށް ލިބެނީ 31 ޕޮއިންޓެވެ. އަލް އިއްތިހާދު އަތުން ބަލިވި އަލް ނަޞްރު ހަތަރު ވަނައިގައި އޮތީ 13 މެޗުން 25 ޕޮއިންޓާ އެކު އެވެ. ތިން ވަނައިގައި އޮތް އަލް ޤަދިސިއްޔާ އަށް ލިބެނީ 28 ޕޮއިންޓެވެ.